ព្រះមហាក្សត្របានចេញព្រះរាជក្រឹត្យរៀបចំនិងការប្រព្រឹត្តទៅនៃគណៈកម្មាធិការដឹកនាំការកែទម្រង់ប្រព័ន្ធយុត្តិធម៌ ដោយលោក កើត រិទ្ធ រដ្ឋមន្ត្រីក្រសួងយុត្តិធម៌ និងលោក ជីវ កេង ប្រធានតុលាការកំពូល ជាសហប្រធាន និងអនុប្រធានបួនរូប ព្រមទាំងមានសមាជិក១៩ផ្សេងទៀត។
ព្រះរាជក្រឹត្យនេះមានកម្រាស់ប្រាំពីរទំព័រត្រូវបានចុះប្រថាប់ព្រះរាជលញ្ជកររបស់ព្រះមហាក្សត្រ នរោត្តម សីហមុនី នៅថ្ងៃទី៣០ ខែធ្នូ ឆ្នាំ២០២៣។
ព្រះរាជក្រឹត្យបានបញ្ជាក់ថា៖ «គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ ដើម្បីជាយន្តការដឹកនាំ សម្របសម្រួល និងជំរុញការអនុវត្តការងារកំណែទម្រង់ប្រព័ន្ធយុត្តិធម៌ស្របតាមកម្មវិធីនយោបាយរបស់រដ្ឋាភិបាល ដែលសំដៅដល់ការពង្រឹងនិងការលើកកម្ពស់គោលការណ៍នីតិរដ្ឋ ព្រមទាំងគុណភាពនិងប្រសិទ្ធភាពប្រព័ន្ធយុត្តិធម៌នៅប្រទេសកម្ពុជា»។
គណៈកម្មាធិការដឹកនាំការកែទម្រង់ប្រព័ន្ធយុត្តិធម៌មានភារកិច្ចនិងតួនាទីដឹកនាំ គាំទ្រ សម្របសម្រួល និងជំរុញការអនុវត្តការងារកំណែទម្រង់ប្រព័ន្ធយុត្តិធម៌ និងលើសំណើជូនរដ្ឋាភិបាលពិនិត្យនិងសម្រេចលើផែនការយុទ្ធសាស្ត្រកំណែទម្រង់ប្រព័ន្ធយុត្តិធម៌។
មិនតែប៉ុណ្ណោះ ពួកគេមានតួនាទីនិងភារកិច្ចដាក់ចេញសេចក្ដីណែនាំនិងវិធានការចាំបាច់នានា ដើម្បីធានាប្រសិទ្ធភាពនិងស័ក្តិសិទ្ធិភាពនៃការអនុវត្តការងារកំណែទម្រង់ប្រព័ន្ធយុត្តិធម៌។ ពួកគេមានតួនាទីនិងភារកិច្ចពិនិត្យ វាយតម្លៃ និងផ្ដល់យោបល់លើសេចក្ដីព្រាងច្បាប់និងលិខិតបទដ្ឋានគតិយុត្តពាក់ព័ន្ធនឹងការងារកែទម្រង់ប្រព័ន្ធយុត្តធម៌។
ព្រះរាជក្រឹត្យនេះបានអនុញ្ញាតដល់គណៈកម្មាធិការដឹកនាំការកែទម្រង់ប្រព័ន្ធយុត្តិធម៌អញ្ជើញតំណាងក្រសួងស្ថាប័នពាក់ព័ន្ធ វិស័យឯកជន សង្គមស៊ីវិល ឬអ្នកជំនាញការជាតិនិងអន្តរជាតិចូលរួមប្រជុំតាមការចាំបាច់។
ព្រះរាជក្រឹត្យក៏បានអនុញ្ញាតសាលាជម្រះក្ដី និងអង្គការអយ្យអមសាលាជម្រះក្ដីគ្រប់លំដាប់ថ្នាក់ ព្រមទាំងស្ថាប័ន និងអង្គភាពដែលមានការពាក់ព័ន្ធនឹងការងារកែទម្រង់ប្រព័ន្ធយុត្តិធម៌បង្កើត «ក្រុមការងារកែទម្រង់ប្រព័ន្ធយុត្តិធម៌» មួយនៅក្នុងស្ថាប័ននិងអង្គភាពរបស់ខ្លួនតាមការចាំបាច់ ដើម្បីធានាប្រសិទ្ធភាពនិងស័ក្ដិសិទ្ធិភាពការងារកែទម្រង់ប្រព័ន្ធយុត្តិធម៌ស្របតាមព្រះរាជក្រឹត្យនេះ។
ព្រះរាជក្រឹត្យបានបញ្ជាក់ថា៖ «តួនាទី ភារកិច្ច និងសមាសភាពរបស់ក្រុមការងារកែទម្រង់ប្រព័ន្ធយុត្តិធម៌ត្រូវកំណត់ដោយសេចក្ដីសម្រេចរបស់ឧបនាយករដ្ឋមន្ត្រីរដ្ឋមន្ត្រីក្រសួងយុត្តិធម៌ ដែលជាសហប្រធានគណៈកម្មាធិការដឹកនាំការកែទម្រង់ប្រព័ន្ធយុត្តិធម៌ បន្ទាប់ពីបានពិគ្រោះយោបល់ជាមួយនឹងសហប្រធានគណៈកម្មាធិការដឹកនាំការកែទម្រង់ប្រព័ន្ធយុត្តិធម៌ ដែលជាប្រធានតុលាការកំពូល»។
លោក អំ សំអាត នាយកទទួលបន្ទុកចាត់ការទូទៅប្រចាំអង្គការសម្ព័ន្ធជំរឿនខ្មែរនិងការពារសិទ្ធិមនុស្សលីកាដូ យល់ឃើញថា នៅពេលណាគេនិយាយពីប្រព័ន្ធយុត្តិធម៌នៅកម្ពុជា គឺមានការរិះគន់ច្រើនពាក់ព័ន្ធប្រជាពលរដ្ឋដែលរងគ្រោះដោយបញ្ហាដីធ្លី និងបញ្ហាផ្សេងៗទៀតដែលពួកគេរងភាពអយុត្តិធម៌ ហើយមិនមានជំនឿជាក់ទៅលើប្រព័ន្ធយុត្តិធម៌។ នៅក្នុងនោះសូម្បីតែក្រុមប្រឹក្សាសិទ្ធិមនុស្សអង្គការសហប្រជាជាតិក៏តែងតែផ្ដល់អនុសាសន៍ ដើម្បីឱ្យកម្ពុជាធ្វើកំណែទម្រង់ប្រព័ន្ធតុលាការឱ្យទៅជាតុលាការឯករាជ្យ។
លោកប្រាប់ខ្មែរថាមស៍ថា គណៈកម្មាធិការដឹកនាំការកែទម្រង់ប្រព័ន្ធយុត្តិធម៌អាចព្រឹត្តទៅបាន និងមានប្រសិទ្ធភាពទាល់តែរដ្ឋាភិបាលមានឆន្ទៈនយោបាយក្នុងការកំណែទម្រង់ប្រព័ន្ធយុត្តិធម៌ទៅជាប្រព័ន្ធមួយដែលមានយុត្តិធម៌ មាននីតិរដ្ឋ និងមានការគោរពសិទ្ធិមនុស្ស ដែលមានជំនឿទុកចិត្តពីប្រជាពលរដ្ឋ។
លោកបានលើកឡើងថា ប្រសិនបើរដ្ឋាភិបាលគ្មានឆន្ទៈនិងឆន្ទៈនយោបាយដើម្បីកំណែទម្រង់ប្រព័ន្ធយុត្តិធម៌ឱ្យមានប្រសិទ្ធិភាពទេ ក៏ការរៀបចំគណៈកម្មាធិការដឹកនាំការកែទម្រង់ប្រព័ន្ធយុត្តិធម៌មិនអាចប្រព្រឹត្តទៅបានដែរ។
លោកបាននិយាយថា៖ «ការកំណែទម្រង់ប្រព័ន្ធយុត្តិធម៌អាចប្រព្រឹត្តទៅបានទាល់តែធ្វើកំណែទម្រង់ប្រព័ន្ធតុលាការទៅជាតុលាការឯករាជ ហើយនិងធ្វើកំណែទម្រង់ច្បាប់»។
លោកបន្ថែមថា ធាតុដ៏សំខាន់មួយទៀត គឺគប្បីប្រមូលធាតុផ្សំពីភាគីពាក់ព័ន្ធ ដូចជាអង្គការសង្គមស៊ីវិល អ្នកជំនាញការជាតិនិងអន្តរជាតិ ដើម្បីធ្វើកំណែទម្រង់ប្រព័ន្ធយុត្តិធម៌ប្រកបដោយប្រសិទ្ធភាព៕