ក្រសួងធម្មការ និងសាសនា បានរៀបចំសេចក្ដីព្រាងច្បាប់ស្ដីពី សាសនានៅកម្ពុជា ដើម្បីដាក់ឱ្យអនុវត្តក្នុងក្របខណ្ឌទូទាំងប្រទេសក្នុងគោលបំណងលើកកម្ពស់សីលធម៌ និងសុជីវធម៌ក្នុងក្របខណ្ឌពុទ្ធចក្រ និងអាណាចក្រ។
ក្នុងកិច្ចប្រជុំជាមួយគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃរដ្ឋសភា នៅវិមានរដ្ឋសភា កាលពីថ្ងៃចន្ទ លោក ចាយ បូរិន រដ្ឋមន្រ្តីក្រសួងធម្មការ និងសាសនា បានលើកឡើងពីប្រសិទ្ធភាពនៃការអនុវត្តច្បាប់ និងលិខិតបទដ្ឋានគតិយុត្តនានា ដែលក្រសួងត្រូវបន្តអនុវត្តសម្រាប់រដ្ឋាភិបាលនីតិកាលទី៧។
លោកបញ្ជាក់ថា បច្ចុប្បន្នក្រសួងធម្មការ និងសាសនា បានបន្តរៀបចំសេចក្តីព្រាងច្បាប់ស្តីពី សាសនានៅកម្ពុជា ដើម្បីដាក់ឱ្យអនុវត្តសម្រាប់ថ្ងៃខាងមុខ។ ក្នុងនោះ ក្រសួងក៏បានរៀបចំធ្វើវីដេអូអប់រំសុជីវធម៌ ផ្សព្វផ្សាយនិងបណ្តុះបណ្តាលតួនាទី ភារកិច្ចដល់មន្ត្រីសង្ឃគ្រប់ឋានានុក្រម អាចារ្យ និងគណៈកម្មការវត្ត។
លោកថា ក្រសួងបានជំរុញបោះពុម្ពផ្សាយព្រះត្រៃបិដក គម្ពីរ ដីកា និងទស្សនាវដ្ដី ព្រមទាំងមានការកសាងផ្ទាំងប៉ាណូផ្សព្វផ្សាយពីពុទ្ធឱវាទ នៅទីស្តីការក្រសួង និងដាក់នៅតាមផ្លូវចេញចូលពីព្រលានយន្តហោះជាដើមផងដែរ។
រដ្ឋមន្រ្តីបញ្ជាក់ថា បច្ចុប្បន្នបញ្ហាប្រឈមមួយចំនួនដែលក្រសួងជួបប្រទះមានដូចជា សេចក្តីព្រាងច្បាប់ពាក់ព័ន្ធនឹងសាសនានៅកម្ពុជា មិនទាន់បានរៀបចំរួចរាល់នៅឡើយ។ ក្នុងនោះសមត្ថភាពមន្ត្រីរាជការក្នុងការអនុវត្តគោលនយោបាយឌីជីថលនៅមានកម្រិត ហើយវត្តអារាមមួយចំនួនមិនទាន់បានចងក្រងជាប្រវត្តិ និងចុះបញ្ជីនៅឡើយ។
លោក ចាយ បូរិន បន្ថែមថា ចំពោះគណៈដឹកនាំនិងរចនាសម្ព័ន្ធដឹកនាំផ្នែកពាហិរសាសនា (សាសនាក្រៅ) ពុំទាន់មានភាពច្បាស់លាស់ ការបើកវិហារ ស្នាក់ការថ្វាយបង្គុំ ឬកន្លែងបង្រៀនគម្ពីរសាសនាមួយចំនួនពុំទាន់អនុវត្តតាមច្បាប់អនុញ្ញាត ដែលធ្វើឱ្យបញ្ហាអវិជ្ជមានក្នុងសាសនានៅតែបន្តកើតមាន និងជំនឿដោយគ្មានមូលដ្ឋានច្បាស់លាស់ដូចជា គ្រូបារមី គ្រូសណ្ឋិត និងការបង្ហោះសកម្មភាពតាមបណ្តាញសង្គមដោយគ្មានមូលដ្ឋានច្បាស់លាស់ និងបង្កើតព្រឹត្តិការណ៍គ្មានសណ្តាប់ធ្នាប់។
លោកថ្លែងថា បុគ្គលសង្ឃខ្លះប្រើប្រាស់បណ្តាញសង្គមបង្ហាញសកម្មភាពប្រាសចាកពីធម៌វិន័យ ដើម្បីផលប្រយោជន៍ដែលពិបាកទប់ស្កាត់ ហើយអ្នកសារព័ត៌មានអនឡាញមួយចំនួនបានផ្សព្វផ្សាយបំពុលសង្គមពាក់ព័ន្ធនឹងជំនឿសាសនា ដែលធ្វើឱ្យប៉ះពាល់ដល់សណ្តាប់ធ្នាប់សាធារណៈ។
លោក ប៉ា សុជាតិវង្ស ប្រធានគណៈកម្មការទី៧ នៃរដ្ឋសភា បានវាយតម្លៃខ្ពស់ចំពោះកិច្ចខិតខំប្រឹងប្រែងបំពេញការងាររបស់រដ្ឋមន្ត្រីក្រសួងធម្មការ និងសាសនា ដែលសម្រេចបាននូវសមិទ្ធផលសំខាន់ៗជាច្រើនក្នុងក្របខ័ណ្ឌធម្មការ និងសាសនា។
លោកបានបន្ថែមថា សម្រាប់សេចក្តីព្រាងច្បាប់ស្តីពីសាសនា តាងនាមគណៈកម្មការទាំង១០ របស់រដ្ឋសភា គឺមានការគាំទ្រទាំងស្រុង ព្រមទាំងសង្ឃឹម និងមានជំនឿថា តាមរយៈទិសដៅជាយុទ្ធសាស្រ្ត និងផែនការសកម្មភាពជាអាទិភាពដែលក្រសួងបានដាក់ចេញ នឹងធ្វើឱ្យវិស័យធម្មការ និងសាសនា ដើរតួនាទីកាន់តែសំខាន់ថែមទៀត ដើម្បីទ្រទ្រង់ការអភិវឌ្ឍសង្គមប្រកបដោយចីរភាព។
ព្រឹទ្ធាចារ្យ និងជាអាចារ្យវត្តមួយក្នុងខេត្តពោធិ៍សាត់ លោក សែម មឿង បានឱ្យដឹងថា ព្រះពុទ្ធសាសនា ជាសាសនារបស់រដ្ឋ ហើយគ្រប់សាសនាទាំងអស់ដែលមានវត្តមានក្នុងប្រទេសកម្ពុជា ស្ថិតក្រោមការគ្រប់គ្រងរបស់អាជ្ញាធរពាក់ព័ន្ធ ដូច្នេះអ្នកប្រតិបត្តិទាំងឡាយមិនអាចធ្វើសកម្មភាពប្រាសចាកនឹងសីលធម៌នោះទេ។
លោកបន្ថែមថា ការបង្កើតឱ្យមានច្បាប់ពាក់ព័ន្ធនឹងសាសនា គឺជារឿងល្អសម្រាប់ជាមូលដ្ឋានក្នុងការអនុវត្តជារួម ដើម្បីដាក់ទោសទណ្ឌលើបុគ្គលទាំងឡាយណាដែលយកសាសនាមកលេងសើច រកស៊ី ឬបោកប្រាសប្រជាពលរដ្ឋ ឬក៏ធ្វើឱ្យអាបឱនសាសនា។
លោកបន្តថា៖ «បើរដ្ឋាភិបាលបង្កើតចេញជាច្បាប់អនុវត្តជាផ្លូវការ នឹងជំរុញឱ្យមនុស្សចេះគោរពច្បាប់ ភ័យខ្លាចជាប់ទោសទណ្ឌ ឬជាប់ពិន័យ ដូច្នេះនៅពេលប្រុងធ្វើសកម្មភាពអ្វីមួយដែលពាក់ព័ន្ធនឹងសាសនា នោះពួកគេនឹងប្រុងប្រយ័ត្នខ្ពស់ និងពិចារណាឱ្យច្រើន មុនប្រព្រឹត្តឬមិនប្រព្រឹត្ត ដើម្បីកុំឱ្យមានទោស ឬជាប់ពិន័យ ប៉ុន្តែខ្ញុំបារម្ភប៉ះពាល់ដល់សិទ្ធិសេរីភាពរបស់ប្រជាពលរដ្ឋផងដែរ»។
គួររម្លឹកថា សេចក្ដីព្រាងច្បាប់ស្ដីពីសាសនានៅកម្ពុជា បាននិងកំពុងសិក្សា ដើម្បីប្រមូលធាតុចូលដែលសេចក្ដីព្រាងនេះគ្រោងនឹងបញ្ចប់នាពេលខាងមុខ។ ក្នុងនោះមានមាត្រាមួយបានរឹតបន្តឹងចំពោះព្រះសង្ឃក្នុងព្រះពុទ្ធសានា ដែលមានចេតនាចូលរួមធ្វើបាតុកម្ម កូដកម្ម កុបកម្ម ដើម្បីប្រឆាំងជាមួយគណបក្សនយោបាយ ប្រឈមនឹងការផ្ដន្ទាទោសដាក់ពន្ធនាគារពី ៧ឆ្នាំ ដល់ ១៥ឆ្នាំ។
ក្រសួងធម្មការ និងសាសនា ធ្លាប់បញ្ជាក់ថា ទោសប្បញ្ញត្តិនេះបានចែងនៅក្នុងសេចក្ដីព្រាងច្បាប់ ត្រង់ជំពូកទី១០ និងមាត្រា៣៥ ដែលបានកំណត់ថា ព្រះសង្ឃព្រះពុទ្ធសាសនា មានចេតនាចូលរួមធ្វើបាតុកម្ម កូដកម្ម កុបកម្ម ដើម្បីប្រឆាំង ឬប្រឆាំងនឹងគណបក្សនយោបាយណាមួយ ត្រូវផ្ដន្ទាទោសដាក់ពន្ធនាគារ៕