សង្កាត់ស្លាកែត ដែលស្ថិតនៅក្រុងបាត់ដំបងក្នុងចំណោមសង្កាត់មួយចំនួនទៀតបានដាក់បំពាក់ឧបករណ៍ជំនួយប្រព័ន្ធប្រកាសអាសន្នការពារគ្រោះមហន្តរាយពីធម្មជាតិបានជួយដល់ប្រជាពលរដ្ឋរស់នៅតាមដងស្ទឹងសង្កែឲ្យរួចពីគ្រោះធមជាតិតាមរយៈត្រៀមជាមុន។
ការបំពាក់ប្រព័ន្ធប្រកាសអាសន្នការពារគ្រោះមហន្តរាយពីធម្មជាតិនេះត្រូវបានលោក ទួត រ៉ើន ចៅ សង្កាត់ស្លាកែតក្រុងបាត់ដំបងបានឲ្យដឹងនៅថ្ងៃទី២១ខែធ្នូឆ្នាំ២០២៣ថា ប្រព័ន្ធប្រកាសឱ្យដឹងមុនក្នុងទីក្រុងបង្កើតឡើងដោយអង្គការភីន (People In Need) ដែលបានទទួលជំនួយពីកម្មវិធីសម្ព័ន្ធភាពប្រែប្រួលអាកាសធាតុនៅកម្ពុជា ក្នុងកិច្ចសហប្រតិបត្តិការជាមួយ នឹងរដ្ឋបាលក្រុងបាត់ដំបង គណៈកម្មាធិការគ្រប់គ្រង គ្រោះមហន្តរាយថ្នាក់ខេត្ត (គ.គ.ម.ខ) និង គណៈកម្មាធិការជាតិគ្រប់គ្រងគ្រោះមហន្តរាយ(គ.ជ.គ.ម.)។
លោកថាប្រព័ន្ធប្រកាសឱ្យដឹងមុនក្នុងទីក្រុងនេះគឺជាបណ្តាញផ្ដល់ព័ត៌មានថ្មីមួយ ដើម្បីផ្សព្វផ្សាយសារប្រកាសអាសន្នទៅកាន់ប្រជាពលរដ្ឋអំពីគ្រោះទឹកជំនន់និងរាល់មុខសញ្ញាគ្រោះថ្នាក់ដទៃទៀតដោយអាចផ្ញើសារតាមរយៈប្រពន្ធសារលេខ១២៩៤ផងដែរ។
បើតាមលោកចៅសង្កាត់ ប្រព័ន្ធប្រកាសឱ្យដឹងមុនក្នុងទីក្រុងមានមេក្រូជាឧបករណ៍ប្រកាសអាសន្នស្វ័យប្រវត្តិដោយ មេក្រូប្រកាសអាសន្នបង្កើតឡើងជាមួយនឹងប្រព័ន្ធគ្រប់គ្រងស្វ័យប្រវត្តិ ដែលអាចទទួលព័ត៌មានផ្ញើចេញពីគណៈកម្មាធិការគ្រប់គ្រងគ្រោះមហន្តរាយថ្នាក់ខេត្ត។
បន្ទាប់ពីការទទួលបានសារ ប្រព័ន្ធគ្រប់គ្រងស្វ័យប្រវត្តិរបស់មេក្រូបញ្ជូនសំលេងសារទៅកាន់ប្រព័ន្ធបន្លឺសំលេងអេឡិចត្រូនិចរបស់មេក្រូ ហើយប្រជាជនរស់នៅក្នុងតំបន់គោលដៅនឹងឮសារប្រកាសចេញពីមេក្រូដោយស្វ័យប្រវត្តិ។ សារប្រកាសឱ្យដឹងមុនអាចផ្សាយសារទៅកាន់ប្រជាជនក្នុងសហគមន៍ក្នុងចម្ងាយប្រមាណ ៥០០ ម៉ែត្រការ៉េ នៃទីតាំងដែលបានតម្លើង។
ចំណែកលោកស្រី ឃ្លោក វិចិត្ររដ្ឋា អនុប្រធាននាយកដ្ឋានប្រែប្រួលអាកាសធាតុនៃក្រសួងបរិស្ថានបានឲ្យដឹងថា ការកសាងភាពធន់សហគមន៍មូលដ្ឋានទាក់ទងការប្រែប្រួលអាកាសធាតុជាការងារអាទិភាពមួយក្រោមការគាំទ្រពីក្រសួងបរិស្ថាន។
ប្រព័ន្ធប្រកាសឱ្យដឹងមុនក្នុងទីក្រុង គឺជាយន្តការផ្សព្វផ្សាយដ៏ល្អមួយក្នុងអំឡុងពេលមានគ្រោះអាសន្នដូចជាទឹកជំនន់និងគ្រោះថ្នាក់ធម្មជាតិផ្សេងៗ។ ការដាក់ចេញប្រព័ន្ធព័ត៌មាននេះមានសារសំខាន់ណាស់ អាចផ្តល់ដំណឹងដលពលរដ្ឋយល់ដឹងនឹងត្រៀមខ្លួនជាមុនឆ្លើយតបការប្រែប្រួលអាកាសធាតុដូចជាទឹកជំនន់ជាដើម។
លោកស្រីថា រហូតមកដល់ពេលនេះក្រៅពីកំពុងអនុវត្តនៅសង្កាត់ស្លាកែត មាន ៣ ទីតាំងទៀតនៅក្រុងបាត់ដំបងដែលបានបំពាក់ប្រព័ន្ធប្រកាសអាសន្នជាមុនការពារគ្រោះមហន្តរាយពីធម្មជាតិនេះ៕