រដ្ឋសភាកម្ពុជា បានបន្តបោះឆ្នោតផ្ដល់សេចក្ដីទុកចិត្តសមាសភាពថ្នាក់ដឹកនាំគណៈកម្មាធិការជាតិរៀបចំការបោះឆ្នោត (គ.ជ.ប) សម្រាប់អាណត្តិថ្មីចំនួន ៩រូប ដើម្បីធ្វើផែនការ រៀបចំ និងចាត់ចែងការបោះឆ្នោតថ្នាក់ជាតិ និងក្រោមជាតិ គ្រប់សម័យកាលក្នុងអាណត្តិនីមួយៗនៅទូទាំងប្រទេស។
ការបោះឆ្នោតផ្ដល់សេចក្ដីទុកចិត្តសម្រាប់សមាសភាព គ.ជ.ប ជាផ្លូវការខាងលើនេះ ធ្វើឡើងក្នុងសម័យប្រជុំរដ្ឋពេញអង្គ លើកទី១ នីតិកាលទី៧ ដោយទទួលបានការឯកភាពចំនួន ១០១សំឡេង នៃសមាជិករដ្ឋសភាទាំងមូលកាលពីម្សិលមិញ។
កាលពីម្សិលមិញ អគ្គលេខាធិការដ្ឋានរដ្ឋសភា ប្រកាសព័ត៌មានថា ថ្នាក់ដឹកនាំ គ.ជ.ប អាណត្តិថ្មីទាំង ៩រូប អង្គប្រជុំរដ្ឋសភាបានបោះឆ្នោតទុកចិត្តលោក ប្រាជ្ញ ចន្ទ ជាប្រធាន និងលោក ជឺ ចំណាន ជាអនុប្រធាន។
ដោយឡែកសមាសភាពជាសមាជិក គ.ជ.ប ចំនួន ៧រូបផ្សេងទៀត រដ្ឋសភាបានបោះឆ្នោតទុកចិត្តលោក មាន សទិ លោក ឌឹម សុវណ្ណារុំ លោក សោម សូរីដា លោក ហេង ស៊ីឡេង លោក យិច សមិទ្ធិ លោក ហ៊ែល សារ៉ាត់ និងលោក ហង្ស ពុទ្ធា។
អគ្គលេខាធិការបញ្ជាក់ថា សមាសភាពថ្នាក់ដឹកនាំ គ.ជ.ប ទាំង ៩រូបខាងលើនេះ ត្រូវធ្វើសច្ចាប្រណិធាននៅព្រះបរមរាជវំាងជាមុនសិន មុននឹងចូលកាន់តំណែងជាផ្លូវការ ដើម្បីធ្វើផែនការរៀបចំ និងចាត់ចែងការបោះឆ្នោតនៅទូទាំងប្រទេសក្រោមបាវចនា ឯករាជ្យ អព្យាក្រឹត្យ សច្ចៈ យុត្តិធម៌ និងតម្លាភាព។
កាសែតខ្មែរថាមស៍ ពុំអាចសុំការបញ្ជាក់បន្ថែមពីអ្នកនាំពាក្យរដ្ឋសភា លោក ឡេង ប៉េងឡុង បានឡើយកាលពីម្សិលមិញ។
លោក អៀ ថារ៉ាឌី ប្រធាននាយកដ្ឋានគ្រប់គ្រងបុគ្គលិក នៃអគ្គលេខាធិការដ្ឋានរដ្ឋសភា ធ្លាប់លើកឡើងថា ការជ្រើសសមាជិក គ.ជ.ប សម្រាប់អាណត្តិថ្មីនេះ គឺជាការចប់អាណត្តិសមាសភាព គ.ជ.ប ចាស់ ដែលមានចំនួន ៩រូប ដូច្នេះ ត្រូវជ្រើសបំពេញសមាសភាពថ្នាក់ដឹកនាំថ្មីឡើងវិញ។
លោកបន្ថែមថា ការជ្រើសរើសសមាសភាពសម្រាប់អាណត្តិថ្មីនេះ គឺធ្វើឡើងស្របតាមច្បាប់ស្ដីពី ការរៀបចំ និងប្រព្រឹត្តទៅនៃ គ.ជ.ប និងសម្រេចដោយគណៈកម្មាធិការអចិន្ត្រៃយ៍រដ្ឋសភា។
លោកបន្តថា ក្រៅពីមន្ត្រីគណបក្សនយោបាយដែលមានសំឡេងក្នុងរដ្ឋសភា បុគ្គលឯករាជ្យ ក៏មានសិទ្ធិដាក់ពាក្យសុំឈរឈ្មោះជាបេក្ខជនបានដែរ ដើម្បីឱ្យគណៈកម្មការពិនិត្យអំពីលក្ខណសម្បត្តិគ្រប់គ្រាន់បញ្ជូនទៅថ្នាក់ដឹកនាំឯកភាពបន្ត។
លោក គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រីទទួលបន្ទុកកិច្ចការទូទៅអមក្រសួងព្រះបរមរាជវាំង បានឱ្យដឹងថា ក្រសួងព្រះបរមរាជវាំង បានរៀបចំពិធីសច្ចាប្រណិធានជូនប្រធាន អនុប្រធាន និងសមាជិក គ.ជ.ប សរុបទាំង៩ រូប កាលពីម្សិលមិញ ចាប់ពីម៉ោង ១៦:០០នាទីរសៀល នៅព្រះបរមរាជវាំង។
កាលពីម្សិលមិញ អគ្គលេខាធិការដ្ឋាន នៃគណៈកម្មាធិការជាតិរៀបចំការបោះឆ្នោត ចេញសេចក្ដីជូនដំណឹងថា គ.ជ.ប នឹងរៀបចំពិធីប្រកាសចូលកាន់តំណែង ប្រធាន អនុប្រធាន និងសមាជិក សម្រាប់អាណត្តិថ្មីនេះ នៅថ្ងៃព្រហស្បតិ៍ ចាប់ពីម៉ោង ៨:០០ព្រឹក នៅទីស្តីការ គ.ជ.ប។
លោក សោម សូរីដា អគ្គលេខាធិការរងនៃ គ.ជ.ប លើកឡើងថា ការជ្រើសសមាសភាពប្រធាន អនុប្រធាន និងសមាជិក គ.ជ.ប ចំនួន ៩រូប គឺគ្រប់គ្រាន់សម្រាប់ដំណើរការរបស់ គ.ជ.ប។
លោកបន្ថែមថា ការប្រកាសជ្រើសសមាសភាព គ.ជ.ប សម្រាប់អាណត្តិថ្មីនេះ ស្របទៅតាមច្បាប់បោះឆ្នោត ដោយសមាភាព គ.ជ.ប អាចរៀបចំឡើងវិញក្នុងរយៈពេលយ៉ាងយូរ៦ខែ បន្ទាប់ពីរដ្ឋសភាថ្មីចូលកាន់តំណែង។
លោកបញ្ជាក់ថា៖ «អ្វីៗទាំងអស់នេះ គឺជានីតិវិធីនៃគណៈកម្មាធិការអចិន្ត្រៃយ៍រដ្ឋសភា ដើម្បីធ្វើការជ្រើសរើសសមាសភាពគណៈកម្មាធិការជាតិរៀបចំការបោះឆ្នោត ដូច្នេះប្រជាពលរដ្ឋខ្មែរ ដែលបានបំពេញតាមលក្ខខណ្ឌរបស់រដ្ឋសភា គឺមានសិទ្ធិដាក់ពាក្យស្នើសុំឈរឈ្មោះជាសមាជិករបស់ គ.ជ.ប»។
មាត្រា៦ នៃច្បាប់ស្តីពី ការរៀបចំនិងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត បញ្ជាក់ថា សមាសភាព ៤រូប ត្រូវជ្រើសដោយគណបក្សដឹកនាំរដ្ឋាភិបាល និង៤រូប ត្រូវជ្រើសដោយគណបក្សមានអាសនៈក្នុងរដ្ឋសភា ដែលមិនចូលរួមក្នុងរដ្ឋាភិបាល និង១រូប ត្រូវជ្រើសដោយមានការព្រមព្រៀងគ្នារវាងគណបក្សទាំងអស់ដែលមានអាសនៈក្នុងរដ្ឋសភា។
ផ្អែកលើសមាសភាពដែលបានជ្រើសរើសខាងលើនេះ គណៈកម្មាធិការអចិន្ត្រៃយ៍រដ្ឋសភា ត្រូវរៀបចំបញ្ជីសមាសភាព គ.ជ.ប ជូនរដ្ឋសភា ដើម្បីបោះឆ្នោតទុកចិត្តតាមមតិភាគច្រើនដាច់ខាតនៃចំនួនសមាជិករដ្ឋសភាទាំងមូល។
ប្រធាន អនុប្រធាន និងសមាជិក គ.ជ.ប សរុបទាំង ៩រូប ត្រូវតែងតាំងដោយព្រះរាជក្រឹត្យយ៉ាងយូរ ៦ខែ បន្ទាប់ពីរដ្ឋសភាថ្មីចូលកាន់តំណែង។ ប្រធាន អនុប្រធាន និងសមាជិក ត្រូវធ្វើសច្ចាប្រណិធាន មុនចូលកាន់តំណែង៕