វេទិកាធុរកិច្ចដែលគ្រោងនឹងធ្វើឡើងនៅថ្ងៃអង្គារនៅទីក្រុងគូឡាឡាំពួ ប្រទេសម៉ាឡេស៊ី ត្រូវបានគេរំពឹងថានឹងត្រួសត្រាយផ្លូវដើម្បីបង្កើនកិច្ចសហប្រតិបត្តិការទ្វេភាគីលើវិស័យពាណិជ្ជកម្ម ការវិនិយោគ និងសេដ្ឋកិច្ចរវាងកម្ពុជា និងម៉ាឡេស៊ី។
រៀបចំដោយសភាពាណិជ្ជកម្មកម្ពុជា សភាធុរកិច្ចម៉ាឡេស៊ីនៅកម្ពុជា និងសភាពាណិជ្ជកម្ម និងឧស្សាហកម្មជាតិម៉ាឡេស៊ី វេទិកាធុរកិច្ចនឹងប្រព្រឹត្តទៅក្នុងឱកាសនៃដំណើរទស្សនកិច្ចផ្លូវការរបស់ឯកឧត្តមបណ្ឌិតនាយករដ្ឋមន្ត្រី ហ៊ុន ម៉ាណែត ទៅកាន់ប្រទេសម៉ាឡេស៊ី នៅថ្ងៃទី២៧ ខែកុម្ភៈ។
ឯកឧត្តមបណ្ឌិត ហ៊ុន ម៉ាណែត នឹងថ្លែងសុន្ទរកថាគន្លឹះ និងធ្វើជាអធិបតីក្នុងពិធីចុះហត្ថលេខាលើអនុស្សរណៈស្តីពីកិច្ចសហប្រតិបត្តិការពាណិជ្ជកម្មរវាងសភាពាណិជ្ជកម្មនៃប្រទេសទាំងពីរ។
លោក លឹម ហេង អនុប្រធានសភាពាណិជ្ជកម្មកម្ពុជាបាននិយាយថា វេទិកាធុរកិច្ច គឺជាព្រឹត្តិការណ៍ដ៏សំខាន់មួយ ដើម្បីលើកកម្ពស់ និងទាក់ទាញការវិនិយោគពីប្រទេសម៉ាឡេស៊ី មកកាន់ប្រទេសកម្ពុជា។
លោកបានបន្តថា មានការវិនិយោគរបស់ម៉ាឡេស៊ីជាច្រើននៅក្នុងប្រទេសកម្ពុជា ខណៈដែលប្រទេសទាំងពីរកំពុងសហការសម្រួលនីតិវិធីដើម្បីបង្កើនសកម្មភាពពាណិជ្ជកម្ម និងទាក់ទាញការវិនិយោគទៅវិញទៅមក ដោយលោកបានលើកឡើងថា ម៉ាឡេស៊ីគឺជាអ្នកវិនិយោគបរទេសដ៏សំខាន់នៅកម្ពុជាក្នុងវិស័យអចលនទ្រព្យ រោងចក្រកាត់ដេរ និងកែច្នៃរុក្ខជាតិ។
លោកបន្ថែមថា “វេទិកានេះនឹងផ្តល់ឱកាសកាន់តែច្រើនដល់ភាគីទាំងសងខាងដើម្បីពិភាក្សាពង្រឹងកិច្ចសហប្រតិបត្តិការលើវិស័យពាណិជ្ជកម្ម និងការវិនិយោគ និងវិស័យផ្សេងៗទៀត ជាពិសេសកម្ពុជាឆ្លៀតយកឱកាសនេះដើម្បីផ្សព្វផ្សាយច្បាប់ស្តីពីការវិនិយោគ និងកិច្ចព្រមព្រៀងពាណិជ្ជកម្ម ដើម្បីទាក់ទាញអ្នកវិនិយោគ”។
លោកបានលើកឡើងទៀតថា មានក្តីសង្ឃឹមខ្ពស់ក្នុងការទាក់ទាញអ្នកវិនិយោគម៉ាឡេស៊ីកាន់តែច្រើនមកកម្ពុជាត្រូវបន្ទាប់ពីការៀបចំនៃវេទិកានេះ។
នៅក្នុងអំឡុងពេលចូលរួមនៃវេទិកានេះ សភាពាណិជ្ជកម្មកម្ពុជានឹងចុះហត្ថលេខាលើអនុស្សរណៈយោគយល់គ្នាចំនួនពីរ រវាងសភាពាណិជ្ជកម្មម៉ាឡេស៊ីនៅកម្ពុជា និងសភាពាណិជ្ជកម្ម និងឧស្សាហកម្មជាតិនៃប្រទេសម៉ាឡេស៊ី។
ឯកឧត្តមបណ្ឌិតនាយករដ្ឋមន្ត្រី ហ៊ុន ម៉ាណែត នឹងអញ្ជើញទៅបំពេញទស្សនកិច្ចផ្លូវការរយៈពេលមួយថ្ងៃនៅប្រទេសម៉ាឡេស៊ី ដែលគ្រោងនឹងជួបលោក Anwar Ibrahim នាយករដ្ឋមន្រ្តីម៉ាឡេស៊ីដើម្បីពិភាក្សាអំពីការពង្រឹងកិច្ចសហប្រតិបត្តិការក្នុងវិស័យអាទិភាព ជាពិសេសទំនាក់ទំនងពាណិជ្ជកម្ម និងសេដ្ឋកិច្ច។
ក្នុងចំណោមថ្នាក់ដឹកនាំដែលអមដំណើរនាយករដ្ឋមន្ត្រីមានលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោកសុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ រួមជាមួយទេសរដ្ឋមន្ត្រី រដ្ឋមន្ត្រី មន្ត្រីរដ្ឋាភិបាល និងថ្នាក់ដឹកនាំធុរកិច្ចមកពីសភាពាណិជ្ជកម្មកម្ពុជា។
នាយករដ្ឋមន្រ្តីទាំងពីរនឹងធ្វើជាអធិបតីក្នុងពិធីចុះហត្ថលេខាលើអនុស្សរណៈយោគយល់គ្នារវាងធនាគារជាតិនៃកម្ពុជា និងធនាគារ Negara Malaysia ស្តីពីកិច្ចសហប្រតិបត្តិការលើវិស័យនវានុវត្តន៍ហិរញ្ញវត្ថុ និងប្រព័ន្ធទូទាត់។
ផលិតផលសំខាន់ៗដែលកម្ពុជានាំចេញទៅកាន់ប្រទេសម៉ាឡេស៊ីមានដូចជា ក្រណាត់ អង្ករ និងផលិតផលឧស្សាហកម្ម ខណៈដែលទំនិញដែលកម្ពុជានាំចូលពីប្រទេសម៉ាឡេស៊ីមាន គ្រឿងបន្លាស់រថយន្ត អាហារ និងភេសជ្ជៈ និងឧបករណ៍អេឡិចត្រូនិក។
របាយការណ៍របស់អគ្គនាយកដ្ឋានគយ និងរដ្ឋាករបានបង្ហាញថា ពាណិជ្ជកម្មទ្វេភាគីរវាងប្រទេសទាំងពីរមានចំនួន ៦៣២ លានដុល្លារក្នុងឆ្នាំ២០២៣ កើនឡើង ១,៩ ភាគរយធៀបនឹងឆ្នាំមុន ខណៈដែលទំហំទឹកប្រាក់ដែលកម្ពុជានាំចេញទំនិញទៅប្រទេសម៉ាឡេស៊ីមានត្រឹមតែ ១០៥ លានដុល្លារប៉ុណ្ណោះ ធ្លាក់ចុះ ៦,១ ភាគរយ។