ក្រសួងទេសចរណ៍ និងមូលនិធិពិភពលោកសម្រាប់ធម្មជាតិ (WWF) បានសហការគ្នាក្នុងការលើកកម្ពស់ «ទេសចរណ៍បៃតង» នៅក្នុងប្រទេសកម្ពុជា ដោយផ្តល់អាទិភាពដល់ការអភិរក្សធនធានធម្មជាតិ ទន្ទឹមនឹងការលើកកម្ពស់ការប្រើប្រាស់ថាមពលកកើតឡើងវិញ សំដៅប្រែក្លាយប្រទេសកម្ពុជាទៅជាគោលដៅទេសចរណ៍ថ្នាក់ពិភពលោក។
ការប្តេជ្ញានេះត្រូវបានលើកឡើងនៅពេលលោក សុខ សូកេន រដ្ឋមន្ត្រីក្រសួងទេសចរណ៍បានទទួលការគួរសមពីលោកស្រី Bella Roscher ប្រធានផ្នែកអភិវឌ្ឍន៍បណ្តាញសកលនៃ WWF និងលោក Richard Scotney ប្រធានផ្នែកប្រសិទ្ធភាពថាមពលសកល ដើម្បីពិភាក្សាអំពីឱកាសសម្រាប់ការអភិវឌ្ឍទេសចរណ៍ប្រកបដោយចីរភាព ភាពធន់ និងការការពារធម្មជាតិ នៅរាជធានីភ្នំពេញ។
ក្នុងជំនួបនោះ លោក សុខ សូកេន បានបង្ហាញពីចក្ខុវិស័យរបស់រដ្ឋាភិបាលក្នុងការប្រែក្លាយកម្ពុជា ទៅជាគោលដៅទេសចរណ៍ប្រកបដោយគុណភាពជាសាកល ដោយផ្តោតលើការអភិវឌ្ឍទេសចរណ៍ប្រកបដោយនិរន្តរភាព និងទេសចរណ៍បៃតង ផ្តល់អាទិភាពដល់ការអភិរក្សធនធានធម្មជាតិ ក៏ដូចជាកាត់បន្ថយការប្រើប្រាស់ថាមពល តាមរយៈការលើកកម្ពស់ទេសចរណ៍ធម្មជាតិ និងការប្រើប្រាស់ថាមពលកកើតឡើងវិញ។
លោកបានមានប្រសាសន៍ថា ការសម្រេចបាននូវចក្ខុវិស័យនេះ ទាមទារឱ្យមានការចូលរួមពីគ្រប់ភាគីពាក់ព័ន្ធ ដែលអាចធ្វើទៅបានក្រោមយន្តការភាពជាដៃគូរបស់ស្ថាប័ន-ឯកជន និងសហការជាមួយក្រុមប្រឹក្សាទីផ្សារ និងផ្សព្វផ្សាយទេសចរណ៍កម្ពុជា (CTB) ដែលត្រូវបានអនុម័តដោយរាជរដ្ឋាភិបាលនាពេលថ្មីៗនេះ។
លោកស្រី Bella បានរៀបរាប់សង្ខេបពីការរួមចំណែករបស់អង្គការ WWF តាមរយៈគម្រោង «ការកសាងឡើងវិញនូវបរិស្ថាន និងទេសចរណ៍ដែលប៉ះពាល់ដល់អាកាសធាតុ» ដែលត្រូវបានដាក់ឱ្យដំណើរការនៅឆ្នាំ ២០២២ ឧបត្ថម្ភថវិកាដោយទីភ្នាក់ងារអភិវឌ្ឍន៍ស្វីស ដើម្បីជួយលើកកម្ពស់អេកូទេសចរណ៍ និងសហគមន៍ទេសចរណ៍ក្នុងតំបន់មេគង្គលើ រួមមានខេត្តក្រចេះ ស្ទឹងត្រែង និងខេត្តមណ្ឌលគិរី។
ថ្លែងទៅកាន់កាសែតខ្មែរថាមស៍ លោក Scotney បាននិយាយថា៖ «WWF បានអនុវត្តការសិក្សាលទ្ធភាពជាង ១០ សម្រាប់សណ្ឋាគារ និងភោជនីយដ្ឋាននៅទូទាំងប្រទេស ហើយការសិក្សាទាំងនេះបង្ហាញពីរបៀបដែលពន្លឺព្រះអាទិត្យអាចជួយពួកគេសន្សំថវិកា និងជំរុញអត្តសញ្ញាណបៃតងរបស់ពួកគេ។
លោកបន្តថា៖ «ក្រុមហ៊ុនបដិសណ្ឋារកិច្ចជាង ១២ ក៏កំពុងប្រកួតប្រជែងក្នុងការជំរុញប្រសិទ្ធភាពថាមពលកម្ពុជាផងដែរ ដើម្បីកាត់បន្ថយវិក្កយបត្រ និងការបំភាយកាបូនរបស់ពួកគេ»។
លោកបានបន្ថែមថា WWF បានដំឡើងថាមពលព្រះអាទិត្យនៅតាមតំបន់ទេសចរណ៍ធម្មជាតិសហគមន៍មួយចំនួនក្នុងព្រៃលិចទឹកទន្លេមេគង្គ ដែលទេសចរណ៍ធម្មជាតិជាមធ្យោបាយមួយក្នុងការបង្កើតប្រាក់ចំណូលសម្រាប់សហគមន៍មូលដ្ឋាន ក៏ដូចជាការពារសត្វព្រៃ ខណៈដែលពន្លឺព្រះអាទិត្យអនុញ្ញាតឱ្យមានសេវាកម្មកាន់តែប្រសើរសម្រាប់អតិថិជន និងសន្សំសំចៃថ្លៃប្រេងម៉ាស៊ូត៕