លោក សុខ សូកេន រដ្ឋមន្ត្រីក្រសួងទេសចរណ៍កម្ពុជា បានដឹកនាំគណៈប្រតិភូចូលរួមវេទិកាទេសចរណ៍អាស៊ានឆ្នាំ២០២៤ កិច្ចប្រជុំរដ្ឋមន្ត្រីទេសចរណ៍អាស៊ានលើកទី២៧ និងកិច្ចប្រជុំពាក់ព័ន្ធ តបតាមការអញ្ជើញរបស់រដ្ឋមន្ត្រីក្រសួងព័ត៌មាន វប្បធម៌ និងទេសចរណ៍ នៃសាធារណរដ្ឋប្រជាមានិតឡាវ លោកស្រី សួនសាវ៉ាន់ វីណាខេត(Suanesavanh Vignaket) ចាប់ពីថ្ងៃទី២៣ ដល់ថ្ងៃទី២៧ ខែមករា ឆ្នាំ២០២៤ នៅទីក្រុងវៀងច័ន្ទ សាធារណរដ្ឋប្រជាធិបតេយ្យប្រជាមានិតឡាវ។
ក្នុងឱកាសនោះ លោក សុខ សូកេន នឹងចូលរួមកិច្ចប្រជុំរដ្ឋមន្ត្រីទេសចរណ៍អាស៊ានលើកទី២៧ កិច្ចប្រជុំរដ្ឋមន្ត្រីទេសចរណ៍អាស៊ានបូកបី កិច្ចប្រជុំរដ្ឋមន្ត្រីទេសចរណ៍អាស៊ាន-ឥណ្ឌា និងកិច្ចប្រជុំជាមួយបណ្តាប្រទេស និងអង្គការពាក់ព័ន្ធនានា។
លោករដ្ឋមន្ត្រីក៏នឹងឆ្លៀតឱកាសជួបពិភាក្សាទ្វេភាគីជាមួយបណ្តាប្រទេសសមាជិកអាស៊ាននីមួយៗ និងអង្គការដៃគូនានា ដើម្បីពង្រឹងកិច្ចសហប្រតិបត្តិការក្នុងការអភិវឌ្ឍវិស័យទេសចរណ៍អាស៊ាន និងកម្ពុជា។
វេទិកាទេសចរណ៍អាស៊ានឆ្នាំ២០២៤ ត្រូវបានរៀបចំឡើងក្រោមមូលបទ ” អាស៊ានដែលមានគុណភាពនិងប្រកបដោយការទទួលខុសត្រូវ-អនាគតអាស៊ានប្រកបដោយចីរភាព” ដែលមានការចូលរួមដោយរដ្ឋមន្ត្រីទេសចរណ៍ និងថ្នាក់ដឹកនាំមកពីបណ្តាប្រទេសសមាជិកអាស៊ាន ចិន ជប៉ុន សាធារណរដ្ឋកូរ៉េ ឥណ្ឌា និងបណ្តាប្រទេស និងអង្គការដៃគូផ្សេងទៀត។
នៅថ្ងៃទី២៤ ខែមករា ឆ្នាំ២០២៤ លោក សុខ សូកេន បានជួបជាមួយលោកស្រី លីស្ស អូទីហ្គេរ៉ា (Liz Ortiguera) នាយកគ្រប់គ្រងនៃក្រុមហ៊ុនធ្វើដំណើរ និងទេសចរណ៍ពិភពលោក អាស៊ី-ប៉ាស៊ីហ្វិក (WTTC) ដើម្បីពិភាក្សាអំពីឱកាសដែលមានសក្តានុពលសម្រាប់កិច្ចសហប្រតិបត្តិការ ក្នុងការលើកកម្ពស់ការអភិវឌ្ឍវិស័យទេសចរណ៍ប្រកបដោយចីរភាព និងធន់។
ក្នុងជំនួបនោះ លោក សុខ សូកេន និងលោកស្រី លីស្ស អូទីហ្គេរ៉ា បានផ្លាស់ប្តូរទស្សនៈដ៏មានតម្លៃទៅវិញទៅមក និងបានប្តេជ្ញាចិត្តរួមគ្នាក្នុងការជំរុញកិច្ចសហប្រតិបត្តិការ ដើម្បីលើកកម្ពស់ការអភិវឌ្ឍវិស័យទេសចរណ៍នៅកម្ពុជា។
លើសពីនេះ ក្រសួងទេសចរណ៍ ដោយមានកិច្ចសហការជាមួយវិស័យឯកជន នឹងចូលរួមក្នុងកម្មវិធីផ្លាស់ប្តូរការធ្វើដំណើរ (TRAVEX) ដែលរំពឹងថានឹងមានអ្នកចូលរួមចំនួន ៧៥០ នាក់ ប្រព័ន្ធផ្សព្វផ្សាយចំនួន ៥០ ស្តង់ ២០០ នាក់ អ្នកលក់ ២០០ នាក់ និងអ្នកទិញ ២០០ នាក់។
ខ្មែរថាមស៍