ពលរដ្ឋក្រីក្រចំនួន៧២គ្រួសារនៅខេត្តកណ្ដាលបានទទួលដីពីរដ្ឋាភិបាលសម្រាប់សង់លំនៅឋាន។ ពួកគេបានចូលរួមចាប់ឆ្នោតយកការបែងចែកដីឡូតិ៍ដែលរៀបចំដោយរដ្ឋភិបាលខេត្តកណ្ដាលកាលពីថ្ងៃចន្ទ។
មានប្រសាសន៍ក្នុងពិធីចាប់ឆ្នោតការបែងចែកដីឡូតិ៍កាលពីថ្ងៃចន្ទ លោក ហាក់ សុខមករា អភិបាលរងខេត្តកណ្តាល បានលើកឡើងថា ពលរដ្ឋទាំងនេះមានជីវភាពក្រីក្រនិងខ្វះខាតដីសម្រាប់សង់លំនៅឋាន។
ពួកគេជាពលរដ្ឋរស់នៅភូមិព្រែកថី ភូមិព្រែកសំរោង ភូមិព្រែកខ្សៀវ សង្កាត់រកាខ្ពស់ ក្រុងតាខ្មៅ។
លោកថា ពលរដ្ឋទាំងនេះជាជនរងគ្រោះដោយសារតែឥទ្ធិពលជំនន់ទឹកភ្លៀងនាពេលកន្លងមក ហើយត្រូវបានរដ្ឋាភិបាលតាមរយៈលោក គង់ សោភ័ណ្ឌ អភិបាលខេត្តកណ្ដាលយកចិត្តទុកដាក់ជាខ្លាំង។
លោកនិយាយថា៖ «អភិបាលខេត្តបានជួយស្វែងរកនិងផ្ដល់ដីសម្រាប់ពួកគេសង់លំនៅឋានសមរម្យ ដើម្បីស្ដារស្ថានភាពរស់នៅរបស់ពួកគេបានប្រសើរឡើងវិញ»។
លោកបន្ថែមថា៖ «ចាប់ពីពេលនេះតទៅពួកគាត់បានទទួលដីមានសុវត្ថិភាពនៃការកាន់កាប់ដីធ្លីរបស់ខ្លួន និងមានសិទ្ធិប្រើប្រាស់ផ្តាច់មុខ ប៉ុន្តែកុំយកដីនេះទៅប្រើប្រាស់ក្នុងបទណាមួយដែលច្បាប់ហាមឃាត់»។
លោកបានប្រាប់ពួកគេថា ការចាប់ឆ្នោតបែងចែកដីឡូតិ៍នេះ គឺជាការបង្ហាញពីតម្លាភាពសម្រាប់ពលរដ្ឋដែលខ្វះខាតដីសាងសង់លំនៅឋាន។ នេះបានបង្ហាញយ៉ាងច្បាស់ពីការយកចិត្តទុកដាក់ពីសំណាក់ប្រមុខរាជរដ្ឋាភិបាល ក៏ដូចជាថ្នាក់ដឹកនាំខេត្ត ដើម្បីជួយស្ដារជីវភាពពួកគេបានប្រសើរថែមមួយកម្រិត។
លោកបន្តថា៖ «បន្ទាប់ពីការចាប់ឆ្នោតរួច ពលរដ្ឋអាចចាប់ផ្តើមចូលតាំងទីលំនៅលើដីនេះបានភ្លាមៗ»។
លោក ហាក់ សុខមករា បានអំពាវនាវដល់ពលរដ្ឋទាំង៧២គ្រួសារ ដែលបានទទួលដីសម្រាប់សង់លំនៅឋានត្រូវខិតខំកសាងលំនៅដ្ឋាន បង្កបង្កើនផល ដាំដំណាំ ដើម្បីជីវភាពរបស់ខ្លួនរស់នៅសមរម្យ។
លោក ឈឿង ឆូ ចៅសង្កាត់រកាខ្ពស់ បានបញ្ជាក់ថា ពលរដ្ឋដែលបានទទួលដីឡូតិ៍តាមរយៈការចាប់ឆ្នោតកាលពីថ្ងៃចន្ទ ជាអតីតពលរដ្ឋដែលបានរស់នៅលើមាត់ព្រែក ហើយផ្ទះរបស់ពួកគេត្រូវបានបាក់ស្រុតចូលព្រែកដោយសារតែគ្រោះទឹកជំនន់ដែលហូរខ្លាំង។
លោកនិយាយថា៖ «ទឹកជំនន់ហូរមកធ្វើឱ្យបាក់ច្រាំង ផ្ទះពួកគេស្រុតចូលក្នុងព្រែក ហើយពួកគេបានរៀបចំតាំងទីលំនៅជាបណ្ដោះអាសន្នដោយដំបូលប្រក់កៅស៊ូតង់តិ៍ នៅក្បែរទីតាំងដែលផ្ទះរបស់ពួកគេត្រូវបាក់ស្រុតចូលព្រែក»។
លោកបញ្ជាក់ថា ដំបូងឡើយលោកអភិបាលខេត្តមានគម្រោងធ្វើផ្ទះសម្រាប់ពួកគេរស់នៅ ប៉ុន្តែដោយសារតែមិនមានលទ្ធភាពគ្រប់គ្រាន់ ដូច្នេះលោកបានសម្រេចចែកដីឡូតិ៍សម្រាប់ពួកគេសង់លំនៅឋានរស់នៅ ខណៈកន្លងមកពួកគេបានទទួលសំណង់ជាថវិកាចន្លោះពីមួយម៉ឺនដុល្លារទៅពីរម៉ឺនដុល្លារពីរដ្ឋាភិបាលតាមគ្រួសារតូចគ្រួសារធំ។
លោកបន្ថែមថា ពួកគេមានសេចក្ដីរីករាយនៅពេលបានទទួលដីពីរដ្ឋាភិបាលសម្រាប់សង់លំនៅឋាន។ ដីដែលចែកជូនពួកគេនោះជាដីដែលបានចុះបញ្ជីរបស់រដ្ឋ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយចុះផ្សាយកាលពីថ្ងៃទី១៧ ខែមករា ឆ្នាំ២០២៣ បង្ហាញថា ផ្ទះពលរដ្ឋចំនួន៦១ខ្នងផ្ទះនៅភូមិព្រែកថី និងភូមិព្រែកសំរោង សង្កាត់រកាខ្ពស់ ក្រុងតាខ្មៅ ខេត្តកណ្ដាល បានរងផលប៉ះពាល់ពីការបាក់ស្រុតដីជាប់ព្រែក ខណៈផ្ទះពលរដ្ឋចំនួន៦ខ្នងបានបាក់ចូលព្រែកនិងផ្ទះពលរដ្ឋផ្សេងទៀតដែលនៅជាប់មាត់ព្រែកតម្រូវឱ្យរុះរើចេញ៕