លោកលីម (Lim)ប្រធានក្រុមហ៊ុនTemasek Holdings បានជម្រាបជូននាយករដ្ឋមន្ត្រីកម្ពុជាឯកឧត្តមបណ្ឌិតហ៊ុនម៉ាណែតថាក្រុមហ៊ុនរបស់លោកមានគោលបំណងពង្រីកអាជីវកម្មរបស់ខ្លួនបន្ថែមទៀតនៅក្នុងតំបន់អាស៊ានដែលចំណោមនោះ កម្ពុជាស្ថិតក្នុងអាទិភាពផងដែរ។
ក្នុងជំនួបនោះលោកប្រធានក្រុមហ៊ុនTemasek Holdings បានថ្លែងអំណរគុណយ៉ាងជ្រាលជ្រៅចំពោះឯកឧត្តមបណ្ឌិតនាយករដ្ឋមន្រ្តីកម្ពុជាដែលបានចំណាយពេលវេលាអនុញ្ញាតឲ្យលោកនិងសហការីបានជួបពិភាក្សាការងារនិងអបអរសាទរចំពោះការតែងតាំងឯកឧត្តមបណ្ឌិតជានាយករដ្ឋមន្ត្រីនៃព្រះរាជាណាចក្រកម្ពុជានៅក្នុងនីតិកាលទី៧នៃរដ្ឋសភា។
លោកលីមក៏បានរំឮកអំពីជំនួបរវាងរូបលោកនិងសម្តេចតេជោហ៊ុនសែននាពេលកន្លងមកដោយក្នុងនោះលោកបានសម្តែងការកោតសរសើរចំពោះគំរូវីរភាពរបស់សម្តេចតេជោ។
ក្នុងជំនួបនោះលោកលីមបានជម្រាបជូនឯកឧត្តមបណ្ឌិតហ៊ុនម៉ាណែតថាក្រុមហ៊ុនរបស់លោកបាននិងកំពុងធ្វើអាជីវកម្មនៅក្នុងប្រទេសជាច្រើនក្នុងតំបន់និងពិភពលោកដោយផ្តោតលើផ្នែកហិរញ្ញវត្ថុការដឹកជញ្ជូនទូរគមនាគមន៍បច្ចេកវិទ្យានិងការផ្សាយពាណិជ្ជកម្មនិងអចលនទ្រព្យ។
លោកលីម បាននិយាយថា“ក្រុមហ៊ុន [របស់ខ្ញុំ] មានគោលបំណងពង្រីកអាជីវកម្មរបស់ខ្លួនបន្ថែមទៀតនៅក្នុងតំបន់អាស៊ានដែលកម្ពុជាជាអាទិភាពផងដែរ។យើងចង់ពង្រីកការវិនិយោគនៅកម្ពុជាលើផ្នែកបច្ចេកវិទ្យាឌីជីថលថាមពលកកើតឡើងវិញនិងវិស័យសំខាន់ៗផ្សេងទៀត”។
ជាការឆ្លើយតបឯកឧត្តមបណ្ឌិតនាយករដ្ឋមន្ត្រីហ៊ុនម៉ាណែតបានស្វាគមន៍ក្រុមហ៊ុនTemasek Holdings មកកាន់កម្ពុជា។ឯកឧត្តមបណ្ឌិតបានបញ្ជាក់ថាគោលនយោបាយរបស់រដ្ឋាភិបាលអាណត្តិទី៧គឺយកចិត្តទុកដាក់និងបង្កើតបរិយាកាសគាំទ្រដ៏រឹងមាំសម្រាប់ការវិនិយោគប្រកបដោយនិរន្តរភាពលើគ្រប់វិស័យនៅកម្ពុជាហើយកម្ពុជាបើកចំហរចំពោះអ្នកវិនិយោគមកពីគ្រប់ប្រទេស។
ឯកឧត្តមបណ្ឌិតនាយករដ្ឋមន្ត្រីបានបន្ថែមថាក្រៅពីនេះរាជរដ្ឋាភិបាលកម្ពុជាបានដាក់ចេញនូវក្របខ័ណ្ឌច្បាប់បទដ្ឋាននិងយន្តការថ្មីៗដើម្បីលើកកម្ពស់គាំទ្រនិងលើកទឹកចិត្តវិនិយោគិនបរទេស។ឯកឧត្តមបណ្ឌិតក៏បានបញ្ជាក់ពីសារៈសំខាន់នៃការវិនិយោគនៅក្នុងតំបន់សេដ្ឋកិច្ចពិសេសនិងសួនឧស្សាហកម្ម។