យោងតាមអង្គការយូណេស្កូ ដោយមានកម្មករជាង ៣ ពាន់នាក់ ដែលភាគច្រើនជាស្ត្រី បានបញ្ចប់ដោយជោគជ័យនូវកម្មវិធីអក្ខរកម្មរោងចក្រ គំនិតផ្តួចផ្តើមនេះកំពុងដើរតួនាទីយ៉ាងសំខាន់ក្នុងការលើកកម្ពស់ជីវិតរបស់កម្មករស្ត្រី ជាពិសេសនៅក្នុងឧស្សាហកម្មកាត់ដេរ។
នៅក្នុងសេចក្តីថ្លែងការណ៍ចុងក្រោយរបស់ខ្លួនស្តីពីកម្មវិធី អង្គការយូណេស្កូបានគូសបញ្ជាក់អំពីការផ្លាស់ប្តូរកម្មវិធីអក្ខរកម្មរោងចក្រដែលត្រូវបានបង្កើតឡើងក្នុងឆ្នាំ ២០១៦ បាននាំមកនូវករណីសិក្សាពិសេស។
គំនិតផ្តួចផ្តើមនេះ ជាកម្មវិធីអប់រំដ៏លេចធ្លោមួយរបស់ក្រសួងអប់រំ យុវជន និងកីឡា គាំទ្រដោយអង្គការយូណេស្កូ។ វាផ្តោតលើការលើកកម្ពស់អក្ខរកម្ម ការអភិវឌ្ឍជំនាញ និងសមភាពយេនឌ័រ។ វាត្រូវបានអនុវត្តដោយភាពជាដៃគូជាមួយដៃគូឧស្សាហកម្ម រួមមានសមាគមវាយនភណ្ឌ សំលៀកបំពាក់ ស្បែកជើង និងទំនិញធ្វើដំណើរនៅកម្ពុជា។
អង្គការយូណេស្កូ និយាយថា គំនិតផ្តួចផ្តើមផ្តល់កម្មវិធីអក្ខរកម្មកាត់ដេរ ដើម្បីបំពាក់ឱ្យកម្មកររោងចក្រកាត់ដេរ ដែលក្នុងនោះជាង ៩៥ ភាគរយជាស្ត្រី នូវមុខងារអក្ខរកម្ម និងជំនាញលេខ ដើម្បីកែលម្អការអាន ការសរសេរ ការត្រិះរិះពិចារណា ការទំនាក់ទំនងការងារ និងការអនុវត្តការងារ។
វាបន្តថា៖ «លើសពីនេះ កម្មវិធីជ្រើសរើស និងបណ្តុះបណ្តាលគ្រូបង្រៀនអក្ខរកម្មនៅក្នុងរោងចក្រដៃគូ ដើម្បីគាំទ្រដល់ការផ្តល់ថ្នាក់អក្ខរកម្ម»។
អង្គការនេះដកស្រង់សម្តីអ្នកស្រី សាវន មឿង ដែលជាគ្រូបង្រៀនថ្នាក់អក្ខរកម្ម ដោយបាននិយាយថា៖ «ខ្ញុំតែងតែសប្បាយចិត្ត និងរំភើបចិត្តដែលឃើញអ្នករៀនបញ្ចប់ថ្នាក់អក្ខរកម្មរបស់ខ្ញុំ។ ពួកគេខ្លះបានចូលថ្នាក់រៀនដោយមិនដឹងពីរបៀបកាន់ប៊ិចឱ្យបានត្រឹមត្រូវផង តែឥឡូវពួកគេអាចអាន និងសរសេរដោយទំនុកចិត្តបន្ទាប់ពីរយៈពេលបួនខែ»។
កម្មវិធីអក្ខរកម្មរោងចក្រគឺជាផ្នែកមួយនៃដំណាក់កាលទីពីរនៃកម្មវិធីការងារសមរម្យសម្រាប់យុវជននៅកម្ពុជា ដែលជាកម្មវិធីរួមគ្នារបស់អង្គការសហប្រជាជាតិគាំទ្រដោយទីភ្នាក់ងារស្វីសសម្រាប់អភិវឌ្ឍន៍ និងកិច្ចសហប្រតិបត្តិការ និងអង្គការយូណេស្កូ។
រួមជាមួយនឹងដៃគូយុទ្ធសាស្ត្រសមាគមវាយនភណ្ឌ សម្លៀកបំពាក់ ស្បែកជើង និងទំនិញធ្វើដំណើរនៅកម្ពុជា គំនិតផ្តួចផ្តើមផ្តល់ថ្នាក់រៀនតាមកន្លែងធ្វើការ ដើម្បី់ឱ្យកម្មកររោងចក្រមានចំណេះដឹង និងជំនាញលេខ ដើម្បីបង្កើនការអាន ការសរសេរ ការគិតពិចារណា ការទំនាក់ទំនងការងារ និងការអនុវត្តការងារ។
យូណេស្កូបានបន្ថែមថា៖«រោងចក្រកាត់ដេរដែលចូលរួមផ្តល់ទាំងជំនួយផ្នែកហិរញ្ញវត្ថុ និងផ្នែកហិរញ្ញវត្ថុ ដើម្បីគាំទ្រដល់ការអនុវត្តកម្មវិធីអក្ខរកម្មរោងចក្រ ។ ចាប់តាំងពីការចាប់ផ្តើមរបស់ខ្លួន កម្មករជាង ៣,១០០ នាក់ ដែល ៩៥ ភាគរយជាស្ត្រី បានទទួលអត្ថប្រយោជន៍ពីកម្មវិធីនេះ»។
កញ្ញា ណៃ សិស្សមកពីថ្នាក់របស់អ្នកស្រី សាវន បានចែករំលែកជាមួយអង្គការយូណេស្កូថា សកម្មភាពដែលនាងចូលចិត្តក្នុងថ្នាក់គឺល្បែងមួយឈ្មោះថា “ប៉េងប៉ោង“ ដែលអ្នកសិក្សាត្រូវបានបែងចែកជាក្រុមដែលប្រកួតប្រជែងគ្នាដោយស្រែកពាក្យដែលគេបានរៀន។
កញ្ញាបាននិយាយថា៖ «ដោយសារថ្នាក់អក្ខរកម្ម ខ្ញុំរីករាយនឹងការធ្វើដំណើរពីរោងចក្រទៅផ្ទះរបស់ខ្ញុំឥឡូវនេះ។ ខ្ញុំមើលផ្លាកសញ្ញាផ្លូវ ហើយឥឡូវនេះខ្ញុំអាចអានលេខ និងអក្សរនៅលើពួកវាបាន។ សូម្បីតែការអានពាក្យពីការផ្សាយពាណិជ្ជកម្មនៅលើផ្ទាំងប៉ាណូក៏នាំមកនូវភាពរីករាយដែរ»។
លោក Andrew Tey នាយកមជ្ឈមណ្ឌលនៃវិទ្យាស្ថានបណ្ដុះបណ្ដាលកាត់ដេរកម្ពុជាបាននិយាយថា វាមានសារៈសំខាន់សម្រាប់រោងចក្រក្នុងការផ្តល់ឱកាសដល់កម្មករកម្ពុជាក្នុងការអភិវឌ្ឍន៍បុគ្គល និងវិជ្ជាជីវៈ។
លោកថា៖«អក្ខរកម្ម និងលេខគឺជាជំនាញមូលដ្ឋានសម្រាប់ការលើកកម្ពស់ផលិតភាព និងជីវភាពរបស់កម្មករ។ ផលិតភាពកម្មករកាន់តែខ្ពស់ដែលកើតឡើងបន្ទាប់នឹងមកនាំឱ្យមានផលិតភាពរោងចក្រកាន់តែប្រសើរឡើង និងប្រសិទ្ធភាព»៕