លោកបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃសុក្រ បានជំរុញឱ្យកម្មករ និងសហគ្រាសក្រៅប្រព័ន្ធទាំងអស់ចូលរួមក្នុងសេដ្ឋកិច្ចក្នុងប្រព័ន្ធ។
ក្នុងឱកាសជួបសំណេះសំណាលជាមួយកម្មករនិយោជិតប្រមាណ ១៨,០០០នាក់ នៅក្រុងតាខ្មៅ ខេត្តកណ្តាល លោកបណ្ឌិត ម៉ាណែត បានណែនាំដល់ស្ថាប័នរដ្ឋាភិបាល ធ្វើការសម្របសម្រួលដល់ការផ្លាស់ប្តូរ ទៅកាន់សេដ្ឋកិច្ចក្នុងប្រព័ន្ធរបស់កម្មករ និងសហគ្រាស។
នាយករដ្ឋមន្ត្រីបញ្ជាក់ថា រាជរដ្ឋាភិបាលមិនបង្ខំពួកគេទេ ប៉ុន្តែនឹងលើកទឹកចិត្ត និងអនុញ្ញាតឱ្យពួកគេចុះឈ្មោះ។
លោកបានបន្តទៀតថា ដើម្បីសម្រេចបាននូវចំណុចនេះ ស្ថាប័នពាក់ព័ន្ធត្រូវសម្របសម្រួល និងគិតគូរពីគោលការណ៍មួយចំនួន ដូចជាការកាត់បន្ថយនីតិវិធីនៃការចុះឈ្មោះជាដើម។
លោកបានមានប្រសាសន៍ថា “កាតព្វកិច្ចរបស់យើងគឺមិនមែនយកប្រជាជនមកច្របាច់កទេ ប៉ុន្តែត្រូវជួយពួកគេ ហើយប្រសិនបើយើងជួយពួកគេ ពួកគេនឹងជួយយើង”។
អង្គការអន្តរជាតិខាងការងារ (ILO) ប៉ាន់ប្រមាណថា កម្មករនិយោជិតដល់ទៅ ៩៣ ភាគរយនៅក្នុងប្រទេសកម្ពុជា គឺជាផ្នែកនៃសេដ្ឋកិច្ចក្រៅប្រព័ន្ធ។ ហេង បញ្ញា – AKP