បេក្ខជនជាង ៦០០នាក់ បានដាក់ពាក្យចូលបម្រើការងារជាមន្ត្រីជាប់កិច្ចសន្យានៅទីស្ដីការក្រសួងរ៉ែ និងថាមពល ក្នុងឆ្នាំ២០២៤ ដើម្បីប្រើប្រាស់សមត្ថភាព ចំណេះ ជំនាញ និងបទពិសោធ បម្រើការងារនៅតាមអគ្គនាយកដ្ឋាននីមួយៗដែលមានតម្រូវការ។
ក្នុងបញ្ជីរាយនាមផ្លូវការបេក្ខជនដាក់ពាក្យចូលបម្រើការងារជាមន្ត្រីជាប់កិច្ចសន្យានៅទីស្ដីការក្រសួងរ៉ែនិងថាមពល កាលពីថ្ងៃទី៩មករា បញ្ជាក់ថា ក្នុងឆ្នាំ២០២៤ បេក្ខជនសរុបចំនួន ៦០៩នាក់ (ស្រី ៣១១នាក់) បានដាក់ពាក្យសុំចូលបម្រើការងារជាមន្ត្រីជាប់កិច្ចសន្យានៅក្រសួងរ៉ែនិងថាមពល។
បេក្ខជនដែលក្រសួងជ្រើសរើសបម្រើការងារត្រូវមានចំណេះដឹង និងជំនាញផ្នែក អក្សរសាស្ត្រខ្មែរ ចំនួន ៣០នាក់។ ផ្នែកសេដ្ឋកិច្ច គណនេយ្យ ហិរញ្ញវត្ថុ នីតិសាស្ត្រ រដ្ឋបាលសាធារណៈ Graphic Design ថតរូប និងជំនាញពាក់ព័ន្ធនឹងវិស័យរ៉ែ ថាមពល ឬប្រេងកាត ចំនួន៦០នាក់។
ក្នុងបទបង្ហាញស្ដីពី នីតិវិធីនៃការប្រឡងជ្រើសរើសមន្ត្រីជាប់កិច្ចសន្យា ដល់បេក្ខជននៅទីស្ដីការក្រសួងកាលពីម្សិលមិញ លោក ស៊ុយ ឌីម៉ង់ រដ្ឋលេខាធិការ និងជាប្រធានក្រុមការងារជ្រើសរើសមន្ត្រីជាប់កិច្ចសន្យា បានឱ្យដឹងថា ក្នុងចំណោមបេក្ខជនដែលបានដាក់ពាក្យទាំងអស់ ក្រសួងជ្រើសរើសចំនួន ៩០នាក់ ដើម្បីបម្រើការងារក្នុងឆ្នាំ២០២៤។
លោកបន្ថែមថា ក្នុងចំណោមជ្រើសរើសមន្ត្រីបម្រើការងារជាប់កិច្ចសន្យាសរុបទាំង ៩០នាក់ គឺមានការបូកសរុបជាមួយបេក្ខជនទាំងដាក់ពាក្យថ្មី និងបេក្ខជនជាមន្ត្រីជាប់កិច្ចសន្យាចាស់ដែលមានស្រាប់។
លោកបន្តថា សម្រាប់ការជ្រើសរើសមន្ត្រីជាប់កិច្ចសន្យាក្នុងឆ្នាំ២០២៤ មានលក្ខណៈខុសប្លែកពីរាល់ឆ្នាំ ដោយសារឆ្នាំមុនៗមានបេក្ខជនដាក់ពាក្យចំនួនតិច ប៉ុន្តែសម្រាប់ឆ្នាំនេះមានចំនួនច្រើនដែលតម្រូវឱ្យក្រសួងមានការកែប្រែនីតិវិធីមួយចំនួនក្នុងការជ្រើសរើស។
លោក ស៊ុយ ឌីម៉ង់ បញ្ជាក់ថា ចំពោះបេក្ខជនថ្មី និងបេក្ខជនជាមន្ត្រីជាប់កិច្ចសន្យាដែលមានស្រាប់ ត្រូវបានបែងចែកវិញ្ញាសារប្រឡងផ្សេងៗពីគ្នា ដែលមន្ត្រីជាប់កិច្ចសន្យាដែលមានស្រាប់នឹងមានវិញ្ញាសារធ្ងន់ជាងបេក្ខជនថ្មី។
លោកបន្ថែមថា ការប្រឡងជ្រើសរើសឆ្នាំនេះ ក្រសួងឈរលើមូលដ្ឋានជ្រើសយកអ្នកមានសមត្ថភាពពិតប្រាកដ។ កាលបរិច្ឆេទប្រឡងនឹងប្រព្រឹត្តទៅនៅថ្ងៃ១៩ និងថ្ងៃទី២២ ខែមករា ឆ្នាំ២០២៤។
លោក យក់ ប៊ុនណ្ណា រដ្ឋលេខាធិការ និងជាប្រធានអ្នកនាំពាក្យក្រសួងមុខងារសាធារណៈ បានឱ្យដឹងថា រដ្ឋាភិបាលសម្រាប់អាណត្តិទី៧ នៅតែបន្តជ្រើសរើសមន្ត្រីជាប់កិច្ចសន្យាដូចរាល់ឆ្នាំ ដើម្បីបំពេញតម្រូវការនៅតាមក្រសួងស្ថាប័នរដ្ឋទាំងថ្នាក់ជាតិ និងក្រោមជាតិ។
លោកបញ្ជាក់ថា៖ «ការជ្រើសរើសមន្ត្រីជាប់កិច្ចសន្យា ត្រូវបានអនុវត្តសម្រាប់បម្រើការងារជាប្រចាំថ្ងៃ និងការងារដែលមិនមានលក្ខណៈអចិន្ត្រៃយ៍ ក្នុងក្របខណ្ឌនៃការផ្តល់សេវាសាធារណៈ។ មន្ត្រីជាប់កិច្ចសន្យា គឺមានរយៈពេលមួយឆ្នាំម្តង»។
លោក យក់ ប៊ុនណ្ណា បន្ថែមថា បច្ចុប្បន្នមន្ត្រីរាជការស៊ីវិល ដែលកំពុងបម្រើការងារនៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិនៅទូទាំងប្រទេស គឺមានប្រមាណ ២៣ ម៉ឺននាក់។
រដ្ឋលេខាធិការ និងជាប្រធានអ្នកនាំពាក្យបន្តថា ចំពោះមន្ត្រីជាប់កិច្ចសន្យា ដែលបម្រើការងារនៅតាមក្រសួងស្ថាប័ន និងរដ្ឋបាលថ្នាក់ក្រោមជាតិ មានប្រមាណ ១៩ ០០០នាក់។
កាលពីដើមខែមករា លោកនាយករដ្ឋមន្ត្រី ហ៊ុន ម៉ាណែត បានចេញអនុក្រឹត្យដំឡើងប្រាក់កម្រៃប្រចាំខែជូនមន្ត្រីជាប់កិច្ចសន្យាពីចំនួន ៧១០ ០០០រៀល ទៅចំនួន ៧៧០ ០០០រៀល។
លោក ហ៊ុន ម៉ាណែត បញ្ជាក់ថា ការដំឡើងប្រាក់កម្រៃប្រចាំខែដូចកំណត់ខាងលើនេះ ត្រូវអនុវត្តចាប់ពីថ្ងៃទី១ ខែមករា ឆ្នាំ២០២៤ តទៅ សម្រាប់អនុវត្តចំពោះតែមន្ត្រីជាប់កិច្ចសន្យាបម្រើការងារនៅតាមក្រសួង ស្ថាប័នទាំងថ្នាក់ជាតិ និងថ្នាក់ក្រោមជាតិ។
លោកនាយករដ្ឋមន្ត្រីក៏បានដាក់បទបញ្ជាឱ្យរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុ ក្រសួងមហាផ្ទៃ ក្រសួងការពារជាតិ ក្រសួងមុខងារសាធារណៈ និងរដ្ឋមន្ត្រីគ្រប់ក្រសួងស្ថាប័នពាក់ព័ន្ធ ត្រូវអនុវត្តដំឡើងប្រាក់កម្រៃជូនមន្ត្រីជាប់កិច្ចសន្យាចាប់ពីខែមករាតទៅ៕