မတ်လ ၂၄ ရက်
ရန်ကုန်တိုင်း၊ အလုံမြို့နယ်၊ သခင်မြပန်းခြံဘေးရှိ YBS( ၅၆) ယာဉ်လိုင်းမှ ယာဉ်တစ်စီးကို မီးရှို့ဖျက်ဆီးတိုက်ခိုက်လိုက်ကြောင်း မြို့ပြ ပြောက်ကျား အဖွဲ့ တာဝန်ရှိသူက ပြောသည်။
ရန်ကုန် အခြေစိုက် အထူးတာ၀န်လုပ်ငန်းအဖွဲ့ (Special Task Agency of Burma - STA) က မတ်လ ၂၃ ရက် ည ၈ နာရီ ၂၅ မိနစ်က မီးရှို့ဖျက်ဆီးတိုက်ခိုက်ခဲ့ခြင်း ဖြစ်သည်။
“ဓာတ်ဆီနဲ့ ကားရှေ့ဘီးတွေကို လောင်းပြီး မီးရှို့လိုက်တာပါ။ အပျက်အစီးတော့ မသိရသေးဘူး။ ကျွန်တော်တို့ ဘက်ကတော့ အထိအခိုက်မရှိဘဲ ဆုတ်ခွာနိုင်ခဲ့ပါတယ်။ အကြမ်းဖက် စစ်ကောင်စီနဲ့အတူ လက်ပါးစေနဲ့၊ စစ်အုပ်စုရဲ့ ထောက်တိုင်တွေကို ရှင်းလင်းဖျက်ဆီးခြင်းတွေ ဆက်လက်လုပ်ဆောင်သွားမယ့် အကြောင်း စစ်အုပ်စုကို ထပ်မံသတိပေးလိုပါတယ် ” ဟု STA မှ တာ၀န်ရှိသူတစ်ဦးက ပြောသည်။
Special Task Agency of Burma (STA) အဖွဲ့သည် စစ်အာဏာရှင်ကို အမြစ်ဖြတ်ချေမှုန်းရန် အဆုံးသတ်တိုက်ပွဲဆင်နွှဲနေသော မြို့ပြစစ်သည်တော်များအဖွဲ့ဖြစ်ပြီး တိုင်းပြည်၏ အချုပ်အခြာအာဏာပြည်သူတို့၏ လက်ထဲကို ပြန်လည် အပ်နှံနိုင်သည်အထိ မဆုတ်မနစ် တိုက်ပွဲ၀င်သွားမည်ဖြစ်ကြောင်းလည်း သတင်းထုတ်ပြန်ထားသည်။
