ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញអាជ្ញាប័ណ្ណដល់គម្រោងវិនិយោគចំនួន ១០ ដែលមានទុនវិនិយោគសរុបជាង ៦០ លានដុល្លារ គិតត្រឹមថ្ងៃទី ១៥ ខែមករា។
យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ដែលបានផ្សព្វផ្សាយជាសាធារណៈកាលពីម្សិលមិញ បានឱ្យដឹងថា គម្រោងវិនិយោគថ្មីចំនួន៥ ដែលត្រូវបានចុះបញ្ជី រួមមានការបង្កើតរោងចក្រកាត់ដេរនៅខណ្ឌដង្កោនៃរាជធានីភ្នំពេញ នៅស្រុកស្អាង ខេត្តកណ្តាល និងនៅក្រុងច្បារមន និងស្រុកសំរោងទង ខេត្តកំពង់ស្ពឺ។
គម្រោងវិនិយោគផ្សេងទៀត រួមមានរោងចក្រផលិតស្បែកជើង និងកាបូប នៅខណ្ឌពោធិ៍សែនជ័យ រាជធានីភ្នំពេញ និងស្រុកសំរោងទង ខេត្តកំពង់ស្ពឺ រោងចក្រផលិតគ្រឿងអេឡិចត្រូនិក នៅស្រុកសំរោង ខេត្តតាកែវ រោងចក្រផលិតអំពូលភ្លើងនៅស្រុកត្រាំកក់ ខេត្តតាកែវ និងរោងចក្រផលិតផលធ្វើពីប្លាស្ទិកនៅស្រុកគងពិសី ខេត្តកំពង់ស្ពឺ។
ប្រភពដដែលបានឱ្យដឹងថា គម្រោងវិនិយោគថ្មីទាំង១០នេះ ត្រូវបានគេរំពឹងថានឹងបង្កើតឱកាសការងារប្រហែល ១២,៧០០ កន្លែង សម្រាប់ពលរដ្ឋក្នុងស្រុក។
AKP