Home
မြန်မာသတင်း
ပြည် ကညနရုံး ဗုံး ၄ ကြိမ် ပေါက်ကွဲ၊ မပေါက်ကွဲသေးသည့် ဗုံးများ တွေ့ရှိ
DVB
·
February 23, 2024
wap 2322024

ပဲခူးတိုင်းအနောက်ခြမ်း၊ ပြည်မြို့၊ မြို့သစ်ရပ်ကွက်ရှိ ကုန်းလမ်းပို့ဆောင်ရေး ညွှန်ကြားမှုဦးစီးဌာန (ကညန)ရုံးမှာ အဝေးထိန်းဗုံး ပေါက်ကွဲမှု ၄ ကြိမ် ဖြစ်ခဲ့ပြီး တခြားနေရာတွေမှာ လည်း မပေါက်ကွဲသေးတဲ့  ဗုံး ၂လုံးထပ်မံ တွေ့ရှိခဲ့တယ်လို့  မြို့ခံတွေထံက  သိရပါတယ်။ 

ဖေဖော်ဝါရီ ၂၃ ရက် မနက် ၄ နာရီကျော်မှာ ပေါက်ကွဲသံတွေ ဆက်တိုက်ကြားရပြီး စစ်ကောင်စီတပ်ဖွဲ့ဝင်တွေ လာရောက်  စစ်ဆေးခဲ့တယ်လို့ မြို့ခံတယောက်က ပြောပါတယ်။

“တနေရာတည်း ၄ လုံးကွဲတာ။‌ ကွဲတာက အတော်ပြင်းတယ်၊ အသံကလည်း အကျယ်ကြီး အိမ်တွေပါတုန်တယ်။ အထိအခိုက်မသိရဘူး။ အသင်းတွေကိုလည်း မခေါ်ဘူး။ အရပ်သားတွေ ဝင်ခွင့်မရဘူး။ ရုံး‌တောင် ပိတ်ထားတယ်။ နေရာအနှံကို စစ်နေတာ အပြင်ထွက်တဲ့သူကို မရှိဘူး။ စစ်ကားတွေတော့ ရုံးထဲဝင်လိုက်ထွက်လိုက်ပဲ။”

ကညနရုံး အဝေးထိန်းဗုံးနဲ့ တိုက်ခိုက်ခံရပြီး နေရာစုံမှာ စစ်ဆေးမှုတွေ လုပ်ဆောင်နေကာ မူယာပင်ရပ်ကွက် မာန်အောင်ပေါက်လမ်းအနီးမှာလည်း မပေါက်ကွဲသေးတဲ့ နောက်ထက် ဗုံး ၂ လုံး တွေ့ရှိခဲ့ပါတယ်။

စစ်အာဏာသိမ်းပြီးချိန်မှစလို့ အဲ့ဒီ ကညနရုံးမှာ စစ်ကောင်စီတပ်က နေရာ ယူထားပြီး ရုံးအတွင်းပိုင်းမှာ အဆောက်အဦဆောက်လုပ်နေထိုင်ကာ လုံခြုံရေး မျှော်စင်တွေနဲ့ ခြံစည်းရိုး အုတ်တံတိုင်းကိုလည်း သံစူးကြိုးတွေနဲ့ ကာရံထားပါတယ်။  

၂၀၂၃ ခုနှစ် နိုဝင်ဘာ ၁၁ ရက်ကလည်း စည်ပင်ရုံးနဲ့ ရဲရိပ်သာရုံးတွေကို ပြည်ခရိုင်တပ်ရင်း-၃၆၀၂ တပ်ခွဲ(၁)က အဝေးထိန်းမိုင်နဲ့ တိုက်ခိုက်ခဲ့ပြီး အခုဗုံးခွဲတိုက်ခိုက်မှုကိုတော့ ဘယ်အဖွဲ့ကမှ သူတို့လက်ချက်လို့  သတင်းထုတ်ပြန်ထားတာ မတွေ့ရ သေးပါဘူး။ 

Photo Cj

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024