កាលពីថ្ងៃច័ន្ទរបាយការណ៍របស់អគ្គនាយកដ្ឋានគយ និងរដ្ឋាករ បានឱ្យដឹងថា កម្ពុជាបាននាំចេញកង់មានទំហំទឹកប្រាក់ ៤១៦,៧ លានដុល្លារក្នុងឆ្នាំ ២០២៣ ធ្លាក់ចុះ ៥៣,៦ ភាគរយពី ៨៩៩,៧ លានដុល្លារកាលពីឆ្នាំ២០២២។
រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានលើកឡើងថា កង់ដែលផលិតក្នុងប្រទេសកម្ពុជា ត្រូវបាននាំចេញទៅកាន់សហភាពអឺរ៉ុប សហរដ្ឋអាមេរិក អង់គ្លេស កាណាដា ជប៉ុន និងចិន ក្នុងចំណោមប្រទេសផ្សេងៗទៀត។
លោកបានប្រាប់ Xinhua ថា “ការធ្លាក់ចុះនេះគឺដោយសារតែការធ្លាក់ចុះនៃសេដ្ឋកិច្ចពិភពលោក និងភាពមិនច្បាស់លាស់ដែលបានបណ្តាលឱ្យការបញ្ជាទិញត្រូវបានធ្លាក់ចុះ” ។
លោកបានបន្តថា កង់គឺជាផលិតផលដ៏សំខាន់មួយរបស់កម្ពុជាសម្រាប់ការនាំចេញ បន្ទាប់ពីសម្លៀកបំពាក់ វាយនភ័ណ្ឌ ស្បែកជើង និងទំនិញធ្វើដំណើរ។
បច្ចុប្បន្នមានរោងចក្រផលិតកង់ចំនួនប្រាំនៅកម្ពុជា ដែលរោងចក្រទាំងអស់នោះមានទីតាំងនៅតំបន់សេដ្ឋកិច្ចពិសេសក្នុងក្រុងបាវិត ខេត្តស្វាយរៀង។Xinhua