ក្រុមហ៊ុនដឹកអ្នកដំណើរឬក្រុមហ៊ុនរថយន្តក្រុងចំនួន ៣៧ត្រូវបានក្រសួងជំនាញបញ្ចប់សុពលភាពដោយសារតែពួកគេមិនបានស្នើសុំបន្តសុពលភាពលិខិតអនុញ្ញាតអាជីវកម្មលើសរយៈពេលពីរឆ្នាំ។
ការប្រកាសបញ្ចប់សុពលអាជ្ញាបណ្ណក្រុមហ៊ុនទាំងនេះត្រូវបានក្រសួងសាធារណការនិងដឹកជញ្ជូនធ្វើសេចក្ដីប្រកាសកាលពីថ្ងៃព្រហស្បតិ៍សប្ដាហ៍មុន បន្ទាប់ពីក្រសួងរកឃើញថា ក្រុមហ៊ុនទាំង៣៧នោះមិនបានស្នើសុំបន្តសុពលភាពលិខិតអនុញ្ញាតលើសរយៈពេលពីរឆ្នាំមកហើយ។
ក្រសួងសាធារណការនិងដឹកជញ្ជូន បានព្រមានថា៖ «ក្នុងករណី នៅតែបន្តធ្វើសកម្មភាពអាជីវកម្មដោយគ្មានលិខិតអនុញ្ញាត ម្ចាស់ក្រុមហ៊ុនត្រូវប្រឈមចំពោះមុខច្បាប់ជាធរមាន»។
ក្រសួងជំនាញបានបញ្ជាក់ថា ក្រុមហ៊ុនទាំងនោះរួមមាន ស៊ីអេធីខេមបូឌាអេស៊ាត្រាវែល, ខេ អេស អូ ត្រេនស្ព័ត, វុឌ្ឍន៍ សុភាព ត្រេនស្ព័ត, ផានអ្វីម៉ិច, ថោង ស៊ីង ស៊ីង ឌីវេឡុបម៉ិន ហូលឌីង, ពន្លឺអង្គរខ្មែរដឹកជញ្ជូន, លាំង យូអេស អិចប្រេស, (កម្ពុជា) អង្គរ ខូអិលធីឌី, អង្គរមង្គលមានជ័យ, ខេមបូត្រា អិចប្រេស, ហ្គោលដេនបាយ័ន អិចប្រេស, ប្លូបីស ត្រេនស្ព័ត, អេ ស៊ា វិន អីឡាយអិន, ប្រេនស៊ីបខា, ថេរ៉ូ អិចប្រេស, រិទ្ធី&រកូខូអិល
ធីឌី (Red Taxi), កាស៊ីម៉ិចខមអិលធីឌី, មានជ័យ វី អាយ ភី អិចប្រេស ឯ.ក, ប្រេស៊ីដេន អិនធើណេសិនណល អិចប្រេស ឯ.ក, រ៉ូយ៉ាល់ខេមបូឌានលីម៉ូស៊ិន សឺវីសខូអិលធីឌី។
ក្រុមហ៊ុនរថយន្តក្រុងផ្សេងទៀតរួមមាន រស្មីភ្នំពេញ អិចប្រេស ដឹកអ្នកដំណើរ, យេលឡូវ ស្ពាន អិចប្រេស ឯ.ក, គ្រីស្តាល់ អិចប្រេស, អ៊ូប៊ើរ ថេកណឡជី (ខេមបូឌា) ឯ.ក, ម៉ៅ សេម អេនធើប្រាយ អេន អីផត អិចផត, ខេម ហ្គោ ឯ.ក, នុត បូរី ដឹកអ្នកដំណើរ, សណ្តាប់ ឯ.ក, ចិន្តាសុវណ្ណ ត្រេនស្ព័ត ឯ.ក, ប៊ីហ្សនេស វីអាភី បាស ស្វេសិន ឯ.ក, ភួងហេងខូអិលធីឌី, អអេសរស្មីសៀមរាបត្រេន ស្ព័ត, សាលី អិចប្រេស ឯ.ក, វ៉ាង វ៉ិច, ជ្ជី អេស
ធី (ហ្គោលដែនសេ្តល ត្រង់ស្ទ័រត៍) ឡារីតា អិចប្រេស ឯ.ក, និង សេ.អាន (ខេមបូឌា) អ៊ិនវេសម៉ិន ឌីវេឡុបម៉ិន ឯ.ក។
លោក ហ៊ាង សុទ្ធាយុត្តិ អគ្គនាយកបច្ចេកទេសនិងទំនាក់ទំនងសាធារណៈមិនអាចស្នើសុំបញ្ជាក់បន្ថែមបានទេពីម្សិលមិញ។
ខ្មែរថាមស៍បានរកឃើញក្រុមហ៊ុនមួយចំនួនក្នុងចំណោមក្រុមហ៊ុនរថយន្តក្រុងទាំងនោះកំពុងផ្សព្វផ្សាយពីការធ្វើអាជីវកម្មដឹកនាំអ្នកដំណើរក្នុងទិសដៅពីភ្នំពេញទៅមកខេត្តសៀមរាប និងទិសដៅពីភ្នំពេញទៅមកខេត្តព្រះសីហនុនៅលើទំព័រហ្វេសប៊ុករបស់ខ្លួន។
បុគ្គលិកផ្នែកកក់សំបុត្រម្នាក់របស់ក្រុមហ៊ុន ឡារីតា អិចប្រេស ឯ.ក បានបដិសេធធ្វើអត្ថាធិប្បាយចំពោះបញ្ហានេះ ដោយគាត់បានលើកឡើងថា៖ «ខ្ញុំមិនអាចនិយាយបានទេ ព្រោះខ្ញុំជាបុគ្គលិកផ្នែកកក់សំបុត្រ»។
លោក ឆឹម ចំណាន ប្រធានសមាគមដឹកជញ្ជូនអ្នកដំណើរផ្លូវគោកកម្ពុជាសម្ដែងការគាំទ្រចំពោះក្រសួងសាធារណការនិងដឹកជញ្ជូនបានបញ្ចប់សុពលភាពលិខិតអនុញ្ញាតអាជីវកម្មក្រុមហ៊ុនរថយន្តក្រុងដឹកអ្នកដំណើរដែលពួកគេមិនបានស្នើសុំបន្ត។
លោកបានបញ្ជាក់ថា មានពីរទៅបីក្រុមហ៊ុននឹងចាប់ផ្ដើមបន្តសុពលភាពអាជ្ញាបណ្ណរបស់ខ្លួនឡើងវិញនៅសប្ដាហ៍ក្រោយនេះ ខណៈក្រុមហ៊ុនផ្សេងទៀតបានបោះបង់ការធ្វើអាជីវកម្មរបស់ខ្លួនជាច្រើនឆ្នាំមកហើយដោយមិនបានជូនដំណឹងមកកាន់ក្រសួងទេ។
លោកបាននិយាយថា៖ «ក្រុមហ៊ុនដឹកអ្នកដំណើរដែលចុះបញ្ជីត្រឹមត្រូវបានជួបប្រទះបញ្ហាជាច្រើន ជាពិសេសដោយសារច្បាប់យើងធូររលុងបានធ្វើឱ្យអ្នកធ្វើអាជីវកម្មក្រៅច្បាប់ មិនបានចុះបញ្ជីជិត១០០ក្រុមហ៊ុន»។
លោករកឃើញថា ពួកគេធ្វើអាជីវកម្មដោយក្រោមឈ្មោះក្រុមហ៊ុន ប៉ុន្តែពួកគេមិនបានចុះបញ្ជីត្រឹមត្រូវតាមច្បាប់ឡើយ។ បញ្ហានេះធ្វើឱ្យក្រុមហ៊ុនដែលបានចុះបញ្ជីត្រឹមត្រូវបែរជាដើរក្រោយ ឬមិនអាចប្រកួតប្រជែងជាមួយនឹងពួកគេបាន។
លោកបន្ថែមថា បញ្ហានេះត្រូវបានខាងសមាគមរបសលោកកំពុងធ្វើការក្រសួងស្ថាប័នពាក់ព័ន្ធ ហើយនឹងអាចមានវិធានការក្នុងពេលឆាប់ៗខាងមុខ ដើម្បីឱ្យពួកគេចុះបញ្ជីត្រឹមត្រូវច្បាប់ បង់ពន្ធចូលរដ្ឋ ហើយក៏ជាការប្រកួតប្រជែងស្មើភាពគ្នាចំពោះមុខច្បាប់ផងដែរ។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានលើកឡើងថា ការបញ្ចប់សុពលភាពអាជ្ញាបណ្ណក្រុមហ៊ុនរថយន្តក្រុងពីសំណាក់ក្រសួងជំនាញ គឺធ្វើឡើងត្រឹមត្រូវតាមនីតិច្បាប់។
លោកថា ការចុះបញ្ជីនៅក្រសួងជាយន្តការមួយ ដើម្បីឱ្យក្រុមហ៊ុនរថយន្តក្រុងដើរតាមបន្ទាត់ច្បាប់របស់ប្រទេស ហើយរដ្ឋាភិបាលត្រូវតែជំរុញក្រុមហ៊ុនចុះបញ្ជីត្រឹមត្រូវតាមច្បាប់ ដើម្បីរដ្ឋមានឱកាសប្រមូលពន្ធពីក្រុមហ៊ុនសម្រាប់ផ្គត់ផ្គង់សេដ្ឋកិច្ចជាតិ។
លោកថា៖ «ការបញ្ចប់សុពលភាពរថយន្តក្រុងមិនសូវជាប៉ះពាល់ខ្លាំងទេ ប៉ុន្តែសម្រាប់រថយន្តក្រុងដឹកនាំដំណើរវិស័យឯកជនទាំងអស់ត្រូវចុះបញ្ជី ដើម្បីឱ្យមានការគ្រប់គ្រងច្បាស់ពីរដ្ឋ»។
លោកមើលឃើញទិដ្ឋភាពបីចំពោះក្រុមហ៊ុនរថយន្តក្រុងដឹកអ្នកដំណើរដែលបញ្ចប់សុពលភាពអាជ្ញាបណ្ណ ប៉ុន្តែនៅតែធ្វើសកម្មភាពអាជីវកម្មរបស់ខ្លួន គឺអាចមកពីការឃុបឃិតជាមួយមន្ត្រីពុករលួយ ឬមានអ្នកមានអំណាចកាងពីក្រោយ ឬក៏ក្រុមហ៊ុនរថយន្តក្រុងដឹកអ្នកដំណើរនោះមានភាគហ៊ុនជាមួយមន្ត្រីមានអំណាច៕
Related Posts
- September 5, 2023
- January 20, 2023
- January 9, 2024
- September 19, 2023
