ប្រទេសបារាំងបានសន្យាថានឹងផ្តល់ថវិកាប្រមាណ ២០០ លានអឺរ៉ូដល់ប្រទេសកម្ពុជាដើម្បីជួយលើវិស័យបណ្តុះបណ្តាលវិជ្ជាជីវៈ ថាមពល និងប្រព្រឹត្តកម្មទឹកស្អាត។
ព័ត៌មាននេះត្រូវបានប្រកាសនៅក្នុងសន្និសីទសារព័ត៌មានរួមគ្នារវាង ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តីនៃកម្ពុជា និង លោក Emmanuel Macron ប្រធានាធិបតីបារាំង បន្ទាប់ពីមានជំនួបទ្វេភាគីនៅទីក្រុងប៉ារីស កាលពីម្សិលមិញ
លោកប្រធានាធិបតីបារាំងក៏បានកោតសរសើរកម្ពុជាដែលបានបញ្ជូនកងកម្លាំងរក្សាសន្តិភាពទៅចូលរួមបេសកកម្មរបស់អង្គការសហប្រជាជាតិ ដែលជាការរួមចំណែកដ៏សំខាន់នៅក្នុងតំបន់អាស៊ី ក៏ដូចជាជំហររបស់កម្ពុជាចំពោះជម្លោះរវាងរុស្ស៊ី និងអ៊ុយក្រែន។
ចំណែកឯកឧត្តមបណ្ឌិត ហ៊ុន ម៉ាណែត បានថ្លែងអំណរគុណចំពោះភាគីបារាំងសម្រាប់ការទទួលស្វាគមន៍យ៉ាងកក់ក្តៅ ដោយឯកឧត្តមបណ្ឌិតបានសង្កត់ធ្ងន់ថា ប្រទេសបារាំងគឺជាប្រទេសដំបូងគេសម្រាប់ដំណើរទស្សនៈកិច្ចរបស់លោកនៅតំបន់អឺរ៉ុបក្នុងឋានៈជានាយករដ្ឋមន្ត្រីថ្មីរបស់ប្រទេសកម្ពុជា។ ទន្ទឹមនឹងនេះ ឯកឧត្តមបណ្ឌិតបានលើកឡើងទៀតថា ក្នុងរយៈពេលត្រឹមតែ ១៣ខែប៉ុណ្ណោះ មេដឹកនាំកំពូលកម្ពុជាចំនួន ៣រូប បានអញ្ជើញទៅបំពេញទស្សនកិច្ចនៅប្រទេសបារាំង រួមមាន ព្រះករុណា ព្រះបាទសម្តេច ព្រះបរមនាថ នរោត្តម សីហមុនី នៅថ្ងៃទី១៣ ខែវិច្ឆិកា ឆ្នាំ២០២៣ សម្តេចតេជោ ហ៊ុន សែន អតីតនាយករដ្ឋមន្ត្រី នៅថ្ងៃទី១៤ ខែធ្នូ ឆ្នាំ២០២២ និងទស្សនកិចច្ចរបស់ខ្លួនលោកផ្ទាល់។ ឯកឧត្តមបណ្ឌិតបានគូសបញ្ជាក់ថា៖ «នេះបង្ហាញពីជម្រៅនៃមិត្តភាពកម្ពុជា-បារាំង»។
ឯកឧត្តមបណ្ឌិតក៏បានរំលឹកឡើងវិញនូវការរួមចំណែកដ៏សំខាន់របស់ប្រទេសបារាំងចំពោះដំណើរការស្វែងរកសន្តិភាព ការកសាងឡើងវិញ និងការអភិវឌ្ឍន៍របស់កម្ពុជា ដោយបញ្ជាក់សារជាថ្មីអំពីជំហររបស់កម្ពុជាក្នុងការបន្តថែរក្សារ ពង្រឹងទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។
ជាមួយគ្នានេះ ភាគីទាំងពីរក៏បានសង្កត់ធ្ងន់លើតួនាទីសំខាន់នៃវិស័យឯកជនរបស់ប្រទេសទាំងពីរ ដោយកត់សម្គាល់ទំនាក់ទំនងដែលកំពុងរីកចម្រើន ជាពិសេសក្នុងវិស័យវិនិយោគ និងពាណិជ្ជកម្ម។
លើសពីនេះ ឯកឧត្តមបណ្ឌិតក៏បានជូនពរប្រទេសបារាំងទទួលបានជោគជ័យក្នុងការរៀបចំកីឡាអូឡាំពិករដូវក្តៅនៅទីក្រុងប៉ារីសឆ្នាំ២០២៤ ក៏ដូចជាកិច្ចប្រជុំកំពូលហ្វ្រង់កូហ្វូនីផងដែរ។ AKP