ធនាគារអភិវឌ្ឍន៍អាស៊ី (ADB) សហការជាមួយក្រសួងសាធារណការ និងដឹកជញ្ជូន (MPWT) បានសាងសង់ដោយជោគជ័យនូវទីលានចាក់សំរាមនៅលើផ្ទៃដីទំហំ ២០ ហិចតា នៅខេត្តបាត់ដំបង ក្នុងគោលបំណងបម្រើប្រជាពលរដ្ឋក្នុងសហគមន៍ចំនួន ១២៦,០០០ នាក់ ជាមួយនឹងសមត្ថភាពដាក់សំរាមចំនួន ១០០ តោនរាល់ថ្ងៃសម្រាប់រយៈពេលដប់ឆ្នាំខាងមុខ។
គម្រោង ៦.២៨ លានដុល្លារ ដែលគេស្គាល់ថាជា «ការគ្រប់គ្រងបរិស្ថានទីក្រុងទីពីរក្នុងអាងទន្លេសាប» ត្រូវបានប្រកាសជាផ្លូវការដើម្បីបម្រើសហគមន៍នៅថ្ងៃសុក្រ ដែលជាថ្ងៃចុងក្រោយនៃដំណើរទស្សនកិច្ចសារព័ត៌មានរបស់ ADB ឆ្នាំ ២០២៣។
ដំណើរទស្សនៈកិច្ចនេះដឹកនាំដោយលោកស្រី Jyotsana Varma នាយក ADB ប្រចាំប្រទេស និងលោក វង្ស ពិសិដ្ឋ អនុរដ្ឋលេខាធិការក្រសួងសាធារណការ រួមជាមួយនឹងមន្ត្រីជាន់ខ្ពស់មកពីស្ថាប័នពាក់ព័ន្ធ ដែលធ្វើឡើងនៅទីលានចាក់សំរាមដែលគ្រប់គ្រងនៅភូមិប៉ោយស្វាយ ខេត្តបាត់ដំបង។
លោក វង្ស ពិសិដ្ឋ បន្តថា គម្រោងសាកល្បងនេះត្រូវបានដាក់ឱ្យដំណើរការក្នុងរយៈពេលពីរខែចុងក្រោយនេះ ហើយពេលនេះបានត្រៀមរួចរាល់សម្រាប់បម្រើប្រជាពលរដ្ឋទូទាំងខេត្ត រួមទាំងស្រុក និងឃុំតូចៗ ដែលមានសមត្ថភាពដឹកជញ្ជូនសំរាមបានប្រមាណ ១០០តោនក្នុងមួយថ្ងៃ។
លោកបន្តថា គម្រោងនេះស្ថិតនៅចម្ងាយ ២៥គីឡូម៉ែត្រ ភាគនិរតីនៃក្រុងបាត់ដំបង ឆ្ងាយពីសហគមន៍ ដោយសារការយកចិត្តទុកដាក់ចំពោះសុខភាពប្រជាពលរដ្ឋ ហើយក្នុងរយៈពេលវែង សំរាមទាំងអស់អាចប្រែក្លាយទៅជាធនធានសម្រាប់ផលិតឧស្ម័ន និងជីផងដែរ។
ថ្លែងប្រាប់ខ្មែរថាមស៍ លោក វង្ស ពិសិដ្ឋ ពិសិដ្ឋ មានប្រសាសន៍ថា ខេត្តបាត់ដំបងមានសក្តានុពលដ៏ធំ ហើយថារដ្ឋាភិបាលចង់ប្រែក្លាយវាទៅជាទីក្រុងឆ្លាតវៃក្នុងគោលបំណងទាក់ទាញអ្នកវិនិយោគ និងភ្ញៀវទេសចរផងដែរ។
ជាមួយគ្នានេះដែរ លោកស្រី Varma មានប្រសាសន៍ថា៖ «តាមរយៈភាពជាដៃគូ និងការណែនាំពីរាជរដ្ឋាភិបាល យើងបានសម្រេចចិត្តសាងសង់ទីលានចាក់សំរាម នេះ ដើម្បីផ្តល់សហគមន៍ស្អាត ដែលអាចដើរតួជាការចូលរួមចំណែកដ៏សំខាន់ក្នុងការទាក់ទាញភ្ញៀវទេសចរឱ្យមកទស្សនាខេត្ត។
អ្នកស្រីបន្ថែមថា ADB នឹងពង្រីកគម្រោងនេះបន្ថែមទៀត ដើម្បីបម្រើសហគមន៍កាន់តែធំ តាមរយៈកិច្ចសហប្រតិបត្តិការជាមួយវិស័យសាធារណៈ និងឯកជន ដើម្បីលើកកម្ពស់ជីវភាពរស់នៅរបស់ប្រជាពលរដ្ឋរស់នៅក្នុងខេត្ត ដែលស្របតាមយុទ្ធសាស្ត្ររបស់ក្រសួងបរិស្ថាន។
អ្នកស្រីVarma បានប្រាប់ខ្មែរថាមស៍ថា គម្រោងនេះបានចាប់ផ្តើមដោយគោលការណ៍សំខាន់ៗចំនួនបី ក្នុងគោលបំណងកាត់បន្ថយការបំពុល ការកែច្នៃ និងប្រើប្រាស់ឡើងវិញនូវសម្ភារៈទាំងនោះ។
នាយក ADB ប្រចាំប្រទេសក៏បានកោតសរសើរដល់ក្រុមប្រព័ន្ធផ្សព្វផ្សាយសម្រាប់កិច្ចខិតខំប្រឹងប្រែងរួមគ្នារបស់ពួកគេក្នុងការផ្សព្វផ្សាយគម្រោងរបស់ ADB ក៏ដូចជាការផ្សព្វផ្សាយការយល់ដឹងដល់ប្រជាជនទូទាំងប្រទេស៕