កម្ពុជា និងសហភាពអឺរ៉ុប (EU) បានពិភាក្សាអំពីកិច្ចសហប្រតិបត្តិការបន្ថែមទៀតលើវិស័យសិទ្ធិមនុស្សនៅកម្ពុជា។
ការពិភាក្សានេះធ្វើឡើងក្នុងជំនួបរវាងលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា (CHRC) និងលោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា នៅរាជធានីភ្នំពេញ កាលពីថ្ងៃទី១៥ ខែមករា។
លោក កែវ រ៉េមី បានគូសបញ្ជាក់ពីការរៀបចំរបាយការណ៍នៃការពិនិត្យឡើងវិញជាសកលតាមកាលកំណត់ (UPR) ជុំទី៤ ដោយបានពិគ្រោះយោបល់ជាមួយក្រសួង និងភាគីពាក់ព័ន្ធរួចរាល់ហើយ។
UPR នឹងត្រូវបានពិនិត្យ និងសម្រេចដោយនាយករដ្ឋមន្ត្រីកម្ពុជា មុននឹងដាក់ជូនក្រសួងការបរទេស និងសហប្រតិបត្តិការអន្តរជាតិ ដើម្បីបន្តនីតិវិធី។
លោកក៏បានជម្រាបជូនលោក Igor Driesmans អំពីសេចក្តីព្រាងច្បាប់ស្តីពីការបង្កើតស្ថាប័នសិទ្ធិមនុស្សជាតិ ស្របតាមគោលការណ៍ណែនាំទីក្រុងប៉ារីស និងបទដ្ឋានសិទ្ធិមនុស្សអន្តរជាតិ។
គណៈកម្មាធិការនេះបានសហការជាមួយការិយាល័យឧត្តមស្នងការទទួលបន្ទុកសិទ្ធិមនុស្ស (OHCHR) នៅកម្ពុជា ដើម្បីរៀបចំកិច្ចប្រជុំពិគ្រោះយោបល់ចំនួន ៣២លើក ដោយមានការចូលរួមពីភាគីពាក់ព័ន្ធ។
ទន្ទឹមនឹងនេះក៏មានការចុះត្រួតពិនិត្យស្ថានភាពសិទ្ធិមនុស្សជាប្រចាំនៅក្នុងមណ្ឌលឃុំឃាំង ដូចជាពន្ធនាគារ និងមណ្ឌលស្តារនីតិសម្បទា ដោយបានវាយតម្លៃថាមានភាពល្អប្រសើរ។
លោកក៏បានស្នើឱ្យឯកអគ្គរដ្ឋទូតសហភាពអឺរ៉ុបពិនិត្យលទ្ធភាពពង្រឹងកិច្ចសហប្រតិបត្តិការបន្ថែមទៀតរវាង CHRC ស្ថានទូតសហភាពអឺរ៉ុប និង OHCHR លើវិស័យសិទ្ធិមនុស្សនៅកម្ពុជា។
ចំណែកលោក Igor Driesmans បានស្វាគមន៍ចំពោះសំណើរបស់លោកកែវ រ៉េមី លើការពង្រីកកិច្ចសហប្រតិបត្តិការនាពេលខាងមុខ។ AKP