បេឡាជាតិរបបសន្តិសុខសង្គម (ប.ស.ស.) ស្នើតំណាងសហជីព អង្គការ និងសមាគមពាក់ព័ន្ធចូលរួមផ្ដល់មតិកែលម្អរាល់ចំណុចខ្វះខាតរបស់ខ្លួន ដើម្បីលើកកម្ពស់សេវាសាធារណៈជូនប្រជាពលរដ្ឋឱ្យកាន់តែមានគុណភាព និងប្រសិទ្ធភាព។
ក្នុងពិធីផ្សព្វផ្សាយស្ដីពីការអនុវត្តរបបសន្តិសុខសង្គម ផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. ដល់ស្ថាប័នពាក់ព័ន្ធកាលពីថ្ងៃអាទិត្យ លោក ម៉េង ហុង អគ្គនាយក ប.ស.ស. លើកឡើងថា តំណាងសម្ពន្ធសហជីពជាតិ សហព័ន្ធសហជីពកម្មករសំណង់ និងព្រៃឈើកម្ពុជា អង្គការកម្មវិធីអភិវឌ្ឍន៍ធនធានយុវជន និងអង្គការ សមាគមពាក់ព័ន្ធនានា គឺជាដៃគូយ៉ាងសំខាន់របស់ ប.ស.ស.។
លោកបន្ថែមថា ជាដៃគូសំខាន់របស់ ប.ស.ស. ដោយសារសហជីព អង្គការ សមាគម និងភាគីពាក់ព័ន្ធជាអ្នកចូលរួមក្នុងសកម្មភាពផ្សព្វផ្សាយអំពីសិទ្ធិ និងផលប្រយោជន៍ដល់ប្រជាពលរដ្ឋ ជាពិសេសកម្មករនិយោជិត ដើម្បីទទួលបានការគាំពារ និងយល់ដឹងកាន់តែច្បាស់អំពីអត្ថប្រយោជន៍របបសន្តិសុខសង្គម និងរីករាយទទួលយកនូវសមិទ្ធិផលនានារបស់រដ្ឋាភិបាល នីតិកាលទី៧ ដែលបានដាក់ចេញកាលពីកន្លងទៅ។
លោកក៏បានស្នើតំណាងសហជីព អង្គការ និងសមាគមពាក់ព័ន្ធទាំងអស់ ដែលចុះជួបផ្ទាល់ជាមួយប្រជាពលរដ្ឋក្នុងមូលដ្ឋាន ពិសេសកម្មករនិយោជិត ជួយចូលរួមជាមតិកែលម្អរាល់ចំណុចខ្វះខាតរបស់ ប.ស.ស. ដើម្បីឱ្យអង្គភាពបម្រើសេវាសាធារណៈជូនប្រជាពលរដ្ឋអាចពង្រឹងសមត្ថភាពបន្ថែម និងបន្ដដំណើរឈានទៅមុខកាន់តែល្អប្រសើរ ក្នុងការបម្រើផលប្រយោជន៍ជូនប្រជាពលរដ្ឋឱ្យបានគ្រប់ៗគ្នា។
លោក ម៉េង ហុង បញ្ជាក់ថា បើសិនអង្គការ សមាគម និងសហជីពពាក់ព័ន្ធទាំងអស់ ដែលមានបំណងចង់ឈ្វេងយល់ពីរបបសន្ដិសុខសង្គមដែលកំពុងអនុវត្តនាពេលបច្ចុប្បន្ន អាចអញ្ជើញមកជួបជុំគ្នានៅស្នាក់ការ ប.ស.ស. ដោយផ្ទាល់ ដែល ប.ស.ស. នឹងរៀបចំផ្សព្វផ្សាយជូនឱ្យចំគោលដៅ ដែលទទួលបានចំណេះដឹងគ្រប់ៗគ្នា ដើម្បីបន្ដផ្សព្វផ្សាយបានឆាប់រហ័ស ទាន់ពេលវេលា អំពីគោលនយោបាយចម្បងសំខាន់ៗរបស់រដ្ឋាភិបាល ពិសេសពាក់ព័ន្ធទៅនឹងវិស័យសន្តិសុខសង្គមកម្ពុជា។
អគ្គនាយក ប.ស.ស. បន្ថែមថា៖ «ក្នុងនាម ប.ស.ស. ដែលជាសេនាធិការរបស់ក្រសួងការងារ និងបណ្តុះបណ្តាលវិជ្ជាជីវៈ គឺស្វាគមន៍រាល់កិច្ចសហប្រតិបត្តិការជាមួយភាគីសហជីព ក៏ដូចជាអង្គការសមាគមនានា ដើម្បីស្វែងរកដំណោះស្រាយ និងធ្វើសកម្មភាពរួមគ្នាឱ្យកាន់តែមានប្រសិទ្ធភាពសម្រាប់ជាប្រយោជន៍ជូនដល់បងប្អូនកម្មករនិយោជិត និងបងប្អូនប្រជាពលរដ្ឋ»។
លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ដើម្បីការពារអត្ថប្រយោជន៍ជូនកម្មករនិយោជិត ក្រុមអធិការកិច្ចនឹងចុះស្រាវជ្រាវ និងពិនិត្យនៅតាមរោងចក្រ សហគ្រាសណាដែលលាក់បាំងបុគ្គលិកផ្ទុយនឹងច្បាប់ការងារ និងធ្វើឱ្យខាតប្រយោជន៍ដល់កម្មករនិយោជិត។
លោកបញ្ជាក់ថា៖ «ក្រសួងនឹងដាក់ពិន័យចំពោះរោងចក្រ សហគ្រាស ដែលលាក់បាំងបុគ្គលិកផ្ទុយទៅនឹងច្បាប់ ប៉ុន្តែបើយើងដាក់ពិន័យហើយ រោងចក្រសហគ្រាសនោះនៅតែមិនអនុវត្តតាមការណែនាំទៀត យើងក៏អាចពិចារណាបញ្ជូនសំណុំរឿងទាំងនោះទៅតុលាការ ដើម្បីដោះស្រាយទៅតាមផ្លូវច្បាប់»។
លោក កត្តា អ៊ន បន្ថែមថា ការអនុវត្តតាមផ្លូវច្បាប់ចំពោះក្រុមហ៊ុន សហគ្រាស និងគ្រឹះស្ថាន ដែលមិនអនុវត្តតាមច្បាប់សម្រាប់គាំពារពេញលេញដល់កម្មករនិយោជិត ធ្វើឡើងដើម្បីរួមចំណែកកាត់បន្ថយភាពក្រីក្រ និងលើកកម្ពស់ស្ថិរភាពសង្គមនៅកម្ពុជា។
លោក វន ពៅ ប្រធានសមាគមសេដ្ឋកិច្ចក្រៅប្រព័ន្ធ (IDEA) ប្រាប់ខ្មែរថាមស៍ កាលពីម្សិលមិញថា អ្វីដែល ប.ស.ស. គួរបន្តផ្សព្វផ្សាយបន្ថែមទៀតទៅកាន់ប្រជាពលរដ្ឋនៅតាមមូលដ្ឋាន ជាពិសេសប្រជាពលរដ្ឋដែលរស់នៅតំបន់ឆ្ងាយៗពីប្រជុំជន ដើម្បីឱ្យយល់ដឹងកាន់តែច្បាស់ពីអត្ថប្រយោជន៍ ប.ស.ស.។
លោកបន្ថែមថា ក្រសួងក៏គួរធ្វើកម្មវិធីរៀបចំបុគ្គលិកផ្នែក ប.ស.ស. ចុះទៅតាមមូលដ្ឋាន ដើម្បីជៀសវាងប្រជាពលរដ្ឋចំណាយថវិកាច្រើនក្នុងការធ្វើដំណើរមកទីប្រជុំជន ដែលនាំឱ្យមានការពិបាកទទួលបានសេវារបបសន្តិសុខសង្គមតាមរយៈប្រព័ន្ធថែទាំសុខភាពដោយស្ម័គ្រចិត្ត។
លោកបន្តថា ប.ស.ស. និងភាគីពាក់ព័ន្ធគួរពិនិត្យឡើងវិញចំពោះលទ្ធភាពបង់ប្រាក់ចូល ប.ស.ស.សម្រាប់ប្រជាពលរដ្ឋជាសមាជិក ជាពិសេសបុគ្គលស្វ័យនិយោជន៍ ដើម្បីបង្កលក្ខណៈងាយស្រួល និងឆាប់រហ័សជាងមុន។
លោក វន ពៅ បញ្ជាក់ថា៖ «រដ្ឋក៏គួរពង្រីកមន្ទីរសុខាភិបាលសាធារណៈឱ្យបានច្រើន ព្រោះមន្ទីរសុខាភិបាលរបស់យើងនាពេលបច្ចុប្បន្ន សម្រាប់ពេទ្យធំៗមានតែមន្ទីរពេទ្យកាល់ម៉ែត្រ មន្ទីរពេទ្យមិត្តភាពកម្ពុជា-ចិន ព្រះកុសុមៈ មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យព្រះអង្គឌួង តែប៉ុណ្ណោះ»។
ប្រធានសមាគមបន្ថែមថា ក្រៅពីមន្ទីរពេទ្យខាងលើនេះ មជ្ឈមណ្ឌលសុខាភិបាលជាច្រើនផ្សេងទៀត មិនទាន់ពង្រីកវិសាលភាព ដើម្បីឆ្លើយតបទៅនឹងតម្រូវការរបស់ប្រជាពលរដ្ឋឱ្យបានគ្រប់គ្រាន់នៅឡើយ ព្រោះពួកគេតែងត្អូញត្អែរថា មកពិនិត្យសុខភាពម្ដងៗត្រូវចំណាយពេលមួយព្រឹក ហើយពេលខ្លះមួយថ្ងៃ ដែលនាំឱ្យខាតពេលវេលាក្នុងការប្រកបមុខរបរអាជីវកម្ម៕