ក្នុងឆ្នាំ២០២៤ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) បានអនុម័តថវិកាជិត ១ ៨០០លានដុល្លារ ទម្លាក់ឱ្យរដ្ឋបាលថ្នាក់ក្រោមជាតិ ដើម្បីអភិវឌ្ឍក្នុងមូលដ្ឋានទូទាំងប្រទេស។
ក្នុងសេចក្ដីប្រកាសព័ត៌មាន គ.ជ.អ.ប. កាលពីថ្ងៃពុធ បញ្ជាក់ថា ក្នុងកិច្ចប្រជុំលើកទី២២ អង្គប្រជុំបានឯកភាពឱ្យក្រសួង ស្ថាប័ន និងរដ្ឋបាលថ្នាក់ក្រោមជាតិត្រូវបន្តពង្រឹងភាពម្ចាស់ការ និងការទទួលខុសត្រូវលើការអនុវត្តផែនការសកម្មភាព និងថវិកាឆ្នាំ២០២៤ ឱ្យសម្រេចបានលទ្ធផលតាមការរំពឹងទុក។
ផែនការសកម្មភាព និងថវិកាឆ្នាំ២០២៤ របស់ គ.ជ.អ.ប. គឺជាផែនការឆ្នាំទី៤ នៃការអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យដំណាក់កាលទី២ ដែលបានផ្តោតលើការពង្រឹងរដ្ឋបាលថ្នាក់ក្រោមជាតិឱ្យកាន់តែមានភាពរឹងមាំ ស្អាតស្អំ មានសមត្ថភាព លទ្ធភាព និងការទទួលខុសត្រូវច្បាស់លាស់ក្នុងការអនុវត្តមុខងារដែលបានផ្ទេរទៅឱ្យរដ្ឋបាលថ្នាក់ក្រោមជាតិ។
ក្នុងនោះក៏មានការធ្វើទំនើបកម្មយន្តការនិងនីតិវិធីនៃការផ្តល់សេវាសាធារណៈ និងការអភិវឌ្ឍមូលដ្ឋាន ដើម្បីលើកកម្ពស់គុណភាព ប្រសិទ្ធភាព តម្លាភាព និងគណនេយ្យភាពក្នុងការផ្តល់សេវាសាធារណៈជូនប្រជាពលរដ្ឋឱ្យកាន់តែប្រសើរឡើង។
គ.ជ.អ.ប. បន្ថែមថា៖ «បន្ទាប់ពីពិនិត្យពិភាក្សា អង្គប្រជុំបានអនុម័តលើផែនការសកម្មភាព និងថវិកាឆ្នាំ២០២៤ របស់ គ.ជ.អ.ប. ដែលមានលទ្ធផលរំពឹងទុកចំនួន៣៤ សកម្មភាពជាអាទិភាពចំនួន៨៧ និងសូចនាករចំនួន១៣៩ ក្រោមថវិកាប៉ាន់ស្មានប្រមាណជិត ១.៨០០លានដុល្លារ»។
អង្គប្រជុំក៏បានពង្រឹងលើការគ្រប់គ្រងការវិនិយោគនៅរដ្ឋបាលរាជធានី ខេត្ត ដោយស្នើថ្នាក់ជាតិ ពន្លឿនផ្ទេរសិទ្ធិអំណាចទៅឱ្យមន្ទីរអង្គភាពខ្សែបណ្ដោយរបស់ខ្លួន ដើម្បីធ្វើជាសេនាធិការឱ្យអនុគណៈកម្មាធិការវិនិយោគនៅរដ្ឋបាលរាជធានី ខេត្ត សម្រាប់ពិនិត្យ និងសម្រេចលើគម្រោងវិនិយោគដែលមានទុនសមមូល ៥លានដុល្លារ ចុះក្រោមយ៉ាងយូរត្រឹមត្រីមាសទី១ នៃឆ្នាំ២០២៤។
គ.ជ.អ.ប. បន្ថែមថា អង្គប្រជុំក៏បានជំរុញឱ្យពង្រីកវិសាលភាពនៃការអនុវត្តជាបន្តបន្ទាប់គ្របដណ្តប់ទាំងថ្នាក់ឃុំ សង្កាត់ និងក្រុង ស្រុក ខណ្ឌ ដើម្បីពង្រឹងការប្រាស្រ័យទាក់ទងរវាងរដ្ឋបាលថ្នាក់ក្រោមជាតិ ជាមួយប្រជាពលរដ្ឋ និងជំរុញការចូលរួមរបស់ប្រជាពលរដ្ឋក្នុងការតាមដាន ត្រួតពិនិត្យ និងការផ្តល់យោបល់សម្រាប់កែលម្អលើការបំពេញការងារ និងការផ្តល់សេវានៅតាមមូលដ្ឋាន។
គ.ជ.អ.ប. សម្រេចពន្លឿនការផ្ទេរធនធានហិរញ្ញវត្ថុទៅឱ្យរដ្ឋបាលក្រុង ស្រុក ខណ្ឌ ដើម្បីឱ្យរដ្ឋបាលក្រុង ស្រុក ខណ្ឌ មានលទ្ធភាពអនុវត្តមុខងារតាមវិស័យនានាដែលបានផ្ទេរឱ្យ។
លោក ង៉ាន់ ចំរើន រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានឱ្យដឹងថា ក្នុងថវិកាជាតិដែលគ្រោងនឹងស្នើទៅថ្នាក់ដឹកនាំរដ្ឋាភិបាល ដើម្បីពិនិត្យសម្រេចលើថវិកាជាតិប្រមាណជិត ១៨០០ដុល្លារ ដែលមានការកើនឡើងចំនួន ២០% នៃថវិកាជាតិសរុប ដែលត្រូវទម្លាក់ពីថ្នាក់ជាតិទៅឱ្យរដ្ឋបាលថ្នាក់ក្រោមជាតិ។
លោកបន្ថែមថា ក្នុងចំណោមចំនួនថវិកាខាងលើនេះ នឹងបែងចែងទៅឱ្យរដ្ឋបាលថ្នាក់រាជធានី ខេត្ត គឺមានជាង ៧០០លានដុល្លារ ហើយសម្រាប់រដ្ឋបាលថ្នាក់ក្រុង ស្រុក ខណ្ឌ ជាង ៧៣០លានដុល្លារ និងជាង ៣០០លានដុល្លា សម្រាប់ទម្លាក់ទៅឱ្យរដ្ឋបាលថ្នាក់ ឃុំ សង្កាត់។
លោក ង៉ាន់ ចំរើន បញ្ជាក់ថា ថវិកាពីថ្នាក់ជាតិ ទម្លាក់ទៅថ្នាក់ក្រោមជាតិនេះ ដើម្បីអនុវត្តផែនការសកម្មភាពដែលរដ្ឋបាលថ្នាក់ជាតិបានផ្ទេរទៅឱ្យ ជាពិសេសពង្រឹងប្រសិទ្ធភាពការងារផ្តល់សេវាសាធារណៈជូនពលរដ្ឋឱ្យកាន់តែប្រសើរ ស្អាតស្អំ និងបង្កើនការអភិវឌ្ឍផ្លូវ ថ្នល់ និងសំណង់ដេក និងសំណង់បញ្ឈរ ជាច្រើនទៀតនៅតាមឃុំ សង្កាត់។
លោកបន្ថែមថា មូលហេតុដែលរដ្ឋាភិបាលបង្កើនថវិកាជាតិរហូតដល់ ២០% ទៅឱ្យរដ្ឋបាលថ្នាក់ក្រោមជាតិ ដោយសារក្នុងឆ្នាំ២០២៤ ក្រសួងអប់រំ យុវជន និងកីឡា បានផ្ទេរមុខងារការងារគ្រប់គ្រងសាលាបឋមសិក្សា និងគ្រូបង្រៀនប្រមាណ ៦ម៉ឺននាក់ ឱ្យទៅរដ្ឋបាលថ្នាក់ក្រោមជាតិជាអ្នកគ្រប់គ្រង។
លោក ឡាំ សុជាតិ នាយកប្រតិបត្តិវិទ្យាស្ថានតស៊ូមតិ និងគោលនយោបាយ (API) ប្រាប់ខ្មែរថាមស៍ ដូច្នេះថា ការផ្ទេរសិទ្ធិអំណាចពីថ្នាក់ជាតិ ទៅថ្នាក់ក្រោមជាតិ ជាពិសេសការបង្កើនថវិកា បង្កើនចំនួនមន្ត្រី បង្កើនធនធានមនុស្ស និងសិទ្ធិអំណាចទៅថ្នាក់ក្រោមជាតិ កម្ពុជាបានអនុវត្តជាបន្តបន្ទាប់ពីមួយឆ្នាំទៅមួយឆ្នាំ ប៉ុន្តែមិនទាន់ដល់កម្រិតផ្ទេរបានច្រើននៅឡើយ។
លោកបន្ថែមថា បច្ចុប្បន្នកំណែទម្រង់វិមជ្ឈការ មិនទាន់សម្រេចដល់គោលដៅផ្ទេរសិទ្ធិអំណាច តួនាទី ភារកិច្ច ឱ្យទៅថ្នាក់ក្រោមជាតិ ដើម្បីដោះស្រាយបញ្ហាឱ្យបានច្រើននៅឡើយ ប៉ុន្តែមានការរីកចម្រើនទៅមុខយឺតៗ។
លោកបញ្ជាក់ថា៖ «ការងារនេះ រដ្ឋាភិបាលមិនអាចធ្វើតែឯងបានទេ ព្រោះការធ្វើវិមជ្ឈការនៅថ្នាក់ក្រោមជាតិទាមទារការចូលរួមពីភាគីពាក់ព័ន្ធ ជាពិសេសអង្គការសង្គមស៊ីវិល វិស័យឯកជន និងរដ្ឋបាលថ្នាក់ក្រោមជាតិ»។
លោក ឡាំ សុជាតិ បន្ថែមថា ការងារវិជ្ឈមការ គឺជាការផ្ទេរសិទ្ធិអំណាចឱ្យភាគីពាក់ព័ន្ធនៅថ្នាក់ក្រោមជាតិ ដើម្បីដោះស្រាយបញ្ហា និងឆ្លើយតបទៅនឹងតម្រូវការរបស់ប្រជាពលរដ្ឋឱ្យបានឆាប់រហ័ស ងាយស្រួល និងកាន់តែបង្ខិតទៅជិតប្រជាពលរដ្ឋ ដូច្នេះទាល់តែមានការចូលរួមពីគ្រប់ភាគីពាក់ព័ន្ធទើបការងារមានប្រសិទ្ធភាព៕
Related Posts
- June 27, 2023
- July 3, 2023
- June 8, 2023
- June 3, 2023
