បច្ចុប្បន្ន ឥណ្ឌាគឺជាទីផ្សារទេសចរណ៍ដែលមានការកើនឡើងលឿនបំផុតរបស់វៀតណាមជាមួយនឹងចំនួន ភ្ញៀវទេសចរកាលពីឆ្នាំមុន កើនឡើង ២៣១% ធៀបនឹងឆ្នាំ២០១៩ ដែលជាឆ្នាំមុនជំងឺកូវីដ ផ្ទុះឡើង។
យោងតាមទិន្នន័យពីអាជ្ញាធរជាតិទេសចរណ៍វៀតណាម បានបង្ហាញថា ចំនួននេះ ត្រូវបានតាមពីក្រោយដោយប្រទេសកម្ពុជា (១៧៦%) ឡាវ (១២២%) សិង្ហបុរី (១០៦%) និងអូស្ត្រាលី (១០២%)។
ក្រុមហ៊ុនអាកាសចរណ៍វៀតណាម ក្នុងឆ្នាំ២០២៣ បានចាប់ផ្តើមបង្កើនល្បឿនសេវាកម្មថ្មីដោយផ្ទាល់ ទៅកាន់គោលដៅទេសចរណ៍សំខាន់ៗរបស់ប្រទេសវៀតណាម ពីទីក្រុងឥណ្ឌា ដើម្បីចូលទៅក្នុងទីផ្សារដែលមានប្រជាជនច្រើនជាងគេលើពិភពលោក។
ទិន្នន័យស្តីពីរបាយការណ៍ “ការស្វែងរកឆ្នាំ២០២៣ (Year in Search 2023)” របស់ Google បានបង្ហាញថា វៀតណាមគឺជាគោលដៅទេសចរណ៍ដែលត្រូវបានស្វែងរកច្រើនបំផុតដោយប្រជាជនឥណ្ឌាកាលពីឆ្នាំមុន។
ជាមួយនឹងប្រទេសថៃ និងម៉ាឡេស៊ីបានលើកលែងទិដ្ឋាការសម្រាប់ភ្ញៀវទេសចរឥណ្ឌារួចហើយ រដ្ឋមន្ត្រីក្រសួងវប្បធម៌ កីឡា និងទេសចរណ៍ លោក Nguyen Van Hung បានជំរុញឱ្យរដ្ឋាភិបាលធ្វើដូចគ្នា ដើម្បីប្រកួតប្រជែងជាមួយពួកគេ។
អាស៊ីអាគ្នេយ៍ក៏បានក្លាយជាចំណុចទាក់ទាញ សម្រាប់ទីផ្សារទេសចរណ៍ចូលប្រទេសវៀតណាម។
ប្រភពបានឱ្យដឹងថា ការស្នាក់នៅដោយគ្មានទិដ្ឋាការរយៈពេល ៣០ថ្ងៃ សម្រាប់ជនជាតិនៃប្រទេសសមាជិកអាស៊ាន និងការហោះហើរត្រង់ជាច្រើន ទៅកាន់ទីក្រុងនានារបស់វៀតណាម ពីអាស៊ីអាគ្នេយ៍ត្រូវបានចាត់ទុកថាមានការរីកចម្រើនយ៉ាងឆាប់រហ័ស។
ប្រជាជនអូស្ត្រាលីក៏កំពុងធ្វើដំណើរទៅកាន់ប្រទេសវៀតណាមកាន់តែច្រើនឡើងផងដែរ ដោយសារតម្លៃសំបុត្រយន្តហោះទាប និងជើងហោះហើរត្រង់ថ្មីមួយចំនួនពីប្រទេសរបស់ពួកគេទៅកាន់ទីក្រុងហាណូយ និងហូជីមិញ។
ទិន្នន័យពីគេហទំព័រលក់សំបុត្រយន្តហោះ Skycanner បានបង្ហាញថា ទីក្រុងហូជីមិញគឺជាគោលដៅមួយក្នុងចំណោមគោលដៅស្វែងរកច្រើនបំផុតចំនួន១០ ដោយជនជាតិអូស្ត្រាលីកាលពីឆ្នាំមុន បន្ទាប់ពីកើនឡើង ២៤៦%។
ចំនួនអ្នកទេសចរមកពីប្រទេសឥណ្ឌូនេស៊ី បានងើបឡើងវិញដល់ ៩៩% នៃកម្រិតមុនការរាតត្បាត ខណៈប្រទេសថៃ និងសហរដ្ឋអាមេរិកមានអត្រាងើបឡើងវិញ ៩៦% នេះបើយោងតាមអាជ្ញាធរទេសចរណ៍។
តួលេខពីប្រទេសចិនដែលធ្លាប់មានកម្រិតខ្ពស់បំផុតមុនពេលជំងឺរាតត្បាតមានត្រឹមតែ៣០% ប៉ុណ្ណោះ។
វៀតណាមបានទទួលភ្ញៀវបរទេសចំនួន ១២,៦ លាននាក់ ក្នុងឆ្នាំ២០២៣ ប្រហែល ៧០% នៃតួលេខមុនការរាតត្បាត។ ប្រទេសនេះកំណត់គោលដៅក្នុងការស្តារឡើងវិញ ដល់កម្រិតមុនជំងឺរាតត្បាត នៅឆ្នាំនេះ។
ហេតុផលមួយទៀតសម្រាប់ភ្ញៀវទេសចរឥណ្ឌាយ៉ាងច្រើន នៅក្នុងប្រទេសវៀតណាម គឺការកើនឡើងនៃចំនួនជើងហោះហើរត្រង់ពីប្រទេសឥណ្ឌា ក៏ដូចជាប្រទេសវៀតណាមដែលកំពុងក្លាយជាគោលដៅអាពាហ៍ពិពាហ៍បែបប្រណីតសម្រាប់គ្រួសារឥណ្ឌាដែលមានទ្រព្យសម្បត្តិ។ VNExpress/Khmer Times