លោកនាយករដ្ឋមន្ត្រី ហ៊ុន ម៉ាណែត បានដាក់បទបញ្ជាផ្អាកការប្រឡងជ្រើសរើសមន្ត្រីរាជការថ្មីសម្រាប់ឆ្នាំនេះ ដើម្បីធ្វើសវនកម្មមន្ត្រីរាជការផ្ទៃក្នុងស្ថាប័ន ដែលត្រូវត្រួតពិនិត្យនិងវាយតម្លៃឡើងវិញចំពោះមុខងារមន្ត្រីរាជការ ហើយត្រូវបែងចែកការប្រើប្រាស់ពួកគេឱ្យអស់លទ្ធភាព។
ក្នុងពិធីជួបសំណេះសំណាលជាមួយនឹងប្រជាសហគមន៍ខ្មែររស់នៅទ្វីបអឺរ៉ុបប្រមាណជាងពីរពាន់នាក់កាលពីថ្ងៃអាទិត្រ លោកនាយករដ្ឋមន្ត្រី ហ៊ុន ម៉ាណែត បានថ្លែងថា សមត្ថភាពមន្ត្រីរាជការនៅមានកម្រិតដែលកំពុងបម្រើការតាមស្ថាប័ន គឺត្រូវបណ្ដុះបណ្ដាលសមត្ថភាពនិងជំនាញពួកគេឡើងវិញជាជាងការប្រឡងជ្រើសរើសមន្ត្រីរាជការថ្មីដែលមិនចាំបាច់។
លោកនិយាយថា៖ «ខ្ញុំផ្អាកជ្រើសរើសមន្ត្រីថ្មីសម្រាប់ឆ្នាំនេះ ព្រោះឥឡូវយើងត្រូវខិតខំពង្រឹងដោយការសន្សំថវិកាជាជាងជ្រើសរើសមន្ត្រីថ្មីដែលមិនចាំបាច់ ហើយយកថវិកានោះមកបំប៉នមន្ត្រីរបស់យើងដែលខិតខំធ្វើការ។ នេះជាគោលការណ៍សំខាន់»។
លោកបានបញ្ជាក់ថា គោលការណ៍ប្រឡងជ្រើសរើសមន្ត្រីរាជការថ្មីចូលក្របខណ្ឌរដ្ឋត្រូវឡើងចាប់ពីពេលនេះទៅ ដាច់ខាតត្រូវតែសុក្រឹតភាពតាមយន្តការ «អ្នកចេះគឺជាប់» ដូចដែលក្រសួងមុខងារសាធារណៈនិងក្រសួងពាក់ព័ន្ធបានរៀបចំការប្រឡងជ្រើសរើសមន្ត្រីកសិកម្មឃុំ២៥០នាក់កាលពីកំលុងខែធ្នូឆ្នាំមុន ដើម្បីដាក់ពង្រាយតាមខេត្តគោលដៅ។
លោកបន្ថែមថា៖ «រាល់ការប្រឡងជ្រើសរើសមន្ត្រីរាជការចូលក្របខណ្ឌរដ្ឋដាច់ខាតត្រូវតែមានសុក្រឹតភាព តម្លាភាព និងយុត្តិធម៌ចំពោះអ្នកប្រឡងដែលពឹងលើសមត្ថភាពខ្លួនឯង»។
លោក យក់ ប៊ុនណា អ្នកនាំពាក្យក្រសួងមុខងារសាធារណៈ បានបញ្ជាក់ពីម្សិលមិញថា ក្រសួងមុខងារសាធារណៈនឹងសហការជាមួយក្រសួងពាក់ព័ន្ធ ដើម្បីរៀបចំយន្តការត្រួតពិនិត្យឡើងវិញមុខងាររបស់មន្ត្រីរាជការ និងរចនាសម្ព័ន្ធនៃការប្រើប្រាស់មន្ត្រីរាជការនៅតាមក្រសួងស្ថាប័ននានា។
លោកថា បន្ទាប់ពីធ្វើសវនកម្មរួចទើបអាចដឹងច្បាស់ពីតម្រូវការពិតប្រាកដនៅក្រសួងស្ថាប័នណាខ្លះដែលត្រូវការប្រឡងជ្រើសរើសមន្ត្រីរាជការបន្ថែម។
លោកបាននិយាយថា៖ «យើងនឹងធ្វើរបាយការណ៍ជូនរដ្ឋាភិបាល ដើម្បីស្នើសុំគោលការណ៍ប្រឡងជ្រើសរើសមន្ត្រីរាជការសម្រាប់ក្រសួងស្ថាប័នណាដែលមានតម្រូវការមន្ត្រីរាជការពិតប្រាកដ»។
លោកបានលើកឡើងថា ចំពោះផែនការជ្រើសរើសមន្ត្រីរាជការចូលក្របខណ្ឌរដ្ឋសម្រាប់ឆ្នាំ២០២៣ ដែលមិនទាន់បានបញ្ចប់សព្វគ្រប់ រដ្ឋាភិបាលបន្តអនុញ្ញាតឱ្យប្រឡងជ្រើសរើសមន្ត្រីរាជការចំនួន ២ ២៧៨កន្លែង ដើម្បីបញ្ចប់តាមផែនការ។
លោកបន្តថា ក្រសួងដែលបានអនុញ្ញាតប្រឡងជ្រើសរើសមន្ត្រីរាជការសម្រាប់ឆ្នាំ២០២៣ រួមមានក្រសួងកសិកម្ម រុក្ខាប្រមាញ់ និងនេសាទ ក្រសួងសាធារណការនិងដឹកជញ្ជូន ក្រសួងអភិវឌ្ឍន៍ជនបទ និងក្រសួងអប់រំ យុវជន និងកីឡា និងអង្គភាពប្រឆាំងអំពើពុករលួយ ដើម្បីជំនួសមន្ត្រីដែលបាត់ក្របខណ្ឌដោយសារការចូលនិវត្តន៍និងការទទួលមរណភាពជាដើម។
លោក ឡាំ សុជាតិ នាយកប្រតិបត្តិវិទ្យាស្ថានតស៊ូមតិនិងគោលនយោបាយ (API) ធ្លាប់បានលើកឡើងថា កំណែទម្រង់មន្ត្រីរាជការផ្ទៃក្នុងស្ថាប័នជាការល្អប្រសើរ ដើម្បីពង្រឹងគុណភាពការងាររបស់មន្ត្រីរាជការនៅតាមក្រសួងស្ថាប័ននានា។
លោកកត់សម្គាល់ឃើញថា បច្ចុប្បន្នមន្ត្រីរាជការមានចំនួនច្រើននៅតាមក្រសួងស្ថាប័ន ហើយពួកគេក៏មានប្រាក់បៀវត្សរ៍សមរម្យ ដែលគួរតែប្រឹងប្រែងធ្វើការងារស្របតាមតួនាទីនិងភារកិច្ចរបស់ខ្លួន ដើម្បីរួមគ្នាដោះស្រាយបញ្ហាតាមមូលដ្ឋានជូនប្រជាពលរដ្ឋ៕
Related Posts
- December 18, 2023
- September 3, 2023
- December 25, 2023
- September 3, 2023
