អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានធ្វើការជាមួយអង្គការក្រៅរដ្ឋាភិបាលប្រមាណ៤០អង្គភាពដែលកំពុងធ្វើការងារពាក់ព័ន្ធនឹងបញ្ហានេះ ដើម្បីជំរុញការចូលរួមកាន់តែច្រើនក្នុងការជួយដោះស្រាយវិវាទក្រៅប្រព័ន្ធតុលាការដល់ប្រជាពលរដ្ឋ។
អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) និងអង្គការអុកស្វាមប្រចំានៅកម្ពុជាកាលពីថ្ងៃចន្ទ បានសហការរៀបចំកិច្ចប្រជុំផ្សព្វផ្សាយអំពីដំណើរការអាជ្ញាធរជាតិដោះស្រាយវិវាទក្រៅប្រព័ន្ធតុលាការជូនដល់អង្គការក្រៅរដ្ឋាភិបាលនិងដៃគូអភិវឌ្ឍន៍ប្រមាណ៤០អង្គភាព ដូចជាអង្គការអុកស្វាមប្រចាំកម្ពុជា មជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម និងការិយាល័យឧត្តមស្នងការទទួលបន្ទុកសិទ្ធិមនុស្សនៅកម្ពុជាជាដើម។
លោក កើត រិទ្ធ រដ្ឋមន្រ្តីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ បានអញ្ជើញជាអធិបតីក្នុងកិច្ចប្រជុំនេះ។
កិច្ចប្រជុំមានបំណងផ្សព្វផ្សាយកាន់តែស៊ីជម្រៅបន្ថែមទៀតអំពីកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ និងពិនិត្យលទ្ធភាពធ្វើកិច្ចសហការជាមួយគ្នាក្នុងកិច្ចដំណើរការជួយដោះស្រាយវិវាទក្រៅប្រព័ន្ធតុលាការជូនដល់ប្រជាពលរដ្ឋ។
លោក កើត រិទ្ធ បានចាត់ទុកអង្គការក្រៅរដ្ឋាភិបាលនិងដៃគូអភិវឌ្ឍន៍ ជាដៃគូសហការដ៏សំខាន់មួយរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ។
លោកថា ការចូលរួមរបស់ពួកគេនៅក្នុងកិច្ចប្រជុំនេះ បានបង្ហាញពីការគំាទ្រដ៏មានសារសំខាន់ដល់កិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ ដើម្បីអាចឈានទៅសម្រេចបាននូវបេសកកម្មចុះដោះស្រាយវិវាទជូនប្រជាពលរដ្ឋនៅមូលដ្ឋាន ពិសេសនៅតំបន់ដាច់ស្រយាល និងតំបន់ដែលមានជនជាតិដើមភាគតិចរស់នៅក្នុងគោលដៅជំរុញនិងលើកកម្ពស់យន្តការដោះស្រាយវិវាទក្រៅប្រព័ន្ធតុលាការសម្រាប់ជាផលប្រយោជន៍រួមរបស់ប្រជាពលរដ្ឋកម្ពុជា។
លោកបានបញ្ជាក់ថា ការកែទម្រង់ប្រព័ន្ធយុត្តិធម៌នៅកម្ពុជានឹងត្រូវប្រមូលផ្តុំការយកចិត្តទុកដាក់លើសសរស្តម្ភចំនួនពីរ គឺសសរស្តម្ភ ការកែទម្រង់ប្រព័ន្ធតុលាការដោយផ្តោតលើគុណភាពនិងប្រសិទ្ធភាពនៃការផ្តល់សេវាយុត្តិធម៌ឆាប់រហ័ស មានសុក្រឹតភាព និងភាពត្រឹមត្រូវ។ មួយទៀត គឺការកែទម្រង់ប្រព័ន្ធដោះស្រាយវិវាទក្រៅប្រព័ន្ធតុលាការ ដែលមានលក្ខណៈងាយស្រួល សម្បូរបែប និងដោះស្រាយបញ្ចប់វិវាទតាមរយៈការសម្រុះសម្រួលផ្សះផ្សាវិវាទបានឆាប់រហ័សជូនប្រជាពលរដ្ឋ ព្រមទាំងរួមចំណែកលើកកម្ពស់វប្បធម៌សន្តិភាពនិយមក្នុងសង្គមកម្ពុជា។
លោកនិយាយថា៖ «ការបង្កើតនូវអាជ្ញាធរជាតិដោះស្រាយវិវាទក្រៅប្រព័ន្ធតុលាការ គឺជាកិច្ចការអាទិភាពមួយនៃគោលនយោបាយកែទម្រង់របស់រាជរដ្ឋាភិបាលនីតិកាលទី៧នេះ និងជាការបោះជំហានថ្មីមួយក្នុងការកែទម្រង់ប្រព័ន្ធដោះស្រាយវិវាទនៅកម្ពុជា»។
កិច្ចប្រជុំដ៏មានសារៈសំខាន់នេះបានផ្ដល់ឱកាសដល់អ្នកចូលរួមអាចលើកទ្បើងអំពីសំណួរ សំណូមពរ មតិយោបល់ និងការយល់ឃើញជុំវិញកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ ខណៈអាជ្ញាធរជាតិមួយនេះ បានកំណត់យកថ្ងៃទី១ ខែមីនា ជាកាលបរិច្ឆេទនៃការចាប់ផ្ដើមទទួលពាក្យបណ្ដឹងពីប្រជាពលរដ្ឋ ដើម្បីត្រួតពិនិត្យនិងសម្រុះសម្រួលដោះស្រាយ។
តំណាងអង្គការក្រៅរដ្ឋាភិបាលនិងដៃគូអភិវឌ្ឍន៍បានសម្តែងសាទរ និងការគាំទ្រដល់ការបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការ ព្រមទាំងបង្ហាញឆន្ទៈចូលរួមសហការជាមួយស្ថាប័នថ្មីនេះក្នុងបេសកកម្មចុះជួយដោះស្រាយវិវាទជូនប្រជាពលរដ្ឋ។
ក្រោយពីកិច្ចប្រជុំផ្សព្វផ្សាយនេះបានបិទបញ្ចប់ អង្គការអុកស្វាមប្រចំានៅកម្ពុជាបានប្រកាសព័ត៌មានលើទំព័រហ្វសប៊ុកផ្លូវការរបស់ខ្លួនពីម្សិលមិញថា ក្នុងភាពជាដៃគូរបស់ក្រសួងយុត្តិធម៌ អង្គការអុកស្វាមនឹងបន្តខិតខំសម្របសម្រួល បង្កើតកិច្ចសន្ទនានិងពិភាក្សាអំពីការងារពាក់ព័ន្ធនឹងការដោះស្រាយវិវាទក្រៅប្រព័ន្ធតុលាការនេះជាបន្តទៀត។
អង្គការអុកស្វាមប្រចំានៅកម្ពុជា បន្តថា ការរៀបចំព្រឹត្តិការណ៍នេះ ដើម្បីជំរុញការដោះស្រាយវិវាទក្រៅប្រព័ន្ធតុលាកាឱ្យមានវិសាលភាពទូលំទូលាយស្របតាមបទដ្ឋាន បច្ចេកទេស ដែលមានការទទួលស្គាល់ជាសាកល និងជាពិសេសការចូលរួមដោះស្រាយវិវាទរដ្ឋប្បវេណីនៅតាមទីជនបទដាច់ស្រយាល វិវាទរបស់ជនជាតិដើមភាគតិច និងវិវាទផ្សេងៗទៀត៕