រដ្ឋាភិបាលកម្ពុជា ស្នើរដ្ឋាភិបាលជប៉ុន ពិនិត្យលទ្ធភាពជួយសាងសង់ស្ពានឆ្លងទន្លេមេគង្គពីក្ដីតាកុយ ឆ្ពោះទៅអរិយក្សត្រ ដើម្បីកាត់បន្ថយការកកស្ទះចរាចរណ៍ និងបង្កលក្ខណៈងាយស្រួលក្នុងការធ្វើដំណើរ។
ក្នុងពិធីបើកការដ្ឋានសាងសង់ចំណតផែកុងតឺន័រទឹកជ្រៅជំហានទី១ នៅក្រុងព្រះសីហនុ កាលពីថ្ងៃសុក្រ លោកនាយករដ្ឋមន្ត្រី ហ៊ុន ម៉ាណែត បញ្ជាក់ថា ដោយសារជប៉ុន ជាប្រទេសជឿនលឿនលើវិស័យហេដ្ឋារចនាសម្ពន្ធ ផ្លូវ ស្ពាន ស្នើជប៉ុន រៀបចំកម្មវិធីផ្លាស់ប្តូរចំណេះដឹង ជំនាញ បទពិសោធ និងបច្ចេកវិទ្យាលើហេដ្ឋារចនាសម្ពន្ធរវាងកម្ពុជា-ជប៉ុន ដើម្បីអភិវឌ្ឍហេដ្ឋារចនាសម្ពន្ធ ផ្លូវ ស្ពាន នៅកម្ពុជាឱ្យមានប្រសិទ្ធិភាពប្រសើរឡើង។
លោកបន្ថែមថា ជាសក្ខីភាពក្នុងការពង្រឹង និងពង្រីកនូវទំនាក់ទំនងកម្ពុជា-ជប៉ុន ព្រមទាំងដាក់ទិសដៅសម្រាប់យុទ្ធសាស្ត្ររយៈពេលវែង គឺសបញ្ជាក់ថា ជប៉ុន គឺជាមិត្តដ៏សំខាន់របស់កម្ពុជា ដែលបានចូលរួមចំណែកក្នុងការអភិវឌ្ឍប្រទេសកម្ពុជាតាំងពីអតីតកាល រហូតបច្ចុប្បន្នកាល និងបន្តទៅអនាគត។
លោក ហ៊ុន ម៉ាណែត បញ្ជាក់ថា៖ «ឆ្លៀតក្នុងឱកាសនេះ ខ្ញុំសូមស្នើដល់មិត្តជប៉ុន តាមរយៈអនុរដ្ឋមន្ត្រីក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ជួយដល់ការគាំទ្រអភិវឌ្ឍហេដ្ឋារចនាសម្ពន្ធ ផ្លូវ ស្ពាន បន្ថែមទៀត»។
លោកនាយករដ្ឋមន្ត្រីបន្តថា៖ «ជួយគាំទ្របន្ថែមទៀត គឺមានដូចជាគម្រោងពង្រីក និងលើកកម្ពស់កម្រិតគុណភាពផ្លូវជាតិលេខ១ ទៅដល់ស្ពានអ្នកលឿង និងស្ពានឆ្លងកាត់ទន្លេមេគង្គក្តីតាកុយ ឆ្ពោះទៅអរិយក្សត្រ ដែលបច្ចុប្បន្នចាយកា (JICA) បានពិនិត្យការស្នើសុំរបស់ក្រសួងសាធារណការ និងដឹកជញ្ជូនហើយ»។
លោក ហ៊ុន ម៉ាណែត បញ្ជាក់ថា ត្រឹមតែប៉ុន្មានខែប៉ុណ្ណោះ រដ្ឋាភិបាលកម្ពុជាបានសម្ពោធសមិទ្ធផល និងបើកការដ្ឋានសាងសង់សមិទ្ធផលជាច្រើន ក្រោមការគាំទ្រថវិកាពីជប៉ុន ដែលនេះជាសមិទ្ធផលកើតចេញពីទំនាក់ទំនងល្អប្រសើររវាងកម្ពុជា-ជប៉ុន ជាពិសេសអបអរសាទរខួប៧០ឆ្នាំ នៃទំនាក់ទំនងរវាងប្រទេសទាំងពីរ។
លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ជប៉ុន គឺជាដៃគូយុទ្ធសាស្ត្រដ៏សំខាន់មួយរបស់កម្ពុជា ដែលជានិច្ចកាលបានជួយកម្ពុជាយ៉ាងច្រើនសន្ធឹកសន្ធាប់ ដើម្បីអភិវឌ្ឍវិស័យជាច្រើន ហើយកម្ពុជាបានចាត់ទុកជប៉ុន គឺជាមិត្តដ៏ល្អ។
លោកបន្តថា ការជួយរបស់ជប៉ុន គឺមានច្រើនលើគ្រប់វិស័យ ជាពិសេសហេដ្ឋារចនាសម្ពន្ធផ្លូវ ស្ពាន កំពង់ផែ និងការអភិវឌ្ឍនៅកំពង់ផែស្វយ័ត ក្រុងព្រះសីហនុ ជាដើម។
លោកបញ្ជាក់ថា សមិទ្ធផលសំខាន់ៗរបស់កម្ពុជានាពេលនេះ គឺកើតចេញពីកិច្ចខិតខំប្រឹងប្រែង និងការយកចិត្តទុកដាក់ពីប្រមុខរដ្ឋាភិបាលកម្ពុជាតាំងពីអាណត្តិមុន រហូតមកដល់អាណត្តិបច្ចុប្បន្ន ជាមួយនឹងការរួមចំណែកដោយមិនអាចខ្វះបានពីជប៉ុន ដែលជាដៃគូយុទ្ធសាស្រ្តដ៏សំខាន់មួយរបស់កម្ពុជា។
លោក ចេង មុនីរ៉ា អភិបាលខណ្ឌច្បារអំពៅ ប្រាប់កាសែតខ្មែរថាមស៍ កាលពីម្សិលមិញថា គម្រោងសាងសង់ស្ពានពីក្ដីតាកុយ ឆ្ពោះទៅអរិយក្សត្រ គឺទាំងរដ្ឋបាលខណ្ឌ ក៏ដូចប្រជាពលរដ្ឋក្នុងភូមិសាស្ត្រច្បារអំពៅ និងប្រជាពលរដ្ឋក្នុងភូមិសាស្ត្រពាក់ព័ន្ធ បានរីករាយសាទរចំពោះគម្រោងដ៏មានសារៈសំខាន់ និងមានអត្ថប្រយោជន៍មួយនេះ។
លោកបញ្ជាក់ថា៖ បច្ចុប្បន្ន ដើម្បីទៅអរិយក្សត្របាន ប្រជាពលរដ្ឋនៅក្នុងខណ្ឌច្បារអំពៅ ត្រូវឆ្លងស្ពានកោះនរា មកកោះពេជ្រ ហើយនៅពេលដល់កោះពេជ្រ ត្រូវបន្តទៅអរិយក្សត្រ»។
លោកបន្តថា ប្រជាពលរដ្ឋក្នុងខណ្ឌច្បារអំពៅ ចង់បានសមិទ្ធផលបែបនេះ ដូច្នេះ សូមគោរពថ្លែងអំណរគុណចំពោះលោកនាយករដ្ឋន្ត្រី ហ៊ុន ម៉ាណែត ដែលជានិច្ចកាលតែងគិតគូពីស្ថាបនា និងការអភិវឌ្ឍនៅតាមមូលដ្ឋាន ជាពិសេសក្នុងក្របខណ្ឌនៅទូទាំងប្រទេស។
លោកអភិបាលខណ្ឌបន្ថែមថា នៅពេលសាងសង់ស្ពានឆ្លងទន្លេមេគង្គពីក្ដីតាកុយ ទៅអរិយក្សត្រ សម្រេចបានជាស្ថាពរ នឹងជួយកាត់បន្ថយចំណាយពេលវេលាធ្វើដំណើរ កាត់បន្ថយថវិកា ព្រោះបើបន្តជិះផ្លូវវាង គឺខាតពេលវេលាច្រើន ហើយបើបន្តឆ្លងដរត្រូវបង់ថវិការបន្ថែមទៀត។
លោក ចេង មុនីរ៉ា បញ្ជាក់ថា និយាយជារួមការសាងសង់ស្ពានពីក្ដីតាកុយ ទៅអរិយក្សត្រ គឺរួមចំណែកយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាពលរដ្ឋបានយ៉ាងច្រើន និងលើកកម្ពស់សេដ្ឋកិច្ចបន្ថែមទៀត។
កាលពីថ្ងៃសុក្រ ក្រសួងសាធារណការ និងដឹកជញ្ជូន ប្រកាសព័ត៌មានថា ជប៉ុន បានមើលឃើញពីចក្ខុវិស័យវែងឆ្ងាយនៃការដឹកនាំកម្ពុជា ដើម្បីឆ្ពោះទៅជាប្រទេសដែលមានចំណូលខ្ពស់នៅឆ្នាំ២០៥០ បានសន្យាបន្តកិច្ចសហប្រតិបត្តិការល្អៗជាបន្តបន្ទាប់បន្ថែមទៀត ក្នុងនាមជាប្រទេសដៃគូយុទ្ធសាស្រ្តគ្រប់ជ្រុងជ្រោយ ដែលមានចំណងមិត្តភាពការទូតអាយុកាល ៧០ឆ្នាំ៕