ឧបការីរដ្ឋមន្ត្រីក្រសួងការបរទេសសហរដ្ឋអាមេរិកទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក Daniel J. Kritenbrink បានជួបសម្តែងការគួរសម ជាមួយឯកឧត្តមបណ្ឌិតនាយករដ្ឋមន្ត្រី ហ៊ុន ម៉ាណែត ក្នុងទីក្រុងភ្នំពេញ ដើម្បីពិភាក្សាអំពីការពង្រឹងទំនាក់ទំនងទ្វេភាគីអាមេរិក-កម្ពុជា ឱ្យកាន់តែស៊ីជម្រៅ និងដោះស្រាយបញ្ហាកង្វល់នានា នេះបើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំរាជធានីភ្នំពេញ នៅថ្ងៃទី២៦ ខែកុម្ភៈ ឆ្នាំ២០២៤។
ភាគីទាំងពីរបានពិភាក្សាអំពីកិច្ចសហប្រតិបត្តិការដែលមានស្រាប់ជាច្រើន រួមទាំងការអនុវត្តទណ្ឌកម្មរបស់អង្គការសហប្រជាជាតិ លើកូរ៉េខាងជើង ការថ្កោលទោសចំពោះការលុកលុយរបស់រុស្ស៊ីលើអ៊ុយក្រែន កម្មវិធីជំនួយបរទេស ទីភ្នាក់ងារគណនេយ្យ POW/MIA និងការអនុវត្តច្បាប់ ខណៈលើកឡើងអំពីវឌ្ឍនភាពនៃវិស័យនានា នៅកម្ពុជា ដូចជាលទ្ធិប្រជាធិបតេយ្យ និងសិទ្ធិមនុស្ស ការជួញដូរមនុស្ស បង្កើតកន្លែងសម្រាប់ប្រព័ន្ធផ្សព្វផ្សាយសេរី និងឯករាជ្យ និងសន្តិសុខក្នុងតំបន់។
ក្នុងអំឡុងពេលនៃកិច្ចពិភាក្សានេះ ឧបការីរដ្ឋមន្ត្រីបានគូសបញ្ជាក់ថា សហរដ្ឋអាមេរិកនៅតែប្តេជ្ញាចិត្តចំពោះប្រជាជនកម្ពុជា និងបំណងប្រាថ្នារបស់ពួកគេចង់ឱ្យប្រទេសជាតិកាន់តែរីកចម្រើន ប្រជាធិបតេយ្យ និងឯករាជ្យ ដែលសំឡេងទាំងអស់ត្រូវបានស្តាប់ និងគោរព ហើយអធិបតេយ្យភាពរបស់កម្ពុជាត្រូវបានការពារ។
ឧបការីរដ្ឋមន្ត្រី Kritenbrink ក៏បានចូលរួមជាមួយអតីតនិស្សិតកម្ពុជានៃគំនិតផ្តួចផ្តើមអ្នកដឹកនាំអាស៊ីអាគ្នេយ៍វ័យក្មេង (YSEALI) ដើម្បីអបអរខួបលើកទី១០ នៃកម្មវិធីផ្លាស់ប្តូរថ្នាក់តំបន់។