រដ្ឋមន្ត្រីថាក្រសួងអធិការកិច្ចមានបេសកកម្មធ្វើអធិការកិច្ចលើគ្រប់វិស័យទាំងនៅថ្នាក់ជាតិ និងថ្នាក់ក្រោមជាតិដែលសំដៅ បង្ការ ទប់ស្កាត់ និងមានវិធានការផ្សេងៗ ដើម្បីប្រឆាំងអំពើពុករលួយ។
ការលើកឡើងនេះ ធ្វើឡើងនៅក្នុងវេទិកាកិច្ចពិភាក្សាលើប្រធានបទ «អធិការកិច្ចក្នុងបរិបទកំណែទម្រង់» ដែលប្រព្រឹត្តទៅនៅក្រសួងអធិការកិច្ចកាលពីម្សិលមិញ។
វេទិកាពិភាក្សាបានរៀបចំឡើងដោយក្លិបអ្នកកាសែតកម្ពុជា និងមានការអញ្ជើញចូលរួមពីលោក ហួត ហាក់ រដ្ឋមន្ត្រីក្រសួងអធិការកិច្ច ជាវាគ្មិន ព្រមទាំងអ្នកសារព័ត៌មានជាង ១០០នាក់មកពីស្ថាប័ននានា។
លោក ហួត ហាក់ លើកឡើងថាក្រសួងអធិការកិច្ចក៏មានតួនាទីទទួលបេសកកម្មពីរដ្ឋាភិបាលនៅក្នុងការតាមដាន ការអនុវត្តច្បាប់ផងដែរ ហើយបេសកកម្មរបស់ក្រសួងអធិការកិច្ចនេះបានដើរតួនាទីសំខាន់ណាស់សម្រាប់រាជរដ្ឋាភិបាលនៅក្នុងការអភិវឌ្ឍឱ្យបានសម្រេចនៅកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ដែលបានដាក់ចេញ។
នៅក្នុងវេទិកាពិភាក្សានេះ លោក ហួត ហាក់ បានលើកឡើងនៅចំណុចសំខាន់ៗបី រួមមាន សាវតា រចនាសម្ព័ន្ធ និងបេសកកម្មការងាររបស់ក្រសួងអធិការកិច្ច។
លោកថ្លែងថា៖ «ការតាមដានអនុវត្តច្បាប់គឺជាបេសកកម្មមួយយ៉ាងសំខាន់ផងដែររបស់ក្រសួងអធិការកិច្ច គឺការត្រួតពិនិត្យ អនុលោមភាព នៃច្បាប់ និងលិខិតបទដ្ឋានគតិយុត្តពាក់ព័ន្ធទាំងអស់ដែលកំពុងនៅជាធរមាននៅក្នុងព្រះរាជាណាចក្រកម្ពុជា នៅក្នុងនោះរួមបញ្ចូលទាំងការអនុវត្តនូវរាល់អនុសាសន៍ដ៏ខ្ពង់ខ្ពស់របស់សម្តេចនាយករដ្ឋមន្ត្រីផងដែរ » ។
រដ្ឋាភិបាលក៏បានប្រគល់ភារកិច្ចជូនក្រសួងអធិការកិច្ចឱ្យទទួលខុសត្រូវលើវិស័យទទួលពាក្យបណ្តឹង និងអង្កេតស្រាវជ្រាវ ហើយក្រសួងក៏មានតួនាទីនៅក្នុងការបើកការស៊ើបអង្កេតទៅលើរូបវន្តបុគ្គល និងនីតិបុគ្គល។
លោកបានបន្ថែមថា៖« ក្រសួងមានបេសកកម្មទទួលពាក្យបណ្តឹងពីប្រជាពលរដ្ឋ ហើយក្រសួងក៏មានសមត្ថកិច្ចនៅក្នុងការបើកការស្រាវជ្រាវស៊ើបអង្កេតទៅដល់គ្រប់បុគ្គលទាំងអស់រួមទាំងពីរូបវន្តបុគ្គលដែលអាចជាប្រជាពលរដ្ឋ នីតិបុគ្គលដែលអាចជាក្រុមហ៊ុន សមាគម ឬអង្គការជាដើមដែលមានជាប់សំណុំរឿងដែលដើមបណ្តឹងបានដាក់ពាក្យបណ្តឹងមក»។
លោក ហួត ហាក់ បញ្ជាក់ថា ក្រសួងអធិការកិច្ចបានកំពុងទទួលពាក្យបណ្តឹងគ្រប់ប្រភេទ រួមទាំងពាក្យបណ្តឹងបរិហារ និងបណ្តឹងតវ៉ាគ្រប់រូបភាពដែលឆ្លើយតបទៅនឹងបេសកកម្មរបស់ក្រសួងមានសមត្ថកិច្ចដោះស្រាយ។
ក្នុងរយៈពេល ៣ឆ្នាំចុងក្រោយនេះ ក្រសួងអធិការកិច្ចបានទទួលពាក្យបណ្តឹងបានចំនួន ៤៧។ លោកកត់សម្គាល់ថាបណ្តឹងភាគច្រើន គឺជាប្រភេទបណ្តឹងដែលទាក់ទងជាមួយនឹងទំនាស់ដីធ្លី។
លោកបានបានបញ្ជាក់បន្ថែមថាតួនាទីរបស់ក្រសួងអធិការកិច្ចគឺមិនមែនសំដៅតែរកឱ្យឃើញ កំហុសនោះទេ។
លោកថា៖ « ការទទួលខុសត្រូវរបស់ក្រសួងអធិការកិច្ចមានពីរគឺ ទី១៖ រកឱ្យឃើញចំណុចដែលអនុវត្តបានល្អត្រឹមត្រូវតាមច្បាប់ និងលិខិតគតិយុត្តបានកំណត់ទី២៖ រកឱ្យឃើញចំណុចខ្វះខាត ចំណុចខុសឆ្គងតាំងពី
តូចតាច មធ្យមរហូតដល់ធ្ងន់ធ្ងរ ដើម្បីធ្វើសេចក្តីរាយការណ៍ជូនប្រមុខរាជរដ្ឋាភិបាល »។
លោក ឡាំ សុជាតិ នាយកប្រតិបត្តិ វិទ្យាស្ថានតស៊ូមតិ និងគោលនយោបាយ (API) ថាការអនុវត្តកិច្ចការងារនៅក្រសួងអធិការកិច្ចគឺជារឿងសំខាន់ ដូច្នេះក្រសួងត្រូវមានតម្លាភាព។
លោកមានប្រសាសន៍ថា៖ « យើងមើលឃើញហើយថាតួនាទីរបស់ក្រសួង គឺធ្វើអធិការកិច្ចក្រសួងស្ថាប័នផ្សេងៗ នីតិវិធីបែបបទក្រសួងគឺមានអស់ហើយ ប៉ុន្តែគួរតែធ្វើដោយតម្លាភាព គាត់មើលឃើញថាក្រសួងណាមានបញ្ហាអ្វី ក្រសួងនោះត្រូវចាត់វិធានការកែលម្អធ្វើបែបណាខ្លះ?» ។
លោកកត់សម្គាល់ថាស្នាដៃ ឬលទ្ធផលរបស់ក្រសួងអធិការកិច្ច គឺមិនបានផ្សព្វផ្សាយឱ្យសាធារណជនដឹងឡើយ ហើយលោកស្នើឱ្យក្រសួងធ្វើការផ្សព្វផ្សាយអំពីការងាររបស់ខ្លួនឱ្យបានទូលំទូលាយផងដែរ។
លោកមានថ្លែងថា៖ « ឱ្យសាធារណជនដឹងថាក្រសួងអធិការកិច្ចកំពុងធ្វើការងារអ្វី មើលរកឃើញបញ្ហាអ្វីខ្លះ ហើយឱ្យសាធារណជនដឹងព័ត៌មានអំពីការងាររបស់ខ្លួនឯងដែរ ផ្សព្វផ្សាយការអប់រំច្បាប់ អនុវត្តច្បាប់ផ្សេងៗ របស់ក្រសួងផ្សេងៗ»៕