Tsjeggiese immigrant in Noordwes vermoor
2013-02-19 23:23
- Artikelopsies
- Deel
- Kry Beeld op
’n Tsjeg wat sy geboorteland in die vroeë 1990’s saam met sy gesin verlaat en in Suid-Afrika kom woon het, is eergister in sy huis in Brits, Noordwes, vermoor.
Zarco Bulajic (58) se kop is met ’n baksteen verbrysel en hy is talle kere geskiet.
Lt.kol. Emelda Setlhako, polisiewoordvoerder, het gesê Bulajic se huiswerker was in die erf toe sy glo ’n geraas van binne die huis gehoor het. “Sy het toe gesien hoe Bulajic met iemand stoei.”
’n Skoot is daarna gevuur en die aanvaller het glo weggehardloop. Niemand is nog gearresteer nie.
Quinton Dunn van die PPS-monitering en reaksie-veiligheidsmaatskappy het gesê hulle was omstreeks 10:45 eerste op die toneel nadat die bure gehoor het daar is fout en die maatskappy gekontak het. “Ons kon nie agterkom dat iets gesteel is nie,” het Dunn gesê.
“Dit lyk of Zarco onverhoeds oorval is, want hy het nie die noodknoppie gedruk nie.”
Sy vrou en dogter was nie tuis toe hy in die huis in die Elandsrand-woonbuurt vermoor is nie. Bulajic se vrou, Tanga, is ’n dokter wat op reisskepe werk. Sy het haar ná die moord teruggehaas na Brits.
Volgens Leon Pelser, ’n jare lange vriend en oud-kollega van Bulajic, is sy vrou ontroosbaar en het sy nie kans gesien om self met die media te praat nie. Sy het die polisie gehelp om die toneel op te ruim.
“Sy voel sy sou hom dalk nog kon red as sy vroeër daar kon wees.”
Die egpaar het ’n volwasse dogter, Bonny, wat ook ’n dokter in die Kimberley-omgewing is.
Die gesin het daar gewoon voordat hulle in 2001 na Brits getrek het.
Bulajic word môre 10:30 uit die Brits Oase-kerk begrawe.