វិស័យកសិកម្មនៅតែជាកត្តាជំរុញសេដ្ឋកិច្ចមួយនៃកំណើនសេដ្ឋកិច្ចរបស់ប្រទេសកម្ពុជា បើទោះបីជាចំណែកនៃផលិតផលក្នុងស្រុកសរុប (GDP) របស់ប្រទេសនេះបានធ្លាក់ចុះក៏ដោយ។
នាពេលថ្មីៗនេះ រដ្ឋាភិបាលបានប្រកាសពីការអនុវត្តគោលនយោបាយយុទ្ធសាស្ត្រថ្មីសម្រាប់ការអភិវឌ្ឍកសិកម្ម សំដៅលើកកម្ពស់វិស័យកសិកម្មពីគ្រួសារទៅជាកសិកម្មពាណិជ្ជកម្ម និងលើកកំពស់ប្រាក់ចំណូលរបស់កសិករតាមរយៈផលិតផលតម្លៃបន្ថែម។
ក្រោមគោលនយោបាយថ្មី រដ្ឋាភិបាលចង់ក្លាយជាប្រទេសមួយក្នុងចំណោមប្រទេសផលិតកសិកម្មកំពូលទាំងដប់នៅលើពិភពលោក។
លោកនាយករដ្ឋមន្ត្រី ហ៊ុន ម៉ាណែត មានប្រសាសន៍ថា វិស័យកសិកម្មរួមចំណែកដល់គោលដៅរបស់ប្រទេសជាតិក្នុងការក្លាយជាសេដ្ឋកិច្ចដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
លោកបន្តថា៖ «វិស័យកសិកម្មជាវិស័យអាទិភាពដែលធានាសន្តិសុខស្បៀងអាហារូបត្ថម្ភនិងការនាំចេញ»។
លោក ហ៊ុន ម៉ាណែត បានមានប្រសាសន៍ថា៖ «ឥឡូវនេះ យើងបានដាក់ចេញនូវគោលនយោបាយបន្ថែម ដើម្បីពង្រឹងសក្តានុពលកសិកម្មរបស់យើង ដើម្បីជួយកសិករទទួលបានអត្ថប្រយោជន៍កាន់តែច្រើនពីវិស័យកសិកម្ម»។
លោកបន្ថែមថា គោលនយោបាយក៏មានគោលបំណងលើកកម្ពស់ការអនុវត្តកសិកម្មបែបប្រពៃណីទៅជាវិធីសាស្រ្តទំនើបផងដែរ។
លោកបានសង្កេតឃើញថា៖ «យើងត្រូវលើកកម្ពស់កសិកម្មប្រពៃណីតាមលក្ខណៈគ្រួសារទៅជាវិធីសាស្ត្រទំនើបដែលមានស្តង់ដារខ្ពស់។
កសិកម្មគឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចកម្ពុជា។ យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា វិស័យនេះបានរួមចំណែក ២៤.៤ ភាគរយដល់ផលិតផលក្នុងស្រុកសរុប (GDP) របស់ប្រទេសក្នុងឆ្នាំ ២០២១។
របាយការណ៍បាននិយាយថា កម្ពុជាបាននាំចេញកសិផលចំនួន ៧.៣១ លានតោនទៅកាន់ប្រទេស និងតំបន់ចំនួន ៧៥ ក្នុងអំឡុងពេលខែមករាដល់ខែវិច្ឆិកាឆ្នាំនេះ ដែលធ្លាក់ចុះ ៤.៦ ភាគរយ ធៀបនឹងឆ្នាំមុន។
តាមរបាយការណ៍របស់ក្រសួងបានឱ្យដឹងថា ប្រទេសកម្ពុជាទទួលបានប្រាក់ចំណូលសរុបចំនួន ៣.៩ ពាន់លានដុល្លារពីការនាំចេញផលិតផលកសិកម្មក្នុងរយៈពេល ១១ ខែដំបូងនៃឆ្នាំ ២០២៣ ។
លោក ងិន ឆៃ អគ្គនាយក នៃអគ្គនាយកដ្ឋានកសិកម្ម រុក្ខាប្រមាញ់ និងនេសាទ បានមានប្រសាសន៍ថា៖ «បើទោះបីជាការនាំចេញទំនិញធ្លាក់ចុះបន្តិចក្នុង 11 ខែដំបូងនៃឆ្នាំនេះក៏ដោយ យើងមានសុទិដ្ឋិនិយមថា កំណើននេះនឹងស្ទុះងើបឡើងវិញក្នុងពេលឆាប់ៗនេះ ដោយសារការនាំចេញរបស់យើងក្នុងខែវិច្ឆិកា មានការកើនឡើងគួរឱ្យកត់សម្គាល់»។
ការដៃនាំចេញកសិផលមានចំនួន ១៩.៥ ភាគរយនៃការនាំចេញសរុបរបស់កម្ពុជាដែលមានទឹកប្រាក់ ២០ ពាន់លានដុល្លារ ដែលក្នុងនោះ ពាក់កណ្តាលគឺជាផលិផលសម្រេចចេញពីរោងចក្រ ក្នុងអំឡុងខែមករាដល់ខែវិច្ឆិកា។
របាយការណ៍បានបន្តថា ការនាំចេញកសិផលសំខាន់ៗរួមមាន អង្ករ កៅស៊ូ ដំឡូងមី ស្វាយ ចេកស្រស់ ម្រេច ស្វាយចន្ទី វែង ពោត និងប្រេងដូង ក្នុងចំណោមផលិតផលផ្សេងទៀត។
លោក ហ៊ុន ឡាក់ មកពីសហព័ន្ធស្រូវអង្ករកម្ពុជាចាត់ទុកកំណើននៃការនាំចេញមកពីការខិតខំរបស់រដ្ឋាភិបាល។
លោកបន្តថា៖«រដ្ឋាភិបាលបានយកចិត្តទុកដាក់ខ្ពស់ និងបានខិតខំប្រឹងប្រែងយ៉ាងសំខាន់ក្នុងការពង្រីកទីផ្សារនាំចេញ។ កិច្ចខិតខំប្រឹងប្រែងទាំងនេះនឹងនាំមកនូវការអភិវឌ្ឍបន្ថែមទៀតដល់វិស័យកសិកម្ម និងជំរុញការនាំចេញបន្ថែមទៀត»” ។
យោងតាមរបាយការណ៍របស់អគ្គនាយកដ្ឋានកសិកម្មនៃក្រសួងកសិកម្មរុក្ខាប្រមាញ់ បានឱ្យដឹងថា ប្រទេសកម្ពុជាទទួលបានប្រាក់ចំណូលចំនួន ១.៣៥ ពាន់លានដុល្លារពីការនាំចេញអង្ករក្នុងរយៈពេល ១១ ខែដំបូងនៃឆ្នាំ២០២៣នេះ។
របាយការណ៍បានឱ្យដឹងថា ចាប់ពីខែមករាដល់ខែវិច្ឆិកា កម្ពុជាបាននាំចេញអង្ករជិត ៦ សែនតោនទៅកាន់ទីផ្សារបរទេស ដោយទទួលបានប្រាក់ចំណូលចំនួន ៥១៥ លានដុល្លារ និង ២.៤ លានតោនស្រូវដែលមានតម្លៃ៨១៤ លានដុល្លារ។
ពូជអង្ករដែលនាំចេញរួមមាន អង្ករក្រអូប អង្ករសរីរាង្គ អង្ករស អង្ករសំរូប និងអង្ករជប៉ុន។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា មានប្រសាសន៍ថា កិច្ចខិតខំប្រឹងប្រែងរួមគ្នារវាងរដ្ឋាភិបាល និងវិស័យឯកជនបានជួយដល់ការនាំចេញ។
កញ្ញាក៏បានលើកឡើងថា៖ «យើងធ្វើការរួមគ្នាជាមួយនឹងគោលដៅចម្បងក្នុងការនាំមកនូវអត្ថប្រយោជន៍សេដ្ឋកិច្ចសម្រាប់វិស័យកសិកម្មរបស់ប្រទេសកម្ពុជា ហើយដោយហេតុនេះជួយដល់កំណើនសេដ្ឋកិច្ចរបស់ប្រទេស»។
សហព័ន្ធស្រូវអង្ករកម្ពុជាបានកំណត់ ៧០ម៉ឺនតោន ជាគោលដៅនាំចេញអង្ករសម្រាប់កម្ពុជានៅឆ្នាំ២០២៣។
ប្រទេសចិន វៀតណាម និងថៃ ជាអ្នកនាំចូលទំនិញកសិកម្មរបស់កម្ពុជា។
ក្រៅពីអង្ករ គ្រាប់ស្វាយចន្ទី ម្រេច ស្វាយ ចេក និងដំឡូងមី គឺជាផលិតផលកសិកម្មដ៏សំខាន់ដែលត្រូវបានចុះបញ្ជីសម្រាប់អាទិភាពនាំចេញទៅកាន់ទីផ្សារបរទេស៕