သျှမ်းပြည်တောင်ကြီးခရိုင် ပင်လောင်းမြို့နယ် နမ့်နိန်းကျေးရွာအနီးတွင် စစ်ကောင်စီတပ်ဖွဲ့နှင့် ပြည်သူကာကွယ်ရေးတပ်ဖွဲ့ (PDF) ပူးပေါင်းတပ်ဖွဲ့တို့ တိုက်ပွဲဆက်လက်ပြင်းထန်နေသေးကြောင်း စုံစမ်းသိရှိရသည်။
ယနေ့ (မတ်လ ၁၆ ရက်) နံနက်အစောပိုင်း ၇ နာရီအချိန်မှစပြီး နမ့်နိန်းကျေးရွာ၏ အနောက်ဘက်ရှိ တောင်းကုန်းဒေသ တစ်ကြောတွင် စစ်ကောင်စီတပ်ဖွဲ့မှ စစ်အင်အား (၂၀၀) ကျော်ဖြင့် စစ်ကြောင်းထိုးလာစဉ်မှာ ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့ တို့နှင့် တိုက်ပွဲစတင်ဖြစ်ပွားခဲ့ ကြောင်း ကရင်နီ တော်လှန်ရေးတပ်ပေါင်းစု KRU ပြန်ကြားရေး ကိုလင်းလင်းက သျှမ်းသံတော်ဆင့်ကို ပြောသည်။
ထိုတိုက်ပွဲအတွင်း ကရင်နီ တော်လှန်ရေးတပ်ပေါင်းစု (KRU) နှင့် KNDF BO(11) ၊ PNDF (KK)၊ အလယ်ပိုင်းတိုင်း တပ်ရင်း (804)၊ တပ်ရင်း (805)၊တပ်ရင်း (1102)၊ စစ်တောင်းပြောက်ကျားအဖွဲ့တို့ ပူပေါင်းပါဝင်ပြီး စစ်ကောင်စီနှင့် တိုက်ပွဲဖြစ်ပွားခဲ့သည်။
“ ဒီနေ့မနက် သူတို့စစ်ကြောင်းထိုးလာတဲ့အချိန် ကျနော်တို့က ပြန်ကာတဲ့အနေနဲ့ တိုက်ပွဲစဖြစ်ခဲ့တယ်။ သူတို့ စစ်ကြောင်းထိုးလာတာတော့ အင်အား (၂၀၀) လောက်ရှိတယ်။ သူတို့ရေဆင်းခပ်တဲ့ အချိန်မှာ ကျနော်တို့နဲ့ တိုက်ပွဲစဖြစ်တာ။ နံနက်အစောပိုင်းကနေ နေ့လည်အထိ တိုက်ပွဲတွေ ပြင်းထန်ခဲ့တယ်။ သူတို့ဖက်မှာ အကျဆုံး များတယ် “ ဟု ကိုလင်းလင်း က ပြောသည်။
အဆိုပါ တိုက်ပွဲကြောင့် စစ်ကောင်စီဘက်မှ တပ်သား ၂၀ ကျော် သေဆုံးခဲ့ပြီး ပြည်သူ့ကာကွယ်ရေးတပ်ဖွဲ့ PDF မှ ကရင်နီ KRU (၂) ဦး၊ တပ်ရင်း (804) ၁ ဦး၊ တပ်ရင်း(805) ၁ ဦး နှင့် စစ်တောင်းပြောက်ကျား (၁) ဦး စုစုပေါင်း (၅) ဦး ထိခိုက်ဒဏ်ရာရရှိခဲ့ကြောင်း သိရသည်။
ထို့အပြင် တိုက်ပွဲအတွင်း အရပ်သားပြည်သူ ၁၀ ခန့်ကိုလည်း စစ်ကောင်စီတပ်ဖွဲ့မှ ဖမ်းဆီးခေါ်ဆောင်သွားပြီး စစ်သုံ့ပန်းသဖွယ် ပြုမှုနေကြောင်း တွေ့ရှိရသည်ဟု ၎င်းကဆက်ပြောသည်။
“ သူတို့ ဓားစာခံအနေနဲ့ ဖမ်းသွားတာ။ သူတို့ရေခပ်ဆင်းတာကအစ အဲ့ဒီဒေသခံတွေကို လိုက်ပြီး ပြခိုင်းနေတာ။ အရှေ့ကနေ သွားခိုင်းတာ တွေ့ရတယ်။ ၅ ယောက်ကနေ ၁၀ ယောက်လောက်ရှိတယ် “ ဟု ၎င်းက ဆိုသည်။
တိုက်ပွဲသည် ပြီးခဲ့သည့် (ဖေဖော်ဝါရီ) လပိုင်းမှစပြီး ယနေ့အထိ ဆက်လက်ဖြစ်ပွားနေလျက်ရှိပြီး ဒေသခံများအနဖြင့် တိုက်ပွဲနှင့်ဝေးသော နေရာဒေသများအား ပြောင်းရွှေ့နေထိုင်းပေးကြပါရန် ပြည်သူ့ကာကွယ်ရေးတပ်ဖွဲ့ PDF မှ တိုက်တွန်းထားကြောင်း သိရသည်။
ပြီးခဲ့သည် (မတ်လ ၁၁) ရက် နမ့်နိန်းကျေးရွာ ဘုန်းကြီးအတွင်း ခိုလှုံနေသည့် သံဃာတော် (၃) ပါးအပါအဝင် ဒေသခံပြည်သူ ၂၂ ဦးကို စစ်ကောင်စီတပ်ဖွဲ့မှ သတ်ဖြတ်ခဲ့ကြောင်း သိရသည်။
ထိုသတ်ဖြတ်မှုနှင့်ပတ်သက်ပြီး စစ်ကောင်စီနှင့် ၎င်း၏ လက်အောက်ခံ ပအိုဝ်းပြည်သူ့စစ် (PNA)ဘက်ကလည်း မဟုတ်ကြောင်း ငြင်းဆိုခဲ့ပြီး KNDF ဘက်မှ ကျူးလွန်သည်ဟုလည်း စွပ်စွဲပြောဆိုခဲ့သည်။
