- Web Master
- ၃၀ မေ ၂၀၂၄
ရခိုင်ပြည်၊ ကျောက်ဖြူမြို့နယ်တွင် ယနေ့ နေ့လယ်ပိုင်းက တိုက်ပွဲဖြစ်ပွားနေစဉ် အမှတ်(၃၂) ရဲတပ်ရင်းမှ လက်နက်ကြီး ရမ်းသန်းပစ်ခတ်မှုကြောင့် အနည်းဆုံးအရပ်သား ၆ ဦးခန့်ဒဏ်ရာရရှိသွားကြောင်း သတင်းရရှိသည်။
ဒဏ်ရာရရှိသွားသူများမှာ အုန်းတောကျေးရွာမှ ကားသမားကိုညီညီနိုင်(၂၃)နှစ်၊ မင်းတက်တောင်နှင့် အုန်းတောကျေးရွာမှကားဖြင့်လိုက်ပါလာသည့်အမျိုးသမီးများနှင့် ကုလဘာ(အူချေ)ရွာမှ အသက်(၄၀) ဝန်းကျင်အမျိုးသားတစ်ဦးတို့ဖြစ်ကြောင်းသိရသည်။
" လက်နက်ကြီးကျည်ထိတာ အနည်းဆုံး ၆ ယောက်လောက်ဒဏ်ရာရသွားတယ်။ အူချေရွာက တစ်ယောက် ဒဏ်ရာရတယ်။ ကားသမား ကိုညီညီနိုင်လည်းဒဏ်ရာရသွားတယ်။ ဇင်ချောင်းက ဈေးဝယ်ပြီးပြန်လာတဲ့ ကားနှစ်စီးမှာပါလာတဲ့ အမျိုးသမီးတွေလည်း ဒဏ်ရာရသွားတာပါ။ ကားပေါ်မှာက ဈေးဝယ်ပြီးပြန်လာတဲ့အမျိုးသမီးတွေများတယ်" ဟု အုန်းတောဝက်ဆံကျေးရွာမှ ဒေသခံတစ်ဦးကပြောသည်။
ယနေ့မနက် ၁၁ နာရီဝန်းကျင်ကပင် ညနေ ၃ နာရီကျော်ထိ မလကျွန်း၊ ပြင်ရှည်ရွာသစ်နှင့် ကျောက်ဖြူ တောင်ကြားရှိ ရေမျက်တွင် ရက္ခိုင့်တပ်တော် (AA)နှင့်စစ်ကောင်စီတပ်တို့ တိုက်ပွဲ အပြင်းထန်ဖြစ်ပွားခဲ့ခြင်း ဖြစ်သည်။
တိုက်ပွဲဖြစ်ပွားနေစဥ် နေ့လယ် ၂ နာရီကျော်အချိန်က အုန်းတောကျေးရွာနှင့် မင်းတက်တောင် ကျေးရွာသို့ ပြန်မည့် ကားနှစ်စီးမှာ ကုလဘာ(အူချေ)ရွာအနီးကားလမ်းတွင်ရပ်၍ စောင့်ဆိုင်းနေစဥ် အမှတ် (၃၂) ဒိုးတန်းတောင် ရဲတပ်ရင်းမှပစ်ခတ်သည့် လက်နက်ကြီးနှစ်လုံး ကျရောက်ပေါက်ကွဲပြီး ဒဏ်ရာရရှိသွားခြင်းဖြစ်ကြောင်းသိရသည်။
"ကားကနှစ်စီးပါ။ မင်းတက်တောင်က တစ်စီးနဲ့ အုန်းတောကတစ်စီးပါ။ တိုက်ပွဲဖြစ်နေလို့ ရွာကို မသွားသေးဘဲ အူချေနားကကားလမ်းမှာရပ်ထားတာ။ အဲဒါမှာ အူချေရွာနားကို လက်နက်ကြီး ကျတယ်။ ကျည်စတွေထိပြီးတော့ ဒဏ်ရာရသွားတာ" ဟု ပြောသည်။
အုန်းတောကျေးရွာမှ ကားသမားကိုညီညီနိုင်တွင် ခါးနှင့်လက်မောင်းများတွင်ဒဏ်ရာရရှိသွားပြီး ကျန်သည့် အမျိုးသမီးများတွင်လည်း ခြေနှင့်လက်များတွင် လက်နက်ကြီးကျည်စ ထိမှန် ဒဏ်ရာ ရရှိသွားကြောင်း သိရသည်။
ဒဏ်ရာရရှိသွားသည့်အရပ်သားများကို မင်းပြင်ဆေးရုံနှင့် ဇင်ချောင်းတိုက်နယ်ဆေးရုံများသို့ ပို့ဆောင်ပြီး ဆေးကုသမှုခံယူနေရကြောင်း သိရှိရသည်။
ယနေ့မနက်ပိုင်းက ရေမျက်တွင် အင်အား (၃၀) လောက်ရှိသည့် စစ်ကြောင်းတစ်ခုကို ရက္ခိုင့်တပ်တော်က စတင်တိုက်ခိုက်ရာမှ နှစ်ဘက်တိုက်ပွဲပြင်းထန်ဖြစ်ပွားခဲ့ခြင်းဖြစ်ကြောင်း ဒေသခံများကပြောသည်။ (NN-23)