बीड : लोकसभा निवडणुकांच्या रणांगणात मराठवाड्यातील (Marathwada) बीड जिल्ह्यात हाय व्होल्टेज लढत होत असून पंकजा मुंडेंना (Pankaja munde) महाविकास आघाडीच्या बजरंग सोनवणे यांचं तगडं आव्हान आहे. त्यातच, निवडणुकांपूर्वी राज्यात तापलेल्या मराठा आरक्षणाच्या (Maratha Reservation) विषयाचं केंद्रस्थानही बीड जिल्हाच आहे. त्यामुळे, येथील निवडणुकीकडे राज्याचे लक्ष लागले आहे. कारण, महाविकास आघाडीकडून शरद पवारांनी मराठा उमेदवार मैदानात उतरवला असून आता मराठा आरक्षण हा येथील निवडणुकीत राजकीय मुद्दा बनल्याचं पाहायला मिळत आहे. बजरंग सोनवणे (Bajrang Sonavane) यांनी पंकजा मुंडे आणि धनंजय मुंडेंवर टीका करताना मराठा आरक्षणाचा मुद्दा उपस्थित केला होता. आता, मराठा समन्वयक विरेंद्र पवार यांनीही धनंजय मुंडेंनी केलेल्या विधानावरुन पलटवार केला आहे. 

महायुतीच्या उमेदवार पंकजा मुंडेंनी उमेदवारी अर्ज दाखल केल्या, त्यानंतर उपस्थितांना संबोधित करताना धनंजय मुंडेंनी बजरंग सोनवणेंना लक्ष्य केलं. विरोधी उमेदवार बहुरंगी आहे, बिगरशेतीचा शेतकरीपुत्र आहे. आम्ही कधी जातपात पाहिली नाही. मराठा आरक्षणाच्या मागणीसाठी आम्ही मराठा समाजाच्या पाठीशी सरकार म्हणून ठामपणे उभे राहिलो. समोरचा उमेदवार मराठा आरक्षणाच्या आंदोलनात कुठे होता? कुणबी प्रमाणपत्र घेण्यासाठी मात्र ते सर्वात पुढे, हे काय समाजाचे भले करणार? अशा शब्दात धनंजय मुंडेंनी सोनवणेंवर टीका केली होती. मात्र, धनंजय मुंडेंनी मराठा आरक्षणाचा विषय छेडल्याने येथील राजकीय वर्तुळात वेगळीच चर्चा रंगली आहे. त्यात, विरेंद्र पवार यांनी धनंजय मुंडेंना थेट प्रत्युत्तर दिलं.धनंजय मुडेंना मराठा आरक्षणावर बोलण्याचा अधिकार नाही, असे विरेंद्र पवार यांनी म्हटले. 

पंकजा मुंडेंना पाडण्यासाठीचा डाव तर नाही ना?

राजकारणासाठी धनंजय मुंडेंसारखे लोक कुठल्याही थराला जाऊ शकतात, काहीही संबंध नसताना मराठा आरक्षणाचा विषय काढून निवडणुकीमध्ये जातीय रंग देण्याचा काम मुंडेंनी केलं आहे. नाहक वंजारी आणि मराठा असा वाद निर्माण केला जात आहे. तुमचे राजकीय हेवेदावे काहीही असू द्या. पण, या मराठवाड्यात तुम्ही खासगी वैयक्तिक लाभ मिळवण्यासाठी अशी विधानं करत आहात का. पंकजा मुंडेंना पाडण्यासाठी तुम्ही हे करत आहात का, येथे मराठा आणि वंजारी समाजात वाद निर्माण होऊन मराठा समाजाने पंकजा मुंडेंना मतं देऊ नये असे षडयंत्र रचलंय का, हा संशय आम्हाला येत असल्याचेही विरेंद्र पवार यांनी म्हटले. तसेच, धनंजय मुंडेंनी मराठा समाजाच्या प्रमाणपत्राचा दाखला देत जे विधान केलं, त्या विधानाचा मी जाहीर निषेध करतो. महाराष्ट्रात आम्ही असा जातीय तेढ निर्माण होऊ देणार नाही, असेही विरेंद्र पवार यांनी म्हटले.   

मराठा समाजाला आरक्षण मिळत असल्याचा त्रागा

बजरंग सोनवणेंनी ओबीसी दाखला काढला ह्याचे दुःख धनंजय मुंडेंना जास्त झालेले दिसत आहे. कारण, इतके वर्षे मराठा समाजाला ओबीसीच्या आरक्षणातून दूर ठेवल्यामुळे ह्यांचं राजकारण फैलावलं होतं. पण, आता मराठा समाजाला आरक्षण मिळत असल्याचं कुठे तरी त्यांना पटत नाही. म्हणूनच, हा त्रागा करीत आहेत, असेही विरेंद्र पवार यांनी म्हटले. 

आणखी वाचा

मनोज जरांगे मराठा समाजासाठी देव, पंकजा आणि धनंजय मुंडेंनी आरक्षणावर बोलू नये; बजरंग सोनवणेंकडून खरपूस समाचार