កម្ពុជា តាមរយៈអគ្គស្នងការនគរបាលជាតិ បានស្នើរដ្ឋាភិបាលឥណ្ឌា ផ្តល់អាហារូបករណ៍ដល់មន្ត្រីនគរបាលជាតិកម្ពុជាលើការបណ្តុះបណ្តាលជំនាញបច្ចេកវិទ្យាទំនើប ដើម្បីឆ្លើយតបទៅនឹងបទល្មើសឆបោកតាមប្រព័ន្ធអនឡាញ។
ក្នុងជំនួបពិភាក្សាការងារជាមួយលោកស្រី ដេវីយ៉ានី អ៊ុតាំ ខូប្រាហ្គេត (Devyani Uttam Khobragade) ឯកអគ្គរដ្ឋទូតឥណ្ឌាប្រចាំកម្ពុជា នៅក្រសួងមហាផ្ទៃ កាលពីថ្ងៃព្រហស្បតិ៍ នាយឧត្តមសេនីយ៍ ស ថេត អគ្គស្នងការនគរបាលជាតិ បានលើកឡើងពីកិច្ចខិតខំរបស់នគរបាលជាតិកម្ពុជា ដែលសកម្មក្នុងការប្រយុទ្ធប្រឆាំងទប់ស្កាត់បទល្មើសលួចឆ្លងដែនគ្រប់ប្រភេទ និងបទល្មើសមានការចាត់តាំង ជាពិសេសបទល្មើសឆបោកតាមប្រព័ន្ធបច្ចេកវិទ្យាអនឡាញ។
នាយឧត្តមសេនីយ៍ ក៏បានស្នើភាគីឥណ្ឌា ពិនិត្យលទ្ធភាពបង្កើតយន្តការទំនាក់ទំនងផ្តល់ព័ត៌មានទៅវិញទៅមកពាក់ព័ន្ធមុខសញ្ញាសង្ស័យ ឬខ្សែរយៈបណ្តាញឱ្យបានទាន់ពលវេលា និងច្បាស់លាស់ ដើម្បីធានាដល់ការចាត់វិធានការបង្ក្រាបឱ្យមានប្រសិទ្ធភាព និងទាន់ពេលវេលា។
នាយឧត្តមសេនីយ៍ ក៏បានស្នើរដ្ឋាភិបាលឥណ្ឌា លើកកម្ពស់សមត្ថភាពមន្ត្រីនគរបាលជាតិកម្ពុជា តាមរយៈការផ្តល់អាហារូបករណ៍បញ្ជូនទៅបណ្តុះបណ្តាលលើមុខជំនាញបច្ចេកវិទ្យាទំនើប ដើម្បីឆ្លើយតបទៅនឹងបទល្មើសឆបោកតាមប្រព័ន្ធអនឡាញ និងបទល្មើសពាក់ព័ន្ធ។
លោកស្រី ដេវីយ៉ានី អ៊ុតាំ ខូប្រាហ្គេត បានសម្តែងការអបអសាទរចំពោះនាយឧត្តមសេនីយ៍ ស ថេត ដែលត្រូវបានតែងតាំងជាអគ្គស្នងការនគរបាលជាតិ និងបានលើកឡើងពីកិច្ចការងារពង្រឹងកិច្ចសហប្រតិបត្តិការ ដើម្បីធានាសន្តិសុខ សណ្តាប់ធ្នាប់ និងសុវត្ថិភាពប្រជាពលរដ្ឋនៃប្រទេសទាំងពីរឱ្យកាន់តែមានប្រសិទ្ធភាពបន្ថែមទៀត។
លោកស្រីក៏បានថ្លែងអំណរគុណចំពោះអគ្គស្នងការដ្ឋាននគរបាលជាតិ ដែលបានផ្តល់កិច្ចសហការបាន យ៉ាងល្អជាមួយតំណាងស្ថានទូតឥណ្ឌាប្រចាំកម្ពុជា ដើម្បីជួយសង្គ្រោះប្រជាពលរដ្ឋឥណ្ឌា ដែលរងគ្រោះដោយអំពើឆបោកជាច្រើននាក់ក្នុងពេលកន្លងមក។
ឯកអគ្គរដ្ឋទូតឥណ្ឌា ក៏បានថ្លែងអំណរគុណដល់រដ្ឋាភិបាលកម្ពុជា ក្រសួងមហាផ្ទៃ ក៏ដូចជាអគ្គនាយកដ្ឋានចំណុះពាក់ព័ន្ធ ដែលបានជួយសម្រួលដល់ប្រជាពលរដ្ឋឥណ្ឌា ឱ្យបានធ្វើមាតុភូមិនិវត្តន៍ទៅកាន់ប្រទេសកំណើតវិញដោយគ្មានការផាកពិន័យ ពាក់ព័ន្ធនឹងការស្នាក់នៅលើសទិដ្ឋាការ។
លោកស្រី ដេវីយ៉ានី អ៊ុតាំ ខូប្រាហ្គេត បានសន្យាជាមួយនាយឧត្តមសេនីយ៍ ស ថេត នឹងនាំរាល់សំណូមពរពាក់ព័ន្ធការបណ្តុះបណ្តាលកសាងធនធានមនុស្សលើបច្ចេកវិទ្យាទំនើប ទៅកាន់ស្ថាប័នដែលមានសមត្ថកិច្ចពាក់ព័ន្ធ ដើម្បីពិនិត្យលទ្ធភាពផ្តល់អាហារូបករណ៍ដល់មន្ត្រីនគរបាលជាតិកម្ពុជា។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានឱ្យដឹងថា បើគិតតាំងពីអតីតកាល រហូតដល់បច្ចុប្បន្ន ទំនាក់ទំនងរវាងកម្ពុជា និងឥណ្ឌា គឺមានភាពល្អប្រសើរ មានស្ថិរភាព និងនិរន្តរភាព។
លោកបញ្ជាក់ថា មូលហេតុដែលមានស្ថិរភាព និងនិរន្តរភាព ព្រោះទំនាក់ទំនងរវាងប្រទេសទាំងពីរនេះ មិនដែលអាក់ខានជាមួយគ្នានោះទេ ទោះកម្ពុជាមានការប្រែប្រួលបរិបទនយោបាយក៏ដោយ។
លោកបន្តថា សូម្បីកាលពីឆ្នាំ១៩៧៩ និងឆ្នាំ១៩៨០ ដែលកម្ពុជានៅតែបន្តមានវិបត្តិនយោបាយក្នុងប្រទេស ក៏រដ្ឋាភិបាលឥណ្ឌា ពុំដែលកាត់ផ្ដាច់ការទូតជាមួយកម្ពុជាឡើយ ដូច្នេះឥណ្ឌា គឺជាប្រទេសតែមួយនៃប្រទេសសេរីដែលទទួលស្គាល់រដ្ឋាភិបាលសាធារណរដ្ឋប្រជាមានិតកម្ពុជា ក្រោយថ្ងៃកម្ពុជារំដោះចេញពីរបបកម្ពុជាប្រជាធិបតេយ្យឆ្នាំ១៩៧៩។
លោក គិន ភា បន្ថែមថា៖ «សាធារណរដ្ឋឥណ្ឌា ក៏បានរួមចំណែកជាច្រើនលើការកសាងសន្តិភាពនៅកម្ពុជា ជាពិសេសជួយកម្ពុជាលើការអភិវឌ្ឍវិស័យធនធានមនុស្ស វិស័យវប្បធម៌ សុខាភិបាល ធនធានទឹក ការជួសជុលប្រាសាទខ្មែរនៅកម្ពុជា និងគាំទ្រកម្ពុជាលើវិស័យផ្សេងៗជាច្រើនទៀត»។
កាលពីឆ្នាំ២០២៣ រដ្ឋាភិបាលឥណ្ឌា បានសន្យាពង្រីកវិសាលភាពនៃកិច្ចសហប្រតិបត្តិការលើបច្ចេកទេសក្នុងវិស័យសុខាភិបាលនៅកម្ពុជា ដើម្បីគាំទ្រផែនការអាទិភាពរបស់ក្រសួងសុខាភិបាល និងរដ្ឋាភិបាលកម្ពុជា ក្នុងការជំរុញវិស័យសុខាភិបាលឱ្យកាន់តែប្រសើរទាំងបច្ចុប្បន្ន និងអនាគត។
ក្នុងនោះ រដ្ឋាភិបាលឥណ្ឌា នឹងពិនិត្យលទ្ធភាពផ្ដល់រូបភាពពីផ្កាយរណបសម្រាប់ព្យាករទឹកជំនន់ក្នុងរដូវវស្សាឱ្យមានប្រសិទ្ធភាព និងសន្យាបណ្ដុះបណ្ដាធនធានមនុស្សលើវិស័យធនធានទឹក និងឧតុនិយម ដែលជាសេនាធិការរបស់ក្រសួងធនធានទឹក និងឧតុនិយមនៅកម្ពុជាផងដែរ។
រដ្ឋាភិបាលឥណ្ឌា ក៏បានគាំទ្រលើការងារស្ដារ និងអភិរក្សប្រាសាទបុរាណនៅកម្ពុជា ជាពិសេសសកម្មភាពបោសសម្អាតមីន ដើម្បីលើកស្ទួយវិស័យវប្បធម៌ និងចូលរួមសកម្មភាពកម្ពុជាគ្មានមីននៅត្រឹមឆ្នាំ២០២៥៕
Related Posts
- April 11, 2023
- September 5, 2023
- April 5, 2023
February 14, 2023
