Berria.info

2008-10-02

Edvige fitxategiaren aurkako mobilizazioak ezustean harrapatu du Frantziako Gobernua. Uztailaren 1ean, udan jende gutxiago ohartuko dela baliatuz, fitxategi erraldoia osatzeko dekretua onartu zuen Frantziako Gobernuak. Uztailaren 10ean xedearen aurka sinadurak biltzen hasi ziren. 205.000 lagunek izenpetu dute Frantzian eta Ipar Euskal Herrian. 1.139 elkarte, alderdi eta sindikatuk bat egin dute. Ikasturte berria hastearekin batera, Edvigeren aurkako mugimendua indartu da eta mobilizazioa antolatu dute urriaren 16rako.

«Gizarte osoaren fitxaketa sistematikoa da Edvige, jendearen eremu pribatuan gordetzen ziren elementuak Poliziaren esku utziko dituena», dio Christophe Stephany Edvigeren aurkako Ipar Euskal Herriko taldeko eledunak. Aldi berean, Miarritzeko gay eta lesbianen elkarteko presidentea da eta talde gisa Edvigeren jomuga direla jakinarazi du.

Frantzian gaur egun edo etorkizunean eragina edo ardura ukan dezakeen edozein pertsonari buruzko informazioa agertzen da Edvigen, sindikatu, alderdi edo elkarteetako kide izan. Arriskua sor dezaketen pertsonen jarraipena egitea da, dekretuaren sustatzaileen arabera, Edvigeren xedea. Alta, Michelle Alliot Marie Frantziako Barne ministroak berak aitortu zuen Edvige gaur egun baliatzen diren fitxategien arautzea baino ez dela.

Bertze hainbat legerekin ez bezala, Edvigeren aurkako borroka ezustean abiatu da. Lehen hilabetean hamar mila izenpetze baino ez zuten lortu. Irailak, aldiz, elkartasun uholde bat eragin du. Dekretuaren kontrako oldarrak gibelera egitera bultzatu du Frantziako Gobernua. «Garrantzitsuena dekretuaren helburua atxikitzea da, gatazkak eragiten dituzten elementuak baztertuz», erran zuen Nicolas Sarkozy Frantziako presidenteak protestak baretze aldera. Adostasuna lortzeko prozedura abian ezartzea eskatu zion Michelle Alliot Marie Frantziako Barne ministroari.

Geroztik alderdi eta sindikatuekin bildu da Alliot Marie, adostasunik erdietsi gabe. Edvigeren aurkako kolektiboko kideak, aldiz, ez ditu bilkurara deitu. «Neurri batzuk aldatuz jendea tronpatu eta dekretua bere horretan atxiki nahi du Alliot Mariek, baina ez gaitu tronpatuko, dekretua indargabetu arte mobilizazioari ekinen diogulako», dio Stephannyk. Irailaren 26an Donibane Lohizuneko Herriko Etxera eraman zuten protesta, Alliot Marie hango hautetsia delako.

Eskubideak urratuz nazien garaiko jarduerak indarrean ezarri nahi dituztela salatu du kolektiboak. Alliot Marieri erantzukizun berezia leporatzen diote, Euskal Herriko hautetsia eta Frantziako Barne ministroa izateagatik. Inkisizioaren desmasiak eta nazien zanpaketa pairatu duen herriak izaera berezia duela dio Stephanyk. Hego Euskal Herriko biztanleei ere arduratsu ihardesteko eskatzen die. «Muga administratiboak herri hau bitan zatitzen badu ere, kultura bera dugu eta elkarlanean oinarritzen gara». Frantziako Gobernuak ez du zehaztu nor egonen den fitxategian. Hendaiako sagarno eguna, Nafarroaren Eguna edo Euskal Herria Zuzenean adibide gisa aipatuz, elkarlanean aritzen diren partaide guztiak fitxategian egonen direla ohartarazten du, Hego zein Ipar Euskal Herrikoak izan.

Elkarte munduak Ipar Euskal Herrian duen dimentsioa ekarri zuen gogora. Hiru lagunetik bat elkarte bateko kidea da. Eta fitxategian kideen lagunak ere agertuko dira. Musean aritzeak, igandetan onddoketara joateak, herriko kermesera joateak edo bizikletan ibiltzeak Frantziako segurtasunari eragozpenik ez diola egiten gaineratu du.

Edvigeren ordez, Edvirsp

Adostasunak emaitzak behar ditu eta, ontsalaz, izen berria. Edvige fitxategiari izena ere aldatu nahi dio orain Alliot Mariek. Edvirsp izena ezarri nahi dio. Kontrako elkarteek ironia handiz hartu dute iragarpena. «Jendeari sobera erraza zitzaion Edvige izena baliatzea manifestazioetan, eta, horregatik, ahoskatu ezin den izen bat ezarri dio, haserrea eztarrietan itotzeko». Baina oraindik deus ez du erabaki Frantziako Gobernuak. Hilabete honetan behin betiko xedea zein den erabakitzea espero dute.

Alliot Mariek iragarri ditu dagoeneko «adostasunaren» nondik norakoak. Prest agertu da sexu joeren edo osasun egoeren aipamena kentzeko fitxategitik. Alta, ez du onartzen fitxaketa 13 urteko gaztetatik abiatzea. Ez du zehaztu fitxaketa horrek iraungitze data duen edo ez.

Gisa berean, erakundeetan ardurak dituzten pertsonak fitxategitik at uzteko aukera aztertu du Frantziako Gobernuak.

Baina Benisti txostenean oinarritutako dinamika gogoan dute gizarte eragileek. Delinkuentzia aurreikusi eta borrokatzeko neurriak aipatzen zituen txosten hark. Bertan bildutako azterketa orokorra, aldiz, hainbat legetan ezarri dute indarrean. Horren fruitu dira eskolaren kalitate legeko, etorkinen legeko eta berdintasunaren legeko hainbat atal, adibidez. Fitxategi batetik ken dezaketena bertze batean bil dezketela diote kontrakoek, eta dekretua osoki deuseztatzeko eskatu dute.