នាយករដ្ឋមន្ត្រី ហ៊ុន ម៉ាណែត ពីម្សិលមិញបានចេញសារណែនាំរដ្ឋមន្ត្រីតាមក្រសួងនីមួយៗដែលមិនទាន់បែងចែកភារកិច្ចច្បាស់សម្រាប់រដ្ឋលេខាធិការដ្ឋានទេ ត្រូវប្រញាប់ប្រញាល់បែងចែកជាបន្ទាន់ ដើម្បីធានាដល់ការដឹកនាំនិងលើការងារអនុវត្តការងាររបស់ក្រសួងស្ថាប័ន។
សារជាសំឡេងដែលមានរយៈពេលជិតបួននាទីរបស់លោកនាយករដ្ឋមន្ត្រី ហ៊ុន ម៉ាណែត បានបញ្ជាក់ថា លោកទុកពេលមួយសប្ដាហ៍ ដើម្បីឱ្យរដ្ឋមន្ត្រីតាមក្រសួងនីមួយៗបែងចែកភារកិច្ចការងាររបស់រដ្ឋលេខាធិការនិងអនុរដ្ឋលេខាធិការឱ្យបានច្បាស់លាស់។
លោកបន្តថា នេះជាកិច្ចការចាំបាច់និងអាទិភាពពាក់ព័ន្ធនឹងការរៀបចំដំណើរការក្រសួងនិងរដ្ឋលេខាធិការដ្ឋាននីមួយៗ ដើម្បីធានានិរន្តរភាពនិងប្រសិទ្ធភាពការងារសម្រាប់ដំណើរការងាររបស់ក្រសួងនីមួយៗដែលចុះរដ្ឋាភិបាល។
លោកសង្កត់សម្ដីថា ការបែងចែកនេះ គឺត្រូវមានការបែងចែកឱ្យបានច្បាស់លាស់រវាងការដឹកនាំខាងផ្នែកនយោបាយ និងការដឹកនាំខាងផ្នែកបច្ចេកទេស ដើម្បីធានាប្រសិទ្ធភាពស្ថាប័ននិងប្រសិទ្ធភាពការងារ និងដើម្បើចៀសវាងការលូកដៃលើការងាររបស់អង្គភាពជំនាញក្រសួងស្ថាប័នដោយមិនឆ្លងឬដោយរំលងឋានានុក្រមបច្ចេកទេស។
លោកបន្ថែមថា ប្រសិនបើមានការរៀបចំមន្ត្រីទទួលបន្ទុកការដឹកនាំខាងផ្នែកនយោបាយ ឬការងារជួយទៅដល់នាយកដ្ឋានដាច់ខាតមិនត្រូវអនុញ្ញាតរំលងឋានានុក្រមដឹកនាំខាងផ្នែកបច្ចេកទេស ដូចជាការរំលងឬមិនឆ្លងលេខាធិការដ្ឋានឬអគ្គលេខាធិការដ្ឋានឡើយ។
លោកបាននិយាយថា៖ «ត្រូវចាត់ទុកថាការធានានៅឯកភាពសាមគ្គីភាពនិងសុខដុមរមនីយកម្មការងារនៅក្នុងស្ថាប័នរដ្ឋបាលសាធារណៈ ដើម្បីលើកកម្ពស់ប្រសិទ្ធភាពការងារ គឺជាកិច្ចការអទិភាពដែលយើងត្រូវយកចិត្តទុកដាក់ខ្ពស់ទាំងអស់គ្នា»។
លោកបន្តថា៖ «នៅចំពោះមុខត្រូវខិតខំធានាឱ្យបាននូវនិរន្តរភាពនិងស្ថេរិភាពនៃការអនុវត្តការងារនៅក្នុងស្ថាប័ន។ ក្នុងករណីចាំបាច់ គឺត្រូវធ្វើវិចារណកម្មមុខងារក្នុងថ្នាក់បច្ចេកទេសនិងរៀបចំមន្ត្រីឡើងវិញ។ ត្រូវគិតគូរទលើមូលដ្ឋានចំនួន២ ដែលខ្ញុំធ្លាប់បានណែនាំកន្លងមកនេះ គឺផ្ដោតជាចម្បងលើគុណសម្បត្តិ ស្នាដៃ ការងារ សមត្ថភាព ចំណេះដឹង ទេពកោសល្យ និងក្រមសីលធម៌របស់មន្ត្រី ដើម្បីបង្កើនប្រសិទ្ធភាពការងារ។ ចំណែកមួយទៀត គឺគោលការណ៍គុណធម៌និងក្រមសីលធម៌ ដើម្បីធានាបានឯកភាពនិងសាមគ្គភាពផ្ទៃក្នុងរបស់ក្រសួងស្ថាប័ន»។
ជាមួយគ្នានេះ លោក ហ៊ុន ម៉ាណែត លើកទឹកចិត្តដល់មន្ត្រីចាស់ដែលមានបទពិសោធ និងមន្ត្រីថ្មីដែលជាកម្លាំងថ្មីត្រូវធ្វើការងារជាមួយគ្នា ដើម្បីលើកកម្ពស់សមត្ថភាពស្ថាប័នកាន់តែរឹងមាំនិងប្រកបដោយប្រសិទ្ធភាព។
លោក ប៉ែន បូណា អ្នកនាំពាក្យរដ្ឋាភិបាល បានបញ្ជាក់ថា នេះជាសារដ៏សំខាន់និងបន្ទាន់ ដែលលោកនាយករដ្ឋមន្ត្រីចង់បានប្រសិទ្ធភាពការងារ ព្រោះនៅតាមក្រសួងនីមួយៗមានរដ្ឋលេខាធិការនិងអនុរដ្ឋលេខាធិការច្រើនដែលមិនទាន់បានបែងចែក។ ដូច្នេះការបែងចែកភារកិច្ចគ្នាច្បាស់លាស់ទើបមានប្រសិទ្ធភាពការងារ ជាពិសេសការបែងចែកឱ្យបានច្បាស់រវាងភារកិច្ចខាងផ្នែកនយោបាយនិងភារកិច្ចខាងផ្នែកបច្ចេកទេសឱ្យបានត្រឹមត្រូវ។
លោកបន្តថា ពីអាណត្តិមុនៗក៏មានការបែងចែកភារកិច្ចការងារដល់រដ្ឋលេខាធិការនិងអនុរដ្ឋលេខាធិការសម្រាប់ក្រសួងនីមួយៗដែរ ប៉ុន្តែជាធម្មតា នៅពេលក្រសួងមានរដ្ឋមន្ត្រីថ្មីចូលកាន់តំណែងដឹកនាំក្រសួង គឺគាត់ត្រូវតែបែងចែកភារកិច្ចសម្រាប់រដ្ឋលេខាធិការនិងអនុរដ្ឋលេខាធិការជាថ្មីឡើងវិញ។ ក្នុងចំណោមនោះក៏មានរដ្ឋលេខាធិការនិងអនុរដ្ឋលេខាធិការទើបតែងតាំងថ្មីដែលត្រូវមានភារកិច្ចការងារមួយច្បាស់លាស់សម្រាប់ពួកគេដែរ។
លោក ប៉ែន បូណា និយាយថា៖ «អ្វីដែលលោកចង់បាន គឺប្រសិទ្ធភាពការងារនិងសាមគ្គីភាពផ្ទៃក្នុង»។
លោករំពឹងថា៖ «ពីមុនមក រដ្ឋាភិបាលបានធ្វើកិច្ច
ការងារនិងបានបន្សល់ទុកសមិទ្ធផលជាច្រើនក្រោមការដឹកនាំរបស់អតីតនាយករដ្ឋមន្ត្រី ហ៊ុន សែន។ ចំណែកសម្រាប់រដ្ឋាភិបាលបន្តវេនត្រូវតែជំរុញលើការរក្សាសមិទ្ធផលដែលមានស្រាប់ ហើយបន្តជំរុញការអនុវត្តបានសមិទ្ធផលថ្មីៗបន្ថែមទៀត។ ពេលនៅដំណើរការ គឺនាយករដ្ឋមន្ត្រីចង់បានប្រសិទ្ធភាពការងារ»។
លោកសង្ឃឹមយ៉ាងមុតមោះថា៖ «មេដឹកនាំថ្មីដែលជាយុវជនមានកម្លាំងថាមពលចំណេះជំនាញច្បាស់លាស់ជាមួយនឹងការតាំងចិត្តខ្ពស់។ អ៊ីចឹងចំណុចទាំងបីនេះ យើងសង្ឃឹមថានឹងរុញដំណើរការទៅមុន ហើយមួយទៀតយើងមានមន្ត្រីដែលមានបទពិសោធជាច្រើននៅក្នុងក្រសួងមន្ទីរនីមួយៗដែលអាចនឹងជួយតម្រែតម្រង់ទិស»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានលើកឡើងថា មិនលឿនពេកទេចំពោះការទុកពេលមួយសប្ដាហ៍ ដើម្បីឱ្យរដ្ឋមន្ត្រីតាមក្រសួងនីមួយរៀបចំការបែងចែកភារកិច្ចសម្រាប់រដ្ឋលេខាធិការនិងអនុរដ្ឋលេខាធិការ ព្រោះមន្ត្រីរដ្ឋលេខាធិការនិងអនុរដ្ឋលេខាចាស់មួយចំនួនស្ថិតនៅក្នុងក្រសួងស្រាប់ដែលមិនពិបាកកំណត់អត្តសញ្ញាណនិងធ្វើការវាយតម្លៃអំពីលក្ខណសម្បត្តិ ដើម្បីទទួលខុសត្រូវក្នុងភារកិច្ចបណ្ដាក្រសួងនិងរដ្ឋលេខាធិការដ្ឋានទេ។
លោកបាននិយាយថា៖ «បន្ទាប់ពីការរៀបចំរដ្ឋាភិបាលរហូតមកដល់ពេលនេះ គឺមានរយៈពេលជាង១០ថ្ងៃហើយ។ ដូច្នេះគួរតែក្រសួងស្ថាប័នបានបែងចែកភារកិច្ចរបស់មន្ត្រី ដើម្បីធានានិរន្តរភាពនិងប្រសិទ្ធភាព ចៀសវាងការរាំងស្ទះដល់ការងារណាមួយដែលនាំដល់ការប៉ះពាល់និរន្តរភាពរដ្ឋបាលរបស់រដ្ឋ»។
លោកបានបង្ហាញការគាំទ្រចំពោះការបែងចែកភារកិច្ចការងារសម្រាប់រដ្ឋលេខាធិការនិងអនុរដ្ឋលេខាធិការទាំងខាងផ្នែកនយោបាយ និងខាងផ្នែកបច្ចេកទេស ហើយត្រូវធ្វើតាមឋនានុក្រមរដ្ឋបាល ជារឿងសំខាន់ដើម្បីឱ្យអ្នកជំនាញនីមួយៗអាចផ្ដល់យោបល់ដល់ថ្នាក់ដឹកនាំក្នុងការធានាដល់មូលដ្ឋានដឹកនាំស្ថាប័ន៕