នាយកគ្រប់គ្រងគុណភាព និងការផ្គត់ផ្គង់គ្រាប់ធញ្ញជាតិនៃក្រុមហ៊ុន Bühler Group ចាប់អារម្មណ៍លើការពង្រីកការវិនិយោគរបស់ក្រុមហ៊ុន ដោយនាំយកបច្ចេកវិទ្យាទំនើបមកអភិវឌ្ឍវិស័យកសិកម្មនៅកម្ពុជា រាប់ចាប់ពីដំណើរការដាំដុះ និងការប្រមូលផល រហូតដល់ការកែច្នៃសម្រាប់នាំចេញទៅក្រៅប្រទេស។
លោកស្រី Mary Akinyi Olwal នាយិកាគ្រប់គ្រងគុណភាព និងការផ្គត់ផ្គង់គ្រាប់ធញ្ញជាតិ នៃ ក្រុមហ៊ុន Bühler Group បានជម្រាបជូន ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តីកម្ពុជា នៅថ្ងៃទី ខែមករា ឆ្នាំ២០២៤ ក្នុងអំឡុងជំនួបសម្តែងការគួរសមជាមួយឯកឧត្តមបណ្ឌិត នាយករដ្ឋមន្រ្តីនៅឯវេទិកាសេដ្ឋកិច្ចពិភពលោកឆ្នាំ២០២៤ នៅទីក្រុងដាវ៉ូស ប្រទេសស្វីស។
ក្នុងជំនួបនោះ ឯកឧត្តមបណ្ឌិត នាយករដ្ឋមន្ត្រី បានសង្កត់ធ្ងន់ថា រាជរដ្ឋាភិបាលថ្មី នីតិកាលទី៧ នៅតែយកចិត្តទុកដាក់ផ្តល់អាទិភាពដល់វិស័យកសិកម្ម តាមរយៈជំនួយហិរញ្ញវត្ថុ ដើម្បីជំរុញផលិតកម្ម ទីផ្សារ និងរក្សាតម្លៃកសិផល និងការដាក់ពង្រាយមន្ត្រីបច្ចេកទេសកសិកម្មនៅគ្រប់ឃុំ ជាមួយសកម្មភាពកសិកម្ម នៅទូទាំងប្រទេស។
ឯកឧត្តមបណ្ឌិត នាយករដ្ឋមន្ត្រី ហ៊ុន ម៉ាណែត បានស្វាគមន៍ចំពោះគោលបំណងរបស់ ក្រុមហ៊ុន Bühler Group ក្នុងការពង្រីក និងនាំយកបច្ចេកវិទ្យាថ្មីៗ ដើម្បីគាំទ្រដល់ផលិតកម្មកសិកម្ម ការអភិវឌ្ឍន៍ធនធានមនុស្ស និងការរក្សាទុកផលិតផលកសិកម្មរយៈពេលវែងរបស់ប្រទេសកម្ពុជា។
ឯកឧត្តមបណ្ឌិត នាយករដ្ឋមន្ត្រី បានលើកទឹកចិត្តឱ្យក្រុមហ៊ុនបន្តសហការជាមួយក្រសួងស្ថាប័នពាក់ព័ន្ធ ជាពិសេសក្រសួងកសិកម្ម រុក្ខាប្រមាញ់ និងនេសាទ ដើម្បីជួយគាំទ្រ និងជំរុញការស្រាវជ្រាវ និងអភិវឌ្ឍន៍។