ក្រសួងសន្តិសុខសាធារណៈបាននិយាយថា ស្ថាប័នសន្តិសុខសាធារណៈនៅទូទាំងប្រទេសចិនបានដោះស្រាយករណីបោកប្រាស់ទូរគមនាគមន៍ ឬការឆបោកអនឡាញ ចំនួន ៣៩១,០០០ ករណី ក្នុងរយៈពេល ១១ខែ នៃឆ្នាំមុន ហើយបានចាប់បានជនសង្ស័យជាច្រើននាក់។
ក្រសួងបានឱ្យដឹងថា ពួកគេក៏បានចូលរួមក្នុងការពិភាក្សាទល់មុខជាមួយមនុស្ស ១៣,៨៩ លាននាក់ ដែលមានហានិភ័យនៃការក្លាយជាជនរងគ្រោះនៃការបោកប្រាស់ ដោយបានសហការជាមួយនាយកដ្ឋានផ្សេងទៀត ដើម្បីទប់ស្កាត់ការហៅទូរស័ព្ទបោកប្រាស់ចំនួន ២,៧៥ ប៊ីលាន និងសារក្លែងបន្លំចំនួន ២,២៨ ប៊ីលាន ដោះស្រាយជាមួយនឹងឈ្មោះដែនក្លែងបន្លំចំនួន ៨,៣៦លាន (fraudulent domain names) និងទប់ស្កាត់មូលនិធិ ចំនួន ៣២៨,៨ ប៊ីលានយ័ន (៤៦ ប៊ីលានដុល្លារ) ទាក់ទងនឹងករណីឆបោក។
ក្រសួងបាននិយាយថា ចំនួនករណីក្លែងបន្លំទូរគមនាគមន៍បានថយចុះចាប់តាំងពីខែសីហា ដែលបង្ហាញពីភាពជោគជ័យដ៏ធំ ក្នុងការបង្ក្រាប និងកិច្ចខិតខំប្រឹងប្រែងក្នុងការគ្រប់គ្រង។
ក្រសួងបានដាក់ចេញនូវប្រតិបត្តិការពិសេសមួយចំនួន ដើម្បីទប់ស្កាត់ការក្លែងបន្លំទូរគមនាគមន៍ដែលកើនឡើង និងក្រុមឧក្រិដ្ឋជនគោលដៅ ដែលពាក់ព័ន្ធនឹងការផ្តល់សេវាខុសច្បាប់ដល់ក្រុមឆបោកនៅក្រៅប្រទេស រួមទាំងការផ្សព្វផ្សាយ ការលាងលុយកខ្វក់ ការអភិវឌ្ឍន៍បច្ចេកទេស និងគម្រោងការរត់ពន្ធ។ ជនសង្ស័យសរុបចំនួន ៧៩,០០០ នាក់ ដែលជាប់ពាក់ព័ន្ធក្នុងសកម្មភាពខុសច្បាប់ទាំងនេះ ត្រូវបានចាប់ខ្លួន ក្នុងរយៈពេលពេញមួយឆ្នាំមុន រួមទាំងសមាជិកសំខាន់ៗ ចំនួន ២៦៣ នាក់ ឬអ្នកគ្រប់គ្រងការទូទាត់របស់ក្រុមឆបោក។
ក្រុមការងារត្រូវបានបញ្ជូនទៅកាន់ប្រទេសមួយចំនួនរួមមានប្រទេសថៃ ហ្វីលីពីន កម្ពុជា ឡាវ វៀតណាម និងឥណ្ឌូនេស៊ី សម្រាប់កិច្ចសហប្រតិបត្តិការអនុវត្តច្បាប់អន្តរជាតិ ជាលទ្ធផលបានបំបែកសំបុកឆបោកនៅក្រៅប្រទេសជាច្រើន និងការចាប់ខ្លួនជនសង្ស័យឧក្រិដ្ឋកម្មជាង ៣,០០០ នាក់ ដែលបង្កើតប្រសិទ្ធភាពទប់ស្កាត់ដ៏ខ្លាំងក្លា។
ដើម្បីឆ្លើយតបទៅនឹងស្ថានភាពឆបោកទូរគមនាគមន៍ធ្ងន់ធ្ងរនៅភាគខាងជើងប្រទេសមីយ៉ាន់ម៉ា ក្រសួងបានដាក់ពង្រាយនាយកដ្ឋានសន្តិសុខសាធារណៈនៅក្នុងខេត្តយូណាន និងតំបន់ផ្សេងទៀត ដើម្បីជំរុញកិច្ចសហប្រតិបត្តិការអនុវត្តច្បាប់តាមព្រំដែន។ ប្រតិបត្តិការជាច្រើនត្រូវបានធ្វើឡើងដើម្បីលុបបំបាត់ទីតាំងឆបោក និងចាប់ជនសង្ស័យពាក់ព័ន្ធនឹងការឆបោក។
នាយកដ្ឋានសន្តិសុខសាធារណៈនៅក្នុងខេត្ត Zhejiang, Liaoning និង Fujian និងតំបន់ផ្សេងទៀតបានចេញដីកាចាប់ខ្លួនមេដឹកនាំសំខាន់ៗនៃក្រុមឆបោកអនឡាញ នៅក្នុងតំបន់ Kokang ភាគខាងជើងនៃប្រទេសមីយ៉ាន់ម៉ា ដោយផ្តោតលើសកម្មភាពឧក្រិដ្ឋកម្មនៃក្រុមឆបោកលើគ្រួសារជាច្រើនដែលរៀបចំ និងដំណើរការកន្លែងឆបោកដោយបើកចំហ ជនឆបោកដែលមានប្រដាប់អាវុធ និងការការពារ និងពាក់ព័ន្ធក្នុងការឆបោកអនឡាញរយៈពេលវែង លើពលរដ្ឋចិន។
ក្រសួងបាននិយាយថា ជាមួយនឹងកិច្ចសហប្រតិបត្តិការរឹងមាំពីភាគីនានាក្នុងប្រទេសមីយ៉ាន់ម៉ា ជនសង្ស័យឆបោកអនឡាញ ចំនួន ៤១,០០០នាក់ ត្រូវបានចាប់ប្រគល់ទៅឱ្យប្រទេសចិនកាលពីឆ្នាំមុន ហើយកន្លែងឆបោកនៅក្រៅប្រទេសជាច្រើន ត្រូវបានលុបបំបាត់ដោយជោគជ័យ។
ក្រសួងបានសហការជាមួយនាយកដ្ឋានរដ្ឋាភិបាលកណ្តាលផ្សេងទៀត ដើម្បីបង្កើនការគ្រប់គ្រងដ៏ទូលំទូលាយ ពង្រឹងការត្រួតពិនិត្យឧស្សាហកម្ម បិទចន្លោះប្រហោងនៃបទប្បញ្ញត្តិ និងពង្រួញកន្លែងប្រព្រឹត្តសកម្មភាពខុសច្បាប់ទាក់ទងនឹងការឆបោក។
កាលពីខែវិច្ឆិកា ក្រសួង និងអាជ្ញាធរផ្សេងទៀតបានចេញផ្សាយសេចក្តីព្រាងវិធានការដាក់វិន័យរួមសម្រាប់ការឆបោកអនឡាញ និងសកម្មភាពខុសច្បាប់ដែលពាក់ព័ន្ធ ដើម្បីសុំមតិសាធារណៈក្នុងគោលបំណងជំរុញការប្រយុទ្ធប្រឆាំងនឹងឧក្រិដ្ឋកម្មបែបនេះ។
កិច្ចខិតខំប្រឹងប្រែងក្នុងការចេញការព្រមានក៏ត្រូវបានបង្កើនផងដែរ ដោយមជ្ឈមណ្ឌលជាតិប្រឆាំងការក្លែងបន្លំបានចេញសេចក្តីជូនដំណឹង ចំនួន ៩,៤ លាន។
នៅខែសីហា ឆ្នាំ២០២៣ ប្រទេសចិន ថៃ ឡាវ និងមីយ៉ាន់ម៉ា បានឯកភាពគ្នាបង្កើតមជ្ឈមណ្ឌលប្រតិបត្តិការនគរបាលរួមគ្នាមួយ ដើម្បីដោះស្រាយការបោកប្រាស់តាមអ៊ីនធឺណិតនៅក្នុងតំបន់។ កាលពីថ្ងៃទី១០ ខែតុលា ក្រសួងសន្តិសុខសាធារណៈរបស់ប្រទេសចិនបានប្រកាសថា “ប្រតិបត្តិការរដូវក្តៅ” របស់ខ្លួនបាននាំខ្លួនជនសង្ស័យឆបោកដោយជោគជ័យ ចំនួន ២,៣១៧នាក់ ពីភាគខាងជើងប្រទេសមីយ៉ាន់ម៉ាទៅកាន់ប្រទេសចិន។
ប្រទេសចិនហៅមនុស្សបែបនេះថាជាជនសង្ស័យ ទោះបីជាអ្នកជំនាញនិយាយថាពួកគេភាគច្រើនជាជនរងគ្រោះដែលត្រូវបានបង្ខំឱ្យធ្វើការឱ្យឧក្រិដ្ឋជនក៏ដោយ។ ពួកគេចោទសួរថា តើពួកគេនឹងត្រូវបានគេធ្វើយ៉ាងណា ពេលត្រឡប់មកប្រទេសចិនវិញ?
គម្រោងការដែលមានមូលដ្ឋាននៅក្នុងប្រទេសដូចជា មីយ៉ាន់ម៉ា ឡាវ និងកម្ពុជា ត្រូវបានគ្រប់គ្រងដោយថៅកែជនជាតិចិន ដោយសហការជាមួយអ្នកក្នុងស្រុក។
អ្នកជំនាញនិយាយថា ជារួម សកម្មភាពអនុវត្តច្បាប់ហាក់ដូចជាមិនទូលំទូលាយទេ។ ក្រុមនានា ដែលបច្ចុប្បន្នមានមូលដ្ឋាននៅមីយ៉ាន់ម៉ា ដើមឡើយមានទីតាំងនៅកម្ពុជា។ នៅពេលដែលប្រទេសកម្ពុជាបានបង្ក្រាបល្បែងស៊ីសងតាមអនឡាញ និងកាស៊ីណូខុសច្បាប់ក្នុងឆ្នាំ២០១៩ ក្រុមជាច្រើនទើបតែផ្លាស់ទៅកន្លែងដែលមិនសូវមានកម្លាំងសមត្ថកិច្ច នៅក្នុងប្រទេសមីយ៉ាន់ម៉ា។ ក្រុមមួយចំនួនត្រូវបានគ្រប់គ្រងដោយក្រុមជើងកាងដែលជាគូប្រជែង។ China Daily/AP
Related Posts
- September 5, 2023
- January 10, 2023
- January 20, 2023
- April 5, 2023
