នៅមុនដំណើរទស្សនកិច្ចរបស់លោកនាយករដ្ឋមន្ត្រី ហ៊ុន ម៉ាណែត ទៅកាន់ប្រទេសអូស្ត្រាលីនៅខែក្រោយនេះ វិស័យឯកជនរួមជាមួយក្រសួងស្ថាប័នពាក់ព័ន្ធកំពុងធ្វើការលើមធ្យោបាយទាក់ទាញដៃគូវិនិយោគពីប្រទេសអូស្ត្រាលី និងជំរុញការនាំចេញផលិតផលពាក់កណ្តាលសម្រេច និងកែច្នៃទៅកាន់ប្រទេសអូស្ត្រាលី។
ភាគីពាក់ព័ន្ធក្នុងស្រុកមួយក្រុមបានប្រមូលផ្តុំគ្នាក្នុងការតម្រង់ទិសដល់ប្រតិភូធុរកិច្ចកម្ពុជា កម្មវិធី «បេសកកម្មកសិពាណិជ្ជកម្ម ពាណិជ្ជកម្ម និងការវិនិយោគទៅកាន់ប្រទេសអូស្ត្រាលី» ដែលរៀបចំដោយសមាគមអ្នកវិនិយោគច្នៃប្រឌិត និងអភិវឌ្ឍន៍ (IDI) កាលពីថ្ងៃសុក្រសប្តាហ៍មុន។
កម្មវិធីនេះត្រូវបានរៀបចំឡើងដើម្បីផ្តល់នូវធាតុចូល និងអនុសាសន៍ទាក់ទងនឹងបេសកកម្មខាងលើដល់គណៈប្រតិភូ ដែលគ្រោងនឹងចូលរួមនៅទីក្រុងមែលប៊ន ចាប់ពីថ្ងៃទី ៥ ដល់ទី ៧ ខែមីនា ឆ្នាំ ២០២៤។
លោក សួន សុផល អគ្គលេខាធិការរងក្រុមប្រឹក្សាវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានវាយតម្លៃខ្ពស់អំពីកម្មវិធីដែលផ្តួចផ្តើមដោយ IDI អ្នកជំនួញ និងអ្នកវិនិយោគក្នុងស្រុកក្នុងការរៀបចំបេសកកម្មធុរកិច្ច រួមជាមួយនឹងការរៀបចំកិច្ចប្រជុំកំពូលពិសេសអាស៊ាន-អូស្ត្រាលី។
លោកនិយាយថា៖ «គណៈប្រតិភូក្នុងបេសកកម្មនាពេលខាងមុខ នឹងធ្វើការជាមួយក្រសួង ស្ថាប័នពាក់ព័ន្ធ ដើម្បីទាក់ទាញដៃគូវិនិយោគពីប្រទេសអូស្ត្រាលី មកបណ្តាក់ទុននៅកម្ពុជា ក៏ដូចជាជំរុញការនាំចេញផលិតផលពាក់កណ្តាលសម្រេច និងកែច្នៃរបស់កម្ពុជា ជាពិសេសក្នុងវិស័យកសិ-ម្ហូបអាហារទៅកាន់ប្រទេសអូស្ត្រាលី»។
កម្មវិធីតម្រង់ទិសនេះមានការចូលរួមពីតំណាងប្រមាណ៣០នាក់មកពីក្រុមប្រឹក្សាអភិវឌ្ឍន៍កម្ពុជា ក្រសួងពាណិជ្ជកម្ម IDI និងវិស័យឯកជន។
កិច្ចប្រជុំកំពូលពិសេសអាស៊ាន-អូស្ត្រាលី គ្រោងនឹងប្រព្រឹត្តទៅនៅខែមីនា នៅទីក្រុងមែលប៊ន ប្រទេសអូស្ត្រាលី ក្នុងគោលបំណងផ្តល់ឱកាសដល់រដ្ឋាភិបាលអូស្ត្រាលី ដើម្បីកែលម្អជំហររបស់ខ្លួនជាមួយរដ្ឋអាស៊ីអាគ្នេយ៍។
លោកនាយករដ្ឋមន្ត្រី ហ៊ុន ម៉ាណែត នឹងទៅបំពេញទស្សនកិច្ចនៅប្រទេសអូស្ត្រាលីជាលើកដំបូងក្នុងនាមជាមេដឹកនាំជាតិដើម្បីចូលរួមក្នុងកិច្ចប្រជុំកំពូលពិសេសអូស្ត្រាលី-អាស៊ាននៅថ្ងៃទី៤-៦ ខែមីនា នៅទីក្រុងមែលប៊ន។
សភាពាណិជ្ជកម្មកម្ពុជាក៏គ្រោងនឹងចូលរួមក្នុងដំណើរទស្សនកិច្ចរបស់លោកនាយករដ្ឋមន្ត្រីនៅប្រទេសអូស្ត្រាលីដែរ។
យោងតាមអនុប្រធានរបស់ CCC លោក លឹម ហេង វេទិកាធុរកិច្ចមួយគ្រោងនឹងប្រារព្ធធ្វើនៅខែមីនា ក្នុងអំឡុងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន ម៉ាណែត នៅអូស្ត្រាលីក្នុងខែមីនា។
លោក បានឱ្យដឹងកាលពីថ្ងៃអាទិត្យថា៖ «វេទិកានេះមានគោលបំណងលើកកម្ពស់អាជីវកម្ម និងឱកាសវិនិយោគក្នុងប្រទេសកម្ពុជាដល់វិនិយោគិនដែលមានសក្តានុពលនៅទីនោះ ដើម្បីទាក់ទាញលំហូរនៃការវិនិយោគមកកម្ពុជា»។
លោកបានបន្តថា អូស្ត្រាលីត្រូវបានគេមើលឃើញថាជាប្រទេសមួយក្នុងចំណោមប្រទេសទទួលទំនិញកម្ពុជាច្រើនជាងគេក្នុងពិភពលោក ហើយជាអ្នកវិនិយោគដ៏មានសក្ដានុពលនៅកម្ពុជា។
តួលេខពីអគ្គនាយកដ្ឋានគយ និងរដ្ឋាករ បានបង្ហាញថា ពាណិជ្ជកម្មទ្វេភាគីរវាងកម្ពុជា និងអូស្ត្រាលី មានចំនួន ៥០២លានដុល្លារក្នុងឆ្នាំ២០២៣ កើនឡើង ១.០៥ភាគរយ ធៀបនឹងឆ្នាំ២០២២។
កម្ពុជាបាននាំចេញទំនិញប្រមាណ ៣៧០ លានដុល្លារទៅអូស្ត្រាលី កើនឡើង ១,៥៧ ភាគរយធៀបនឹងឆ្នាំមុន៕